കൊച്ചി: ആന്റണി വർഗീസ് പെപ്പെയെ നായകനാക്കി പോൾ ജോർജ്ജ് സംവിധാനം ചെയ്യുന്ന ബിഗ് ബജറ്റ് ചിത്രം ‘കാട്ടാളനി’ലെ ആവേശം നിറയ്ക്കുന്ന ‘ദ ഹണ്ടർ ആന്തം’ പുറത്തിറങ്ങി. മലയാളത്തിന്റെ സൂപ്പർ താരം മോഹൻലാൽ തന്റെ സോഷ്യൽ മീഡിയ പേജിലൂടെയാണ് വെള്ളിയാഴ്ച ഗാനം റിലീസ് ചെയ്തത്. മെയ് 28-ന് ചിത്രം ലോകമെമ്പാടുമുള്ള തിയേറ്ററുകളിൽ പ്രദർശനത്തിനെത്തും.
യുവസംഗീത സംവിധായകൻ നിഹാൽ സാദിഖ് ഈണമിട്ട ഗാനം നിഹാൽ സാദിഖ്, ഹനാൻ ഷാ, എസ്വിഡിപി, മുൻസ് എന്നിവർ ചേർന്നാണ് ആലപിച്ചിരിക്കുന്നത്. സുഹൈൽ കോയ, വിഘ്നേഷ്, എസ്വിഡിപി എന്നിവരുടേതാണ് വരികൾ. അശ്വിൻ എസ്. കുമാർ ദൃശ്യാവിഷ്കാരം നിർവഹിച്ച ഈ ഗാനത്തിൽ വിസ്മയിപ്പിക്കുന്ന ആക്ഷൻ രംഗങ്ങളും ചടുലമായ നൃത്തച്ചുവടുകളുമാണ് ഉൾപ്പെടുത്തിയിരിക്കുന്നത്. ആനക്കൊമ്പ് കള്ളക്കടത്തും വന്യമായ പോരാട്ടങ്ങളും പ്രമേയമാകുന്ന ചിത്രം ഒരു ഹൈ-വോൾട്ടേജ് ആക്ഷൻ ത്രില്ലറാണെന്ന സൂചനയാണ് പുതിയ ഗാനം നൽകുന്നത്.
ഷരീഫ് മുഹമ്മദ് നിർമ്മിക്കുന്ന ഈ ചിത്രത്തിൽ ദുഷാര വിജയൻ, സുനിൽ, കബീർ സിംഗ് എന്നിങ്ങനെ വലിയൊരു താരനിര തന്നെ ഒന്നിക്കുന്നുണ്ട്. പ്രശസ്ത സിനിമയായ ‘കെജിഎഫ്’-ന് സംഗീതം നൽകിയ രവി ബസ്രൂറാണ് ഈ ചിത്രത്തിന്റെ പശ്ചാത്തല സംഗീതം ഒരുക്കുന്നത്. ‘കെജിഎഫ്’ നിർമ്മിച്ച ഹോംബാലെ ഫിലിംസ് ഉൾപ്പെടെയുള്ള വലിയ കമ്പനികളാണ് സിനിമയുടെ വിതരണാവകാശം ഏറ്റെടുത്തിരിക്കുന്നത്. ലോകപ്രശസ്തനായ കെച്ച കെംബഡികെ ഒരുക്കിയ ആക്ഷൻ രംഗങ്ങളും, ഗ്രാഫിക്സിന് പകരം യഥാർത്ഥ ആനകളെ ഉപയോഗിച്ചുള്ള ചിത്രീകരണവും ഈ സിനിമയുടെ പ്രത്യേകതകളാണ്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'Kaattalan' to rock the theatres; Mohanlal releases 'The Hunter Anthem' with excitement
