ഗ്ലാസ്ഗോ: കോമൺവെൽത്ത് ഗെയിംസിൽ സുവർണ്ണ നേട്ടത്തോടെ കാനഡയുടെ അഭിമാനമായി മാറിയ ജൂഡോ താരം ഷൂലിയൻ ഫ്രസ്കാഡോർ ഗെയിംസിന്റെ സമാപന ചടങ്ങിൽ കാനഡയുടെ ഔദ്യോഗിക പതാകയേന്തും. പുരുഷന്മാരുടെ 66 കിലോഗ്രാം വിഭാഗത്തിൽ ഒരു ടെക്നിക്കൽ പോയിന്റ് പോലും എതിരാളികൾക്ക് വിട്ടുനൽകാതെയാണ് ഫ്രസ്കാഡോർ സ്വർണം അണിഞ്ഞത്.
പ്രതിരോധത്തിലും ആക്രമണത്തിലും ഒരുപോലെ മികവ് പുലർത്തിയ 26-കാരനായ ഫ്രസ്കാഡോർ, കഴിഞ്ഞ തവണത്തെ ചാമ്പ്യനായ സൈപ്രസിന്റെ ജോർജിയോസ് ബലാർജിഷ്വിലിയെ എക്സ്ട്രാ ടൈമിൽ ഒരു പോയിന്റിന് പരാജയപ്പെടുത്തിയാണ് കരിയറിലെ സുപ്രധാന നേട്ടം സ്വന്തമാക്കിയത്. ടൂർണമെന്റിലുടനീളം കളിച്ച നാല് മത്സരങ്ങളിലും പൂർണ്ണ ആധിപത്യം പുലർത്താൻ ക്യുബെക്ക് സ്വദേശിയായ ഈ താരത്തിന് സാധിച്ചു. ഇവിടെയെത്തിയത് സ്വർണം മാത്രം ലക്ഷ്യമിട്ടാണെന്നും ഓരോ മത്സരം കഴിയുമ്പോഴും തന്റെ ആത്മവിശ്വാസം വർദ്ധിച്ചുകൊണ്ടിരുന്നുവെന്നും വിജയാഘോഷങ്ങൾക്കിടെ ഫ്രസ്കാഡോർ പ്രതികരിച്ചു.
കളിക്കളത്തിൽ മാത്രമല്ല, പഠനത്തിലും കഠിനാധ്വാനിയാണ് ഈ ചാമ്പ്യൻ. കഴിഞ്ഞ വർഷം ബാർ അഡ്മിഷൻ യോഗ്യത നേടിയ താരം, നിലവിൽ എച്ച്.ഇ.സി മോൺട്രിയാലിൽ ടാക്സേഷനിൽ മാസ്റ്റേഴ്സ് ബിരുദ പഠനം നടത്തുകയാണ്. കഴിഞ്ഞ പാരീസ് ഒളിമ്പിക്സിൽ കാനഡയുടെ പരിശീലന പങ്കാളിയായിരുന്ന ഫ്രസ്കാഡോറിന്റെ അടുത്ത പ്രധാന ലക്ഷ്യം 2028-ലെ ലോസ് ആഞ്ചലസ് ഒളിമ്പിക്സിലെ സുവർണ്ണ നേട്ടമാണ്.
ഫ്രസ്കാഡോറിന്റെ മിന്നുന്ന പ്രകടനത്തിന് പുറമേ ജൂഡോയിൽ കാനഡ മികച്ച മുന്നേറ്റമാണ് നടത്തിയത്. നാല് സ്വർണവും രണ്ട് വെള്ളിയും ഒരു വെങ്കലവും അടക്കം ആകെ ഏഴ് മെഡലുകൾ കാനഡയുടെ ജൂഡോ താരങ്ങൾ ഗ്ലാസ്ഗോയിൽ നിന്ന് സ്വന്തമാക്കി. വനിതകളുടെ 52 കിലോഗ്രാം വിഭാഗത്തിൽ എവ്ലിൻ ബീറ്റൺ, 63 കിലോഗ്രാം വിഭാഗത്തിൽ ലോറൻസ് ബിറോൺ, പുരുഷന്മാരുടെ 100 കിലോഗ്രാം വിഭാഗത്തിൽ കൈൽ റെയ്സ് എന്നിവരും കാനഡയ്ക്കായി സ്വർണം നേടി. ഹൈഡി ക്വാക്ക്, ഗില്ലോം ഗൗലിൻ എന്നിവർ വെള്ളിയും കൊറാലി ഗോഡ്ബൗട്ട് വെങ്കലവും കരസ്ഥമാക്കി കാനഡയുടെ മെഡൽ വേട്ട പൂർത്തിയാക്കി.
Judo Commonwealth Games champion Julien Frascadore named Canada’s flag-bearer for closing ceremony
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
