ഒട്ടാവ: കോസ്റ്റ്കോ വഴി വിറ്റഴിച്ച ഒരു ഐസ്ക്രീം ഉൽപ്പന്നം സാൽമൊണെല്ല (Salmonella) ബാധിക്കാനുള്ള സാധ്യതയെ തുടർന്ന് തിരിച്ചുവിളിച്ചു. ‘ടെസി-ലീഷ്യസ് കുൽഫി ഐസ്ക്രീം സ്റ്റിക്കുകൾ’ (Desi-Licious Kulfi Ice Cream Sticks) എന്ന ഉൽപ്പന്നമാണ് വിപണിയിൽ നിന്ന് തിരിച്ചുവിളിക്കാൻ നിർമ്മാതാക്കളായ ജെൽഡാ ഫുഡ്സ് (Gelda Foods) തീരുമാനിച്ചത്. ഇതുസംബന്ധിച്ച അറിയിപ്പ് കോസ്റ്റ്കോ തങ്ങളുടെ വെബ്സൈറ്റ് വഴി ഉപഭോക്താക്കളെ അറിയിക്കുകയായിരുന്നു.
ഈ തിരിച്ചുവിളിക്കൽ നടപടി ഒക്ടോബർ 17-നും ഡിസംബർ 2-നും ഇടയിൽ കാനഡയിലെ കോസ്റ്റ്കോ വെയർഹൗസുകളിലും ബിസിനസ് സെന്ററുകളിലും വിറ്റഴിച്ച ഉൽപ്പന്നങ്ങളെയാണ് ബാധിക്കുക. ബ്രാംപ്ടൺ, ഡർഹാം, ടൊറന്റോ ഉൾപ്പെടെ ഒന്റാറിയോയിലെ വിവിധ പ്രദേശങ്ങളിൽ ഈ ഐസ്ക്രീം വിറ്റഴിച്ചിരുന്നു.
ഉൽപ്പന്നത്തിന്റെ പാക്കറ്റിൽ ‘ബെസ്റ്റ് ബിഫോർ’ തീയതിക്ക് മുകളിലായി രേഖപ്പെടുത്തിയിട്ടുള്ള 4283, 4284, 4297, 4303, 4304, 4305, 4306, 4310, 5126, 5127, 5130, 5132, 5134, 5136, 5140, 5143, 5148, 5149, 5157, 5168, 5169 എന്നീ ലോട്ട് കോഡുകളുള്ള ഐസ്ക്രീമുകളാണ് പിൻവലിച്ചത്.
ഈ ഐസ്ക്രീം ഉൽപ്പന്നങ്ങൾ കഴിക്കുകയോ മറ്റുള്ളവർക്ക് വിതരണം ചെയ്യുകയോ ചെയ്യരുത് എന്ന് അധികൃതർ കർശനമായി നിർദ്ദേശിച്ചു. ഇത് കോസ്റ്റ്കോയിൽ തിരികെ നൽകുന്ന ഉപഭോക്താക്കൾക്ക് മുഴുവൻ തുകയും തിരികെ ലഭിക്കുന്നതാണ്. സാൽമൊണെല്ല അണുബാധയേറ്റ ഭക്ഷണം രൂപത്തിലോ മണത്തിലോ കേടായതായി തോന്നില്ലെങ്കിലും രോഗമുണ്ടാക്കാൻ സാധ്യതയുണ്ട്. ചെറിയ കുട്ടികൾ, ഗർഭിണികൾ, പ്രായമായവർ, പ്രതിരോധശേഷി കുറഞ്ഞവർ എന്നിവർക്ക് ഈ അണുബാധ ഗുരുതരമായേക്കാം. പനി, തലവേദന, ഛർദ്ദി, വയറുവേദന, വയറിളക്കം എന്നിവയാണ് സാധാരണ ലക്ഷണങ്ങൾ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Salmonella threat: Jelda Foods recalls Kulfi ice cream sold through Costco
