കാൽഗറി: കാൽഗറിയിലെ പൊതുസ്ഥലങ്ങളിൽ സ്വകാര്യ ഇ-സ്കൂട്ടറുകൾ ഉപയോഗിക്കുന്നത് നിയമവിരുദ്ധമാണെന്ന് അധികൃതർ വ്യക്തമാക്കി.
ക്രിസ്മസ് ഷോപ്പിംഗ് അവസാന ഘട്ടത്തിലെത്തി നിൽക്കെ കുട്ടികൾക്ക് സമ്മാനമായി ഇലക്ട്രിക് സ്കൂട്ടറുകൾ വാങ്ങി നൽകരുതെന്ന് ആരോഗ്യവിദഗ്ദ്ധർ മാതാപിതാക്കൾക്ക് മുന്നറിയിപ്പ് നൽകി. വർദ്ധിച്ചുവരുന്ന അപകടസാധ്യതയും ഇ-സ്കൂട്ടർ ഉപയോഗവുമായി ബന്ധപ്പെട്ട നിയമങ്ങളെക്കുറിച്ചുള്ള അറിവില്ലായ്മയും ചൂണ്ടിക്കാട്ടിയാണ് ഈ നിർദ്ദേശം. പ്രായപൂർത്തിയാകാത്തവർ ഇത്തരം വാഹനങ്ങൾ ഉപയോഗിക്കുന്നത് അതീവ അപകടകരമാണെന്ന് കാൽഗറിയിലെ എമർജൻസി ഫിസിഷ്യൻ ഡോ. സ്റ്റെഫാനി വാൻഡൻബർഗ് വ്യക്തമാക്കി.
ആൽബർട്ട ഹെൽത്ത് സർവീസസിന്റെ കണക്കുകൾ പ്രകാരം 2022 ജനുവരി മുതൽ 2025 ഓഗസ്റ്റ് വരെ കാൽഗറിയിൽ 3,660 ഇ-സ്കൂട്ടർ അപകടങ്ങൾ റിപ്പോർട്ട് ചെയ്തിട്ടുണ്ട്. ഇതിൽ 17 വയസ്സിന് താഴെയുള്ളവർക്ക് പരിക്കേൽക്കുന്ന സംഭവങ്ങളിൽ 68 ശതമാനത്തോളം വർദ്ധനവുണ്ടായതായും റിപ്പോർട്ടുകൾ സൂചിപ്പിക്കുന്നു. കുട്ടികൾക്ക് വേഗത നിയന്ത്രിക്കാനുള്ള ബാലൻസ് ഇല്ലാത്തതും അപകടസാധ്യതകൾ തിരിച്ചറിയാനുള്ള ശേഷിക്കുറവുമാണ് പരിക്കുകൾ വർദ്ധിക്കാൻ പ്രധാന കാരണമായി വിദഗ്ദ്ധർ ചൂണ്ടിക്കാട്ടുന്നത്.
ആൽബർട്ട ട്രാഫിക് സേഫ്റ്റി ആക്ട് പ്രകാരം സ്വകാര്യ ഇ-സ്കൂട്ടറുകൾ പൊതുനിരത്തുകളിലോ നടപ്പാതകളിലോ ഉപയോഗിക്കുന്നത് നിയമവിരുദ്ധമാണ്. എന്നാൽ കാൽഗറിയിലെ ബൈക്ക് ലേനുകളിൽ മണിക്കൂറിൽ 20 കിലോമീറ്ററിൽ താഴെ വേഗതയിൽ ഇവ ഉപയോഗിക്കാൻ നിലവിൽ അനുമതിയുണ്ട്. വാടകയ്ക്ക് നൽകുന്ന ഇ-സ്കൂട്ടറുകൾ ഉപയോഗിക്കാൻ 18 വയസ്സ് പൂർത്തിയാകണമെന്ന നിബന്ധനയുണ്ടെങ്കിലും സ്വകാര്യ സ്കൂട്ടറുകൾക്ക് നിലവിൽ പ്രായപരിധി നിശ്ചയിച്ചിട്ടില്ല.
ഇ-സ്കൂട്ടർ നിയന്ത്രണങ്ങൾ പരിഷ്കരിക്കുന്നത് സർക്കാരിന്റെ പരിഗണനയിലാണെന്ന് അൽബെർട്ട ഗതാഗത മന്ത്രി ഡെവിൻ ഡ്രീഷെൻ അറിയിച്ചു. നിലവിൽ ഹെൽമെറ്റ് ഉപയോഗം നിർബന്ധമല്ലെങ്കിലും സുരക്ഷ മുൻനിർത്തി ഹെൽമെറ്റ് ധരിക്കണമെന്ന് ആരോഗ്യവിദഗ്ദ്ധർ ആവശ്യപ്പെടുന്നു. അതേസമയം, നിയമങ്ങൾ പാലിച്ച് സുരക്ഷിതമായി ഉപയോഗിച്ചാൽ ഇ-സ്കൂട്ടറുകൾ ഗുണകരമാണെന്നും കൃത്യമായ സർട്ടിഫിക്കേഷനുള്ള വാഹനങ്ങൾ മാത്രം വാങ്ങണമെന്നും ഈ മേഖലയിലെ വ്യാപാരികൾ നിർദ്ദേശിച്ചു.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Is an e-scooter your Christmas gift? Then parents, listen to this, health experts say!
