ടെഹ്റാൻ : അമേരിക്കയുമായും ഇസ്രയേലുമായുമുള്ള യുദ്ധത്തിന്റെ പശ്ചാത്തലത്തിൽ ഇറാൻ വൻ ജനകീയ സജ്ജീകരണ നീക്കം ശക്തമാക്കി. ‘ജൻഫദ’ അഥവാ ‘ഇറാനുവേണ്ടി ത്യാഗം ചെയ്യുന്നവർ’ എന്ന പേരിലുള്ള ക്യാംപയിന്റെ ഭാഗമായി സാധാരണ പൗരന്മാർക്ക് സൈനിക പരിശീലനം നൽകുകയും ആയുധസജ്ജരാക്കുകയും ചെയ്യുകയാണ്. ഇസ്ലാമിക് റെവല്യൂഷണറി ഗാർഡ് കോർപ്സിന്റെ (IRGC) ബസിജ് വിഭാഗത്തിന്റെ ഭാഗമായാണ് ഇവരെ സുരക്ഷാ ചുമതലകളിൽ വിന്യസിക്കുന്നത്. സെപ്റ്റംബർ 18ന് ടെഹ്റാനിൽ ആയിരക്കണക്കിന് സ്ത്രീകളും കുട്ടികളും പുരുഷന്മാരും പങ്കെടുത്ത ആദ്യ പൊതുസൈനിക അഭ്യാസവും നടന്നു. 313,000 പേർ മാർച്ചിൽ പങ്കെടുക്കുമെന്നായിരുന്നു അധികൃതരുടെ അവകാശവാദം.
ജൻഫദ ക്യാംപയിന്റെ ഭാഗമായി 600,000ലേറെ പേർ സജീവ സജ്ജീകരണത്തിനായി രജിസ്റ്റർ ചെയ്തതായി ടെഹ്റാനിലെ IRGC മേധാവി ഹസൻ ഹസൻസാദെ പറഞ്ഞു. പത്ത് ലക്ഷത്തിലേറെ പേർ രജിസ്റ്റർ ചെയ്യുമെന്നാണ് അധികൃതരുടെ പ്രതീക്ഷ. ഇതിനകം 1,000 യൂണിറ്റുകൾ അഥവാ ‘ബറ്റാലിയനുകൾ’ രൂപീകരിച്ചതായും അവർ അറിയിച്ചു. എന്നാൽ രജിസ്ട്രേഷനുമായി ബന്ധപ്പെട്ട കണക്കുകളിൽ നേരത്തെ തന്നെ സംശയങ്ങൾ ഉയർന്നിരുന്നു. മാർച്ചിൽ 31 ദശലക്ഷത്തിലേറെ പേർ രജിസ്റ്റർ ചെയ്തെന്നായിരുന്നു അധികൃതരുടെ അവകാശവാദം. എന്നാൽ വിദേശത്തുള്ള പ്രവർത്തകർ വെബ്സൈറ്റിന്റെ സോഴ്സ് കോഡ് പരിശോധിച്ചപ്പോൾ നാല് ദശലക്ഷത്തിൽ താഴെ പേർ മാത്രമാണ് രജിസ്റ്റർ ചെയ്തതെന്ന് കണ്ടെത്തിയിരുന്നു. രജിസ്ട്രേഷന് ഫോൺ നമ്പർ മാത്രം മതിയായിരുന്നു. സൈനിക, സുരക്ഷാ മേഖലകൾക്ക് പുറമെ രക്ഷാപ്രവർത്തനം, സാമൂഹിക സേവനം, മാധ്യമം, സാമ്പത്തിക സഹായം തുടങ്ങിയ മേഖലകളിലേക്കും ആളുകളെ ഉൾപ്പെടുത്തുന്നുണ്ട്.
ക്യാംപയിനിൽ കുട്ടികൾക്കും വലിയ പ്രാധാന്യം നൽകുന്നുണ്ട്. വെള്ളിയാഴ്ച നടന്ന സൈനിക അഭ്യാസത്തിൽ കൗമാരക്കാർ തോക്കുകളുമായി പങ്കെടുത്തിരുന്നു. 15 വയസിന് മുകളിലുള്ള ആൺകുട്ടികൾക്ക് രജിസ്റ്റർ ചെയ്യാൻ അനുമതിയുണ്ടെന്നും 15 വയസിന് താഴെയുള്ളവരെയും ഉൾപ്പെടുത്താൻ പദ്ധതിയുണ്ടെന്നും ജൻഫദ വക്താവ് സസാൻ സാരെ പറഞ്ഞു. കുട്ടികളിലും കൗമാരക്കാരിലും ‘ത്യാഗത്തിന്റെയും പ്രതിരോധത്തിന്റെയും സംസ്കാരം’ വളർത്തുകയാണ് ലക്ഷ്യമെന്നാണ് അദ്ദേഹത്തിന്റെ വിശദീകരണം. അതേസമയം, അമേരിക്കയുമായുള്ള സംഘർഷം, ഹോർമുസ് കടലിടുക്കിനെ ചൊല്ലിയുള്ള തർക്കം, സാമ്പത്തിക പ്രതിസന്ധി എന്നിവയ്ക്കിടെയാണ് നീക്കം. ഇന്ധനം, വൈദ്യുതി തുടങ്ങിയ വിഭവങ്ങളുടെ ഉപയോഗം കുറയ്ക്കാനും പ്രസിഡന്റ് മസൂദ് പെസഷ്കിയാൻ സന്നദ്ധപ്രവർത്തകരോട് ആവശ്യപ്പെട്ടു.
ബസിജ് സേനയുടെ പഴയ ദേശസ്നേഹ പ്രതിച്ഛായ വീണ്ടെടുക്കാനുള്ള ശ്രമമായും ജൻഫദ ക്യാംപയിനെ വിലയിരുത്തപ്പെടുന്നു. 1980ൽ ഇറാഖ് ഇറാനെ ആക്രമിച്ചപ്പോൾ മതപരവും ദേശസ്നേഹപരവുമായ വികാരത്തിൽ ലക്ഷക്കണക്കിന് ഇറാനികൾ സന്നദ്ധരായി യുദ്ധമുഖത്തേക്ക് എത്തിയിരുന്നു. എന്നാൽ 1988ലെ യുദ്ധത്തിന് ശേഷം ബസിജ് ആഭ്യന്തര അടിച്ചമർത്തലിന്റെയും പ്രതിഷേധങ്ങൾ നേരിടുന്നതിന്റെയും ഉപകരണമായി മാറിയതോടെ സംഘടനയുടെ പൊതുചിത്രത്തിന് വലിയ തിരിച്ചടിയുണ്ടായി. ഭാവിയിൽ അമേരിക്കയുടെ കരയാക്രമണം മാത്രമല്ല, അമേരിക്കയും ഇസ്രയേലും പ്രേരിപ്പിക്കുന്ന ആഭ്യന്തര സംഘർഷമോ സാമ്പത്തിക സമ്മർദത്തെ തുടർന്നുള്ള വലിയ ജനകീയ പ്രക്ഷോഭങ്ങളോ ഉണ്ടായേക്കാമെന്ന ആശങ്കയും ക്യാംപയിനിന് പിന്നിലുണ്ടാകാമെന്നാണ് അറബ് ഗൾഫ് സ്റ്റേറ്റ്സ് ഇൻസ്റ്റിറ്റ്യൂട്ടിലെ മുതിർന്ന ഗവേഷകൻ അലി അൽഫോനെഹിന്റെ വിലയിരുത്തൽ.
