കൊച്ചി: യുഎസും ഇറാനും തമ്മിലുള്ള സമാധാന ചർച്ചകൾ പരാജയപ്പെട്ടതിനെ തുടർന്ന് ആഗോള വിപണിയിലുണ്ടായ മാറ്റങ്ങളാൽ കേരളത്തിൽ സ്വർണ്ണവിലയിൽ വൻ ഇടിവ് രേഖപ്പെടുത്തി. ഇന്ന് രാവിലെയും ഉച്ചയ്ക്കുമായി പവൻ വിലയിൽ 1,560 രൂപയുടെ കുറവാണ് ഉണ്ടായത്. ഇതോടെ കേരളത്തിൽ ഒരു പവൻ സ്വർണ്ണത്തിന്റെ വില 1,04,960 രൂപയായും ഗ്രാം വില 13,120 രൂപയായും താഴ്ന്നു. അതേസമയം, അന്താരാഷ്ട്ര വിപണിയിൽ ഡോളർ കരുത്താർജ്ജിച്ചതും ക്രൂഡോയിൽ വിലയിലുണ്ടായ വൻ വർദ്ധനവുമാണ് സ്വർണ്ണവില പെട്ടെന്ന് താഴേക്ക് പോകാൻ കാരണമായത്.
യുഎസും ഇറാനും തമ്മിൽ പാകിസ്ഥാന്റെ മധ്യസ്ഥതയിൽ നടത്തിവന്ന വെടിനിർത്തൽ ധാരണകൾ അവസാനിച്ചതായി അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചതാണ് നിലവിലെ പ്രതിസന്ധിക്ക് തുടക്കമിട്ടത്. ഹൊർമുസ് കടലിടുക്കിൽ കപ്പലുകൾക്ക് നേരെ ഇറാൻ നടത്തിയ ആക്രമണത്തിന് പിന്നാലെ യുഎസ് തിരിച്ചടി നൽകിയിരുന്നു. വൈറ്റ് ഹൗസിൽ നാറ്റോ മേധാവി മാർക്ക് റൂട്ടെയുമായി നടത്തിയ സംയുക്ത വാർത്താസമ്മേളനത്തിലാണ്, ഇറാനുമായുള്ള ചർച്ചകളുടെ സമയം കഴിഞ്ഞതായും സമാധാന കരാറുകളിൽ നിന്ന് പിന്മാറുന്നതായും ട്രംപ് വ്യക്തമാക്കിയത്. ഇതോടെ മേഖലയിൽ യുദ്ധഭീതി ശക്തമാകുകയും ഇറാൻ ശക്തമായ തിരിച്ചടിക്കുമെന്ന് മുന്നറിയിപ്പ് നൽകുകയും ചെയ്തിട്ടുണ്ട്.
ട്രംപിന്റെ പ്രസ്താവന പുറത്തുവന്നതോടെ ആഗോള വിപണിയിൽ ക്രൂഡോയിൽ വിലയിൽ വൻ കുതിച്ചുചാട്ടമുണ്ടായി. യുഎസ് ക്രൂഡ് വില ബാരലിന് 75 ഡോളറായും ബ്രെന്റ് ക്രൂഡ് വില 78.96 ഡോളറായും ഉയർന്നു. എണ്ണവില വർദ്ധിച്ചതോടെ യുഎസ് ഡോളറും കൂടുതൽ കരുത്താർജ്ജിച്ചു. ഡോളറിന്റെ മൂല്യം ഉയർന്നത് സ്വർണ്ണത്തിലുള്ള നിക്ഷേപ താല്പര്യം കുറയ്ക്കുകയും, പകരം ബാങ്ക് നിക്ഷേപങ്ങളിലേക്കും സർക്കാർ നിക്ഷേപങ്ങളിലേക്കും പണമൊഴുകാൻ കാരണമാകുകയും ചെയ്തു. ഇതാണ് സ്വർണ്ണവില ഇടിയാൻ ഇടയാക്കിയത്. അതേസമയം, സംസ്ഥാനത്ത് 18 കാരറ്റ് സ്വർണ്ണവില ഗ്രാമിന് 10,835 രൂപയായി കുറഞ്ഞപ്പോൾ വെള്ളി വിലയിൽ മാറ്റമില്ലാതെ ഗ്രാമിന് 245 രൂപയായി തുടരുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Iran deal collapses; gold prices plummet; market shaken by Trump's statement.
