ഇന്ത്യൻ പ്രീമിയർ ലീഗിലെ ഉജ്ജ്വലമായ ഡബിൾ ഹെഡർ പോരാട്ടങ്ങൾക്കാണ് ഇന്ന് ക്രിക്കറ്റ് ലോകം സാക്ഷ്യം വഹിക്കുന്നത്. ശനിയാഴ്ച നടക്കുന്ന ആദ്യ മത്സരത്തിൽ നിലവിലെ ചാമ്പ്യന്മാരായ റോയൽ ചലഞ്ചേഴ്സ് ബെംഗളൂരു, ഡൽഹി ക്യാപിറ്റൽസിനെ തങ്ങളുടെ തട്ടകമായ ചിന്നസ്വാമി സ്റ്റേഡിയത്തിൽ നേരിടും. വൈകിട്ട് 3:30-നാണ് ഈ മത്സരം ആരംഭിക്കുന്നത്. രണ്ടാം മത്സരത്തിൽ രാത്രി 7:30-ന് ഹൈദരാബാദിലെ രാജീവ് ഗാന്ധി ഇന്റർനാഷണൽ സ്റ്റേഡിയത്തിൽ ചെന്നൈ സൂപ്പർ കിംഗ്സ്, സൺറൈസേഴ്സ് ഹൈദരാബാദിനെ നേരിടും.
സീസണിൽ അത്യുഗ്രൻ ഫോമിലുള്ള റോയൽ ചലഞ്ചേഴ്സ് ബെംഗളൂരു അഞ്ചിൽ നാല് മത്സരങ്ങളും വിജയിച്ച് പോയിന്റ് പട്ടികയിൽ രണ്ടാമതാണ്. രജത് പാട്ടിദാർ നയിക്കുന്ന ആർസിബി സംഘം ഇന്ന് ഡൽഹിയെ പരാജയപ്പെടുത്തിയാൽ പഞ്ചാബ് കിംഗ്സിനെ മറികടന്ന് ഒന്നാം സ്ഥാനത്തെത്താം. വിരാട് കോഹ്ലിയുടെ മികച്ച ബാറ്റിംഗ് ഫോം ടീമിന് കരുത്തേകുന്നു. മറുവശത്ത്, അക്സർ പട്ടേലിന്റെ നേതൃത്വത്തിലിറങ്ങുന്ന ഡൽഹി ക്യാപിറ്റൽസ് തുടർച്ചയായ തോൽവികളിൽ നിന്ന് കരകയറാനാണ് ലക്ഷ്യമിടുന്നത്.
രാത്രി നടക്കുന്ന ചെന്നൈ-ഹൈദരാബാദ് പോരാട്ടത്തിൽ മലയാളി താരം സഞ്ജു സാംസണിലാണ് സിഎസ്കെയുടെ പ്രധാന പ്രതീക്ഷകൾ. ഈ സീസണിൽ ചെന്നൈയ്ക്ക് വേണ്ടി മികച്ച പ്രകടനം നടത്തുന്ന സഞ്ജു, ഡൽഹിക്ക് എതിരെ സെഞ്ചുറി നേടി ഫോമിലേക്ക് തിരിച്ചെത്തിയിരുന്നു. എന്നാൽ നായകൻ റുതുരാജ് ഗെയ്ക്വാദിന്റെ ബാറ്റിംഗിലെ പതർച്ച ടീമിനെ അല്പം ആശങ്കയിലാക്കുന്നുണ്ട്. ഇഷാൻ കിഷൻ നയിക്കുന്ന സൺറൈസേഴ്സ് ഹൈദരാബാദ് ആകട്ടെ, കഴിഞ്ഞ മത്സരത്തിൽ രാജസ്ഥാനെ വീഴ്ത്തിയ ആത്മവിശ്വാസത്തിലാണ് ഇറങ്ങുന്നത്. സ്വന്തം മൈതാനത്ത് ഹൈദരാബാദ് കരുത്തരായതിനാൽ ചെന്നൈയ്ക്ക് കടുത്ത പോരാട്ടം തന്നെ നേരിടേണ്ടി വരും.
IPL 2026: RCB vs DC, SRH vs CSK matchs TODAY
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
