വാങ്കൂവർ: ബ്രിട്ടീഷ് കൊളംബിയയിൽ കഴിഞ്ഞ എട്ട് വർഷത്തിനിടെ പങ്കാളികൾക്കിടയിലെ അക്രമം മൂലം ഉണ്ടായ 135 മരണങ്ങളും പൂർണ്ണമായും ഒഴിവാക്കാവുന്നതായിരുന്നുവെന്ന് ചീഫ് കൊറോണറുടെ നേതൃത്വത്തിലുള്ള വിദഗ്ധ സമിതി വെളിപ്പെടുത്തി. കൃത്യമായ മുൻകരുതലുകളും ഏകോപിതമായ ഇടപെടലുകളും ഉണ്ടായിരുന്നെങ്കിൽ ഈ ജീവനുകൾ രക്ഷിക്കാമായിരുന്നുവെന്ന് ‘ഡെത്ത് റിവ്യൂ പാനൽ’ പുറത്തുവിട്ട റിപ്പോർട്ട് പറയുന്നു.
കൊല്ലപ്പെട്ടവരിൽ ഭൂരിഭാഗം പേരും തങ്ങൾ നേരിടുന്ന ഭീഷണിയെക്കുറിച്ച് മരണം സംഭവിക്കുന്നതിന് മാസങ്ങൾക്കോ വർഷങ്ങൾക്കോ മുൻപ് തന്നെ പോലീസ്, ആരോഗ്യവകുപ്പ് തുടങ്ങിയ പൊതുസംവിധാനങ്ങളുമായി ബന്ധപ്പെട്ടിരുന്നു എന്നത് സംഭവത്തിന്റെ ഗൗരവം വർധിപ്പിക്കുന്നു. എന്നാൽ ഈ സംവിധാനങ്ങൾക്കിടയിലെ ഏകോപനമില്ലായ്മയും അമിത ജോലിഭാരവും അടിയന്തരമായി ലഭിക്കേണ്ട സഹായം വൈകിപ്പിച്ചു. ബി.സിയിലെ ജനസംഖ്യയിൽ വെറും 5.9 ശതമാനം മാത്രമുള്ള തദ്ദേശീയരായ ജനവിഭാഗമാണ് ഇരകളിൽ 24 ശതമാനവുമെന്നത് ഞെട്ടിക്കുന്ന കണക്കാണ്. നഗരങ്ങളെ അപേക്ഷിച്ച് ബി.സിയിലെ ഗ്രാമപ്രദേശങ്ങളിലും വടക്കൻ മേഖലകളിലുമാണ് മരണനിരക്ക് കൂടുതലായി കണ്ടുവരുന്നത്. ഇവിടെ സുരക്ഷിതമായ താമസസൗകര്യങ്ങളുടെയും സഹായ സേവനങ്ങളുടെയും അഭാവം പ്രതിസന്ധി സങ്കീർണ്ണമാക്കുന്നു.
കൊലപാതകങ്ങൾക്കായി പ്രധാനമായും തോക്കുകളും മൂർച്ചയുള്ള ആയുധങ്ങളുമാണ് ഉപയോഗിച്ചിരിക്കുന്നത്. ഗ്രാമപ്രദേശങ്ങളിൽ തോക്ക് ഉപയോഗിച്ചുള്ള അക്രമങ്ങൾ കൂടുതലായി റിപ്പോർട്ട് ചെയ്യപ്പെട്ടു. ഇത്തരം സാഹചര്യങ്ങൾ ഒഴിവാക്കാൻ മരണങ്ങൾ വിശകലനം ചെയ്യാൻ ഒരു സ്ഥിരം സമിതിയെ നിയോഗിക്കണമെന്നും പോലീസ്, എമർജൻസി റൂം സ്റ്റാഫ് തുടങ്ങിയ മുൻനിര പ്രവർത്തകർക്ക് ഇത്തരം അക്രമങ്ങൾ തിരിച്ചറിയാൻ പ്രത്യേക പരിശീലനം നൽകണമെന്നും റിപ്പോർട്ട് ശുപാർശ ചെയ്യുന്നു. കൂടാതെ പൊതുജനങ്ങൾക്കിടയിൽ അവബോധം വളർത്തുന്നതിനൊപ്പം കൃത്യമായ ഡാറ്റാ ശേഖരണത്തിലൂടെ അപകടസാധ്യതകൾ നേരത്തെ കണ്ടെത്തണമെന്നും പാനൽ നിർദ്ദേശിച്ചു. ഇരകളിൽ 80 ശതമാനം പേരും ഭയം മൂലം തങ്ങൾ നേരിടുന്ന അതിക്രമം പോലീസിൽ റിപ്പോർട്ട് ചെയ്യാൻ മടിക്കുന്നുവെന്നതും നിലവിലെ സാഹചര്യത്തിൽ വലിയ വെല്ലുവിളിയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Intimate partner-related deaths in B.C. ‘overwhelmingly preventable,’ report says
