ഇൻസ്റ്റാഗ്രാം ഡയറക്ട് മെസേജുകളിലെ (DM) എൻഡ്-ടു-എൻഡ് എൻക്രിപ്ഷൻ സംവിധാനം മെയ് 8 മുതൽ കമ്പനി അവസാനിപ്പിച്ചു. അയക്കുന്നയാൾക്കും സ്വീകർത്താവിനും മാത്രമായി സന്ദേശങ്ങൾ വായിക്കാൻ കഴിയുന്ന സുരക്ഷാ രീതിയായിരുന്നു ഇത്. ഇതോടെ ഉപയോക്താക്കളുടെ സ്വകാര്യ സംഭാഷണങ്ങൾ കമ്പനിക്ക് വേണമെങ്കിൽ പരിശോധിക്കാൻ സാധിക്കുമെന്ന ആശങ്ക പരന്നിരിക്കുകയാണ്. എൻക്രിപ്ഷൻ ഉപയോഗിക്കുന്നവരുടെ എണ്ണം കുറവാണെന്നാണ് മെറ്റയുടെ ഔദ്യോഗിക വിശദീകരണമെങ്കിലും, ഇതിന് പിന്നിൽ മറ്റ് ലക്ഷ്യങ്ങളുണ്ടെന്നാണ് വിലയിരുത്തൽ.
ഉപയോക്താക്കളുടെ സ്വകാര്യ ചാറ്റുകൾ ആക്സസ് ചെയ്ത് മെറ്റ എഐ (Meta AI) പരിശീലിപ്പിക്കാനാണ് കമ്പനി ഈ നീക്കം നടത്തുന്നതെന്ന് സൈബർ വിദഗ്ധർ ചൂണ്ടിക്കാട്ടുന്നു. എൻക്രിപ്ഷൻ നിലനിൽക്കുമ്പോൾ കമ്പനിക്ക് പോലും സന്ദേശങ്ങൾ വായിക്കാൻ സാധിക്കുമായിരുന്നില്ല. ഈ തടസ്സം നീങ്ങുന്നതോടെ ഡാറ്റ ശേഖരണം എളുപ്പമാകും. ഇൻസ്റ്റാഗ്രാമിൽ എൻക്രിപ്ഷൻ അവതരിപ്പിച്ചപ്പോൾ സ്വകാര്യതയാണ് പരമപ്രധാനമെന്ന് പറഞ്ഞ കമ്പനി, ഇപ്പോൾ ലാഭത്തിന് വേണ്ടി നിലപാട് മാറ്റുന്നത് ഇരട്ടത്താപ്പാണെന്ന വിമർശനം ശക്തമാണ്.
എൻഡ്-ടു-എൻഡ് എൻക്രിപ്ഷൻ ഒഴിവാക്കുന്നത് സന്ദേശങ്ങളുടെ സുരക്ഷയെ ഗുരുതരമായി ബാധിക്കുമെന്ന് വിദഗ്ധർ മുന്നറിയിപ്പ് നൽകുന്നു. സന്ദേശങ്ങൾ എൻക്രിപ്റ്റ് ചെയ്യപ്പെടാത്ത സാഹചര്യത്തിൽ ഹാക്കർമാർക്ക് വിവരങ്ങൾ ചോർത്തുന്നത് മുൻപത്തേക്കാൾ എളുപ്പമാകും. സ്വകാര്യ ഫോട്ടോകളും വീഡിയോകളും പ്രധാനപ്പെട്ട വിവരങ്ങളും സോഷ്യൽ മീഡിയയിലൂടെ പങ്കുവെക്കുന്നവർക്ക് ഈ തീരുമാനം വലിയ വെല്ലുവിളിയാണ്. വാട്ട്സ്ആപ്പിൽ ഇതേ എൻക്രിപ്ഷൻ സംവിധാനം ഇപ്പോഴും തുടരുന്നുണ്ടെങ്കിലും ഇൻസ്റ്റാഗ്രാമിലെ മാറ്റം ഉപയോക്താക്കളെ ആശങ്കയിലാക്കുന്നു.
തെറ്റായ ഉള്ളടക്കങ്ങൾ നിരീക്ഷിക്കാനും നിയമനിർവ്വഹണ ഏജൻസികളെ സഹായിക്കാനും എൻക്രിപ്ഷൻ ഒഴിവാക്കുന്നത് ഗുണകരമാകുമെന്നാണ് ടെക് കമ്പനികളുടെ വാദം. എന്നാൽ സുരക്ഷയുടെ പേരിൽ വ്യക്തിസ്വാതന്ത്ര്യം ഹനിക്കുകയാണെന്ന് ഉപയോക്താക്കൾ ആരോപിക്കുന്നു. ഇൻസ്റ്റാഗ്രാമിന്റെ ഈ പുതിയ നയം സോഷ്യൽ മീഡിയ പ്ലാറ്റ്ഫോമുകളിലെ സ്വകാര്യതയെക്കുറിച്ചുള്ള ആഗോള ചർച്ചകൾക്ക് വീണ്ടും ആക്കം കൂട്ടിയിരിക്കുകയാണ്. വിശ്വസ്തമായ ആശയവിനിമയത്തിന് ഇനി ഇൻസ്റ്റാഗ്രാം അനുയോജ്യമാണോ എന്ന ചോദ്യമാണ് പലരും ഉയർത്തുന്നത്.
Instagram privacy concerns; End-to-end encryption withdrawn
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
