കൗമാരക്കാർക്കിടയിൽ ഇൻസ്റ്റഗ്രാം ഉപയോഗം വർധിച്ചുവരുന്ന സാഹചര്യത്തിൽ, കുട്ടികളുടെ സുരക്ഷയും അമിത ഉപയോഗവും നിയന്ത്രിക്കാൻ സഹായിക്കുന്ന നാല് പ്രധാന ഫീച്ചറുകൾ അവതരിപ്പിച്ച് ഇൻസ്റ്റഗ്രാം. മാതാപിതാക്കളുടെ ഇടപെടൽ സ്വകാര്യതയിലേക്കുള്ള കടന്നുകയറ്റമായി കാണുന്ന കുട്ടികളെ ഡിജിറ്റൽ ലോകത്ത് സുരക്ഷിതമായി നിരീക്ഷിക്കാൻ ഈ സംവിധാനങ്ങൾ സഹായിക്കും. സാങ്കേതികവിദ്യയുടെ അമിത ഉപയോഗം കുട്ടികളുടെ ഉറക്കത്തെയും പഠനത്തെയും ബാധിക്കുന്നുവെന്ന പരാതികൾക്കിടയിലാണ് ഇൻസ്റ്റഗ്രാം ഈ നിയന്ത്രണ സംവിധാനങ്ങൾ ഒരുക്കിയിരിക്കുന്നത്.
പ്രധാന ഫീച്ചറുകൾ ഇവയാണ്:
- ടേക്ക് എ ബ്രേക്ക് (Take a Break): തുടർച്ചയായി ഇൻസ്റ്റഗ്രാം റീലുകളും മറ്റും സ്ക്രോൾ ചെയ്യുന്ന കുട്ടികൾക്ക് നിശ്ചിത സമയം കഴിഞ്ഞാൽ ഇടവേള എടുക്കണമെന്ന് ഓർമ്മിപ്പിക്കുന്ന സംവിധാനമാണിത്. മുൻകൂട്ടി നിശ്ചയിച്ച സമയം കഴിഞ്ഞാൽ സ്ക്രീനിൽ റിമൈൻഡർ സന്ദേശം തെളിയും.
- ക്വയറ്റ് മോഡ് (Quiet Mode): പഠന സമയത്തോ രാത്രിയിലോ ഇൻസ്റ്റഗ്രാമിൽ നിന്നുള്ള നോട്ടിഫിക്കേഷനുകൾ തടയാൻ ഇതിലൂടെ സാധിക്കും. രാത്രി വൈകി ആപ്പ് ഉപയോഗിക്കുന്നത് കുറയ്ക്കാൻ ഈ ഫീച്ചർ ഫലപ്രദമാണ്. ഈ സമയത്ത് സന്ദേശം അയക്കുന്നവർക്ക് ഉപയോക്താവ് ‘ക്വയറ്റ് മോഡിലാണെന്ന’ മറുപടി ഓട്ടോമാറ്റിക്കായി ലഭിക്കും.
- നൈറ്റ് നഡ്ജ് (Night Nudge): രാത്രി വൈകി റീലുകൾ കണ്ടുകൊണ്ടിരിക്കുന്ന കുട്ടികൾക്ക് കൃത്യസമയത്ത് ഉറങ്ങാൻ നിർദ്ദേശം നൽകുന്ന ഫീച്ചറാണിത്. ഓരോ പത്ത് മിനിറ്റിലും ഉറങ്ങാൻ സമയമായെന്ന മുന്നറിയിപ്പ് സ്ക്രീനിൽ നൽകിക്കൊണ്ട് കുട്ടികളുടെ ഉറക്കം കൃത്യമാക്കാൻ ഇത് സഹായിക്കും.
- പാരന്റൽ സൂപ്പർവിഷൻ (Parental Supervision): കുട്ടികൾ ഇൻസ്റ്റഗ്രാമിൽ എത്ര സമയം ചിലവഴിക്കുന്നുവെന്നും ആരുമായൊക്കെ ആശയവിനിമയം നടത്തുന്നുവെന്നും നിരീക്ഷിക്കാൻ രക്ഷിതാക്കളെ സഹായിക്കുന്നതാണ് ഈ ടൂൾ. കുട്ടികൾ ഓൺലൈനിൽ വരുന്ന സമയം അറിയാനും ഇതിലൂടെ സാധിക്കും.
കുട്ടികളുടെ ഓൺലൈൻ ശീലങ്ങൾ മെച്ചപ്പെടുത്തുന്നതിനും ഡിജിറ്റൽ അടിമത്തം കുറയ്ക്കുന്നതിനും ഇത്തരം മാറ്റങ്ങൾ അനിവാര്യമാണെന്നാണ് സാങ്കേതിക വിദഗ്ധരുടെ വിലയിരുത്തൽ. ഗൂഗിൾ പ്ലേ സ്റ്റോറിലോ ആപ്പിൾ ആപ്പ് സ്റ്റോറിലോ പോയി ഇൻസ്റ്റഗ്രാം അപ്ഡേറ്റ് ചെയ്യുന്നതിലൂടെ ഉപയോക്താക്കൾക്ക് ഈ ഫീച്ചറുകൾ ലഭ്യമാകും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Instagram introduces 4 new tools for parents to control children's Instagram usage
