കാനഡയിലെ ചിമ്മിനി ഹിൽ പാർക്കിൽ ഇന്ത്യക്കാരനെ തൂങ്ങിമരിച്ച നിലയിൽ കണ്ടെത്തി. പഞ്ചാബ് ലുധിയായ സ്വദേശിയായ 20 കാരനാണ് മരിച്ചത്. ഓഗസ്റ്റ് 16-നാണ് സംഭവം.സാമ്പത്തിക തട്ടിപ്പിന് ഇരയായതിനെ തുടർന്നുള്ള ആത്മഹത്യയാണെന്നാണ് പ്രാഥമിക നിഗമനം.
രണ്ട് വർഷം മുൻപാണ് യുവാവ് പഠന വിസയിൽ കാനഡയിൽ എത്തിയത്. പഠനം പൂർത്തിയാക്കാൻ തയ്യാറെടുക്കുന്നതിനിടയിലാണ് കാർ ലോൺ തട്ടിപ്പിൽ അകപ്പെട്ടത്. ഇത് വലിയ മാനസിക സമ്മർദ്ദത്തിന് കാരണമായി. സുഹൃത്തുക്കൾക്ക് അയച്ച സന്ദേശത്തിൽ, തൻ്റെ തിരോധാനത്തെക്കുറിച്ച് പോലീസിനെ അറിയിക്കാൻ ആവശ്യപ്പെട്ടിരുന്നു. മണിക്കൂറുകൾക്ക് ശേഷം പാർക്കിൽ മൃതദേഹം കണ്ടെത്തുകയായിരുന്നു. യുവാവിൻ്റെ അവസാന സന്ദേശങ്ങളുടെ സ്ക്രീൻഷോട്ടുകൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
മൃതദേഹം നാട്ടിലെത്തിച്ച് അന്ത്യകർമ്മങ്ങൾ നടത്താൻ സഹായിക്കണമെന്ന് ആവശ്യപ്പെട്ട് യുവാവിന്റെ ഗ്രാമത്തലവൻ ഡെപ്യൂട്ടി കമ്മീഷണർക്ക് കത്തെഴുതിയിട്ടുണ്ട്. മൃതദേഹം നാട്ടിലെത്തിക്കാൻ സഹായിക്കണമെന്ന് ആവശ്യപ്പെട്ട് യുവാവിന്റെ സുഹൃത്തുക്കൾ സമൂഹമാധ്യമങ്ങളിൽ പ്രചാരണം നടത്തുന്നുണ്ട്.
Indian man found dead Canada; suspected to be a victim of financial fraud
