ന്യൂഡല്‍ഹി: പാക്കിസ്ഥാന്‍ തങ്ങളുടെ വ്യോമപാത അടച്ചിട്ടതിനെ തുടര്‍ന്ന് അന്താരാഷ്ട്ര വിമാന സര്‍വീസുകള്‍ നേരിടുന്ന കടുത്ത പ്രതിസന്ധി പരിഹരിക്കാന്‍ പുതിയ വഴികള്‍ തേടി ഇന്ത്യ. ഇതിന്റെ ഭാഗമായി ചൈനയിലെ സിന്‍ജിയാങ് മേഖലയ്ക്ക് മുകളിലൂടെയുള്ള പുതിയ വ്യോമപാത ഉപയോഗിക്കാന്‍ അനുവദിക്കണമെന്ന് ഇന്ത്യ ചൈനയോട് അഭ്യര്‍ത്ഥിച്ചു. ഇതുമായി ബന്ധപ്പെട്ട ഉഭയകക്ഷി ചര്‍ച്ചകള്‍ ഇരുരാജ്യങ്ങളും തമ്മില്‍ പുരോഗമിക്കുകയാണ്.
കഴിഞ്ഞ കുറച്ചുനാളുകളായി പാക്കിസ്ഥാന്‍ തങ്ങളുടെ വ്യോമാപാത ഇന്ത്യന്‍ വിമാനങ്ങള്‍ക്ക് വിലക്കിയിരിക്കുകയാണ്. ഇതോടെ യൂറോപ്പ്, വടക്കേ അമേരിക്ക അടക്കമുള്ള രാജ്യങ്ങളിലേക്ക് സര്‍വീസ് നടത്തുന്ന വിമാനങ്ങള്‍ക്ക് ദീര്‍ഘദൂരം ചുറ്റിവളഞ്ഞ് പറക്കേണ്ടി വരുന്നു. ഇത് യാത്രാസമയത്തില്‍ മണിക്കൂറുകളുടെ വര്‍ധനയുണ്ടാക്കുന്നതിനൊപ്പം അധിക ഇന്ധനച്ചെലവ് വരുത്താനും വിമാനക്കമ്പനികള്‍ക്ക് കനത്ത സാമ്പത്തിക ഭാരം ഉണ്ടാക്കാനും കാരണമായിട്ടുണ്ട്. വിമാന ടിക്കറ്റ് നിരക്കുകള്‍ വര്‍ധിക്കുന്നതിനും ഇത് വഴിവെച്ചു.
ഈ പശ്ചാത്തലത്തിലാണ് വിമാനങ്ങളുടെ റൂട്ട് കൂടുതല്‍ ലളിതവും എളുപ്പവുമാക്കാന്‍ ചൈനയിലെ സിന്‍ജിയാങ് വ്യോമപാത തുറന്നുനല്‍കണമെന്ന നിര്‍ദ്ദേശം കേന്ദ്ര സിവില്‍ വ്യോമായാന മന്ത്രി കെ. രാം മോഹന്‍ നായിഡുവും വിദേശകാര്യ മന്ത്രാലയവും ചൈനീസ് അധികൃതര്‍ക്ക് മുന്നില്‍ വെച്ചത്. ചൈന ഈ നിര്‍ദ്ദേശത്തിന് അനുകൂലമായ നിലപാട് സ്വീകരിക്കുകയാണെങ്കില്‍, പാക്കിസ്ഥാനെ പൂര്‍ണ്ണമായും ഒഴിവാക്കി ഇന്ത്യന്‍ വിമാനങ്ങള്‍ക്ക് സര്‍വീസ് നടത്താന്‍ സാധിക്കും.
Also Read:വടക്കൻ സസ്കാച്വാനിൽ വികസനക്കുതിപ്പ്: വോളസ്റ്റൺ ലേക്ക് എയർപോർട്ടിന് 1.16 കോടി ഡോളർ ധനസഹായം
ഇത് ദീര്‍ഘദൂര അന്താരാഷ്ട്ര സര്‍വീസുകളില്‍ സമയവും വലിയ തുകയുടെ ഇന്ധനവും ലാഭിക്കാന്‍ വിമാനക്കമ്പനികളെ സഹായിക്കുമെന്നാണ് വ്യോമയാന മേഖലയിലെ വിദഗ്ധരുടെ വിലയിരുത്തല്‍. കൂടാതെ യാത്രക്കാര്‍ക്ക് യാത്രാസമയത്തില്‍ വലിയ ആശ്വാസം ലഭിക്കുകയും ചെയ്യും.
അതിര്‍ത്തിയിലെ തര്‍ക്കങ്ങള്‍ക്കിടയിലും വ്യോമയാന മേഖലയിലെ ഈ സഹകരണം ഇരുരാജ്യങ്ങള്‍ക്കും ഗുണകരമാകുമെന്നാണ് കരുതപ്പെടുന്നത്. നിലവിലുള്ള നയതന്ത്ര ചര്‍ച്ചകളുടെ പുരോഗതിയും ചൈനയുടെ നിലപാടും അനുസരിച്ചാകും പുതിയ റൂട്ട് എന്ന് മുതല്‍ ലഭ്യമാകുമെന്ന കാര്യത്തില്‍ അന്തിമ തീരുമാനമുണ്ടാകുക.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
