മുംബൈ: ടി20 ലോകകപ്പിന്റെ ആവേശകരമായ സെമി ഫൈനൽ പോരാട്ടത്തിൽ ഇംഗ്ലണ്ടിനെ പരാജയപ്പെടുത്തി ഇന്ത്യ ഫൈനലിൽ. മുംബൈ വാങ്കഡെ സ്റ്റേഡിയത്തിൽ നടന്ന മത്സരത്തിൽ നിലവിലെ ചാമ്പ്യന്മാരായ ഇന്ത്യ ബാറ്റിങ്ങിലും ബോളിങ്ങിലും മികച്ചു നിന്നാണ് ഈ വിജയം പിടിച്ചെടുത്തത്. ടോസ് നഷ്ടപ്പെട്ട് ആദ്യം ബാറ്റിംഗിനിറങ്ങിയ ഇന്ത്യ നിശ്ചിത 20 ഓവറിൽ ഏഴ് വിക്കറ്റ് നഷ്ടത്തിൽ 253 റൺസെന്ന കൂറ്റൻ സ്കോറാണ് പടുത്തുയർത്തിയത്. ലോകകപ്പ് നോക്കൗട്ട് ചരിത്രത്തിലെ ഏറ്റവും ഉയർന്ന സ്കോർ എന്ന റെക്കോർഡും ഈ ഇന്നിംഗ്സിലൂടെ ഇന്ത്യ സ്വന്തമാക്കി.
മലയാളി താരം സഞ്ജു സാംസണിന്റെ വെടിക്കെട്ട് ബാറ്റിംഗാണ് ഇന്ത്യൻ ഇന്നിംഗ്സിന് കരുത്തായത്. 89 റൺസെടുത്ത സഞ്ജു സ്റ്റാർ പേസർ ജോഫ്ര ആർച്ചർ ഉൾപ്പെടെയുള്ളവരെ ഗ്രൗണ്ടിന് ചുറ്റും പായിച്ചു. ഓപ്പണർ അഭിഷേക് ശർമ്മ (9) നേരത്തെ പുറത്തായെങ്കിലും ഇഷാൻ കിഷൻ (39) സഞ്ജുവിന് മികച്ച പിന്തുണ നൽകി. തുടക്കം മുതൽ ആക്രമിച്ചു കളിച്ച ഇന്ത്യൻ ബാറ്റർമാർ ഇംഗ്ലണ്ട് ബൗളിംഗ് നിരയെ സമ്മർദ്ദത്തിലാഴ്ത്തി. കൂറ്റൻ വിജയലക്ഷ്യം പിന്തുടർന്നിറങ്ങിയ ഇംഗ്ലണ്ടിനായി യുവതാരം ജേക്കബ് ബെഥൽ സെഞ്ച്വറി നേടി പൊരുതിയെങ്കിലും മറ്റ് ബാറ്റർമാർക്ക് തിളങ്ങാനായില്ല.
നിർണ്ണായക ഘട്ടങ്ങളിൽ വിക്കറ്റുകൾ വീഴ്ത്തി ഇന്ത്യൻ ബൗളർമാർ മത്സരത്തിൽ പിടിമുറുക്കി. ക്യാപ്റ്റൻ ഹാരി ബ്രൂക്കിനെ (7) പുറത്താക്കാൻ അക്ഷർ പട്ടേൽ എടുത്ത അവിശ്വസനീയമായ ക്യാച്ച് മത്സരത്തിൽ നിർണ്ണായകമായി. പിന്നാലെ ജോസ് ബട്ട്ലറെ (25) വരുൺ ചക്രവർത്തി മടക്കിയതോടെ ഇംഗ്ലണ്ടിന്റെ പതനം പൂർണ്ണമായി. ജസ്പ്രീത് ബുംറയുടെ നേതൃത്വത്തിലുള്ള ഇന്ത്യൻ ബൗളിംഗ് നിര അവസാന ഓവറുകളിൽ കൃത്യത പാലിച്ചതോടെയാണ് ഇന്ത്യ ഫൈനൽ ടിക്കറ്റ് ഉറപ്പിച്ചത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/KdmCA708iUa8aT1Ocx1qs1?mode=gi_t
Sanju's batting brilliance on Mumbai soil! India shakes up Wankhede and enters final
