ഇൻസ്റ്റഗ്രാമിൽ സ്പാം അക്കൗണ്ടുകളും ബോട്ട് ഫോളോവേഴ്സും വർധിച്ചുവരുന്നത് സാധാരണക്കാരായ ഉപയോക്താക്കളുടെ സുരക്ഷയ്ക്ക് വലിയ ഭീഷണിയാണ്. ഒരു അക്കൗണ്ട് വ്യാജമാണോ എന്ന് തിരിച്ചറിയാൻ പ്രൊഫൈലിലെ ‘എബൗട്ട് ദിസ് അക്കൗണ്ട്’ (About this account) എന്ന ഓപ്ഷൻ പരിശോധിക്കാവുന്നതാണ്. പ്രൊഫൈലിൽ മുകളിൽ വലതുവശത്തുള്ള മൂന്ന് ഡോട്ടുകളിൽ ക്ലിക്ക് ചെയ്താൽ ഇത് ലഭ്യമാകും.
ഇതിലൂടെ ആ അക്കൗണ്ട് ഏത് രാജ്യത്താണ് നിർമ്മിച്ചത്, മുൻപ് എത്ര തവണ ഉപയോക്തൃനാമം (Username) മാറ്റിയിട്ടുണ്ട്, അക്കൗണ്ട് തുടങ്ങിയ തീയതി എന്നിവ അറിയാൻ സാധിക്കും. കുറഞ്ഞ സമയത്തിനുള്ളിൽ പലതവണ പേര് മാറ്റുകയോ, നൽകിയിരിക്കുന്ന വിവരങ്ങളുമായി ബന്ധമില്ലാത്ത രാജ്യങ്ങളിൽ നിന്നുള്ള അക്കൗണ്ടോ ആണെങ്കിൽ അത് വ്യാജമാകാൻ സാധ്യതയുണ്ട്.
പ്രൊഫൈലിലെ ഉള്ളടക്കവും ബയോയും (Bio) ശ്രദ്ധിക്കുന്നതിലൂടെയും വ്യാജന്മാരെ കണ്ടെത്താം. ഉദാഹരണത്തിന്, പ്രൊഫൈലിൽ ഒരു ബ്യൂട്ടി ബ്ലോഗർ ആണെന്ന് അവകാശപ്പെടുകയും എന്നാൽ അത്തരത്തിലുള്ള പോസ്റ്റുകൾ ഒന്നും ഇല്ലാതിരിക്കുകയും ചെയ്യുന്നത് ഒരു സൂചനയാണ്. യഥാർത്ഥ അക്കൗണ്ടുകളുടെ ബയോ കോപ്പി ചെയ്ത് അക്കങ്ങളോ ചിഹ്നങ്ങളോ ചേർത്ത് മാറ്റം വരുത്തിയവയും, അപൂർണ്ണമായ വിവരങ്ങൾ ഉള്ളതുമായ അക്കൗണ്ടുകൾ ബോട്ട് അക്കൗണ്ടുകളാകാം. പൊതുവായി ലഭ്യമായ സ്റ്റോക്ക് ചിത്രങ്ങൾ പ്രൊഫൈൽ ഫോട്ടോയായി ഉപയോഗിക്കുന്നതും അപ്രസക്തമായ ഹാഷ്ടാഗുകൾ പോസ്റ്റുകളിൽ നൽകുന്നതും ഇത്തരം സ്പാം അക്കൗണ്ടുകളുടെ രീതിയാണ്.
സ്പാം മെസേജുകൾ വഴി വ്യക്തിഗത വിവരങ്ങൾ ചോർത്തുന്ന ഫിഷിംഗ് രീതിക്കെതിരെയും ജാഗ്രത പാലിക്കണം. വിശ്വസിക്കാൻ കഴിയാത്ത വിധത്തിലുള്ള വമ്പിച്ച ഓഫറുകൾ, സമ്മാനങ്ങൾ ലഭിക്കുമെന്ന വാഗ്ദാനം, ഒരേ സമയം നിരവധി ആളുകൾക്ക് അയക്കുന്ന പൊതുവായ സന്ദേശങ്ങൾ എന്നിവ സ്പാം ആണെന്ന് ഉറപ്പിക്കാം. ഇത്തരം സന്ദേശങ്ങളിൽ നൽകിയിരിക്കുന്ന വെബ്സൈറ്റ് ലിങ്കുകളിൽ ക്ലിക്ക് ചെയ്യുന്നത് ഐഡന്റിറ്റി മോഷണത്തിന് ഇടയാക്കും. ഇത്തരം അക്കൗണ്ടുകൾ ശ്രദ്ധയിൽപ്പെട്ടാൽ ഉടൻ തന്നെ ബ്ലോക്ക് ചെയ്യാനും റിപ്പോർട്ട് ചെയ്യാനും ഉപയോക്താക്കൾ ശ്രദ്ധിക്കണം.
How to identify fake Instagram accounts? You can also block spam messages; Here are the ways!
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
