ഹൈവേ അടച്ചു, മാസ്ക് വിതരണം; കാട്ടുതീയിൽ വിറങ്ങലിച്ച് ലാബ്രഡോർ മേഖല,നൂറിലധികം പേരെ ഒഴിപ്പിച്ചു

ലാബ്രഡോർ സിറ്റി: ലാബ്രഡോർ സിറ്റിക്ക് സമീപം കാട്ടുതീ പടർന്നുപിടിച്ചതിനെത്തുടർന്ന് പ്രദേശം അതീവ ജാഗ്രതയിൽ. ലാബ്രഡോർ സിറ്റിയുടെ ഒൻപത് കിലോമീറ്റർ അകലെ ട്രാൻസ് ലാബ്രഡോർ ഹൈവേയ്ക്ക് സമീപം കാട്ടുതീ പടർന്നതോടെ വാൽഷ് റിവർ മേഖലയിലെ വീടുകളിൽ നിന്നും ക്യാബിനുകളിൽ നിന്നും നൂറിലധികം പേരെ അധികൃതർ അടിയന്തരമായി ഒഴിപ്പിച്ചു.

തിങ്കളാഴ്ച വൈകിട്ടോടെയാണ് മൂന്ന് പാർക്കുകളിലും പരിസരപ്രദേശങ്ങളിലും ഒഴിപ്പിക്കൽ നടപടികൾ ആരംഭിച്ചത്. പ്രീമിയർ ടോണി വെയ്‌കെഹാം സ്ഥിതിഗതികൾ നിരീക്ഷിച്ചുവരികയാണ്. ലാബ്രഡോർ വെസ്റ്റ് മേഖലയിലുള്ള ലബ്രഡോർ സിറ്റി, വാബുഷ് എന്നിവിടങ്ങളിലേക്കാണ് ഒഴിപ്പിക്കപ്പെട്ടവരെ മാറ്റിയത്. ഏകദേശം പതിനായിരത്തോളം പേർ താമസിക്കുന്ന ഈ മേഖലയിൽ കാട്ടുതീയെത്തുടർന്ന് അടിയന്തരാവസ്ഥ തുടരുകയാണ്. ബുധനാഴ്ച നിശ്ചയിച്ചിരുന്ന കാനഡ ഡേ ആഘോഷങ്ങൾ ലാബ്രഡോർ സിറ്റി അധികൃതർ റദ്ദാക്കി.

ന്യൂ ബ്രൺസ്‌വിക്ക് പ്രവിശ്യയിൽ നിന്നുള്ള ‘ബേർഡ് ഡോഗ്’ വിമാനങ്ങൾ ഉൾപ്പെടെ ഉപയോഗിച്ച് അഗ്നിശമന സേന തീയണക്കാൻ ഊർജിതമായ ശ്രമം തുടരുന്നുണ്ട്. ചൊവ്വാഴ്ച രാവിലെയോടെ തീ അണയ്ക്കുന്നതിൽ നേരിയ പുരോഗതി ഉണ്ടായിട്ടുണ്ടെന്ന് ലാബ്രഡോർ സിറ്റി അധികൃതർ ഫേസ്ബുക്കിലൂടെ അറിയിച്ചു. എങ്കിലും, നിലവിലെ സാഹചര്യത്തിൽ ഒഴിപ്പിക്കൽ ഉത്തരവും അടിയന്തരാവസ്ഥയും തുടരുമെന്ന് അധികൃതർ വ്യക്തമാക്കി. കൂടാതെ, ഡി മില്ലെ തടാകത്തിന് സമീപമുള്ള കാട്ടുതീ ഉൾപ്പെടെയുള്ള മറ്റ് നാല് അഗ്നിബാധകളും സേന നിരീക്ഷിച്ചുവരികയാണ്.

പുക മൂലം കാഴ്ച മങ്ങിയതിനെത്തുടർന്ന് ക്യുബെക്കിനും ലാബ്രഡോറിനും ഇടയിലുള്ള ഹൈവേ 389 ചൊവ്വാഴ്ച രാവിലെ അടച്ചു. ലാബ്രഡോർ സിറ്റിയിൽ താമസിക്കുന്നവർക്ക് മുൻകരുതലിന്റെ ഭാഗമായി എൻ-95 മാസ്കുകൾ വിതരണം ചെയ്യുന്നുണ്ട്. ബുധനാഴ്ചത്തെ അഗ്നിശമന പ്രവർത്തനങ്ങൾക്ക് ശേഷം ഒഴിപ്പിക്കൽ ഉത്തരവുകൾ പുനഃപരിശോധിക്കാനാണ് വനംവകുപ്പ് ഉദ്യോഗസ്ഥരുടെ തീരുമാനം. തീയണയ്ക്കാനുള്ള പ്രവർത്തനങ്ങൾ ഏകോപിപ്പിക്കുന്നതിനായി പ്രത്യേക ഇൻസിഡന്റ് മാനേജ്‌മെന്റ് ടീമിനെയും മേഖലയിൽ നിയോഗിച്ചിട്ടുണ്ട്.

കാട്ടുതീയുടെ ഗൗരവം കണക്കിലെടുത്ത് പ്രാദേശിക ഭരണകൂടം നൽകുന്ന നിർദ്ദേശങ്ങൾ കർശനമായി പാലിക്കാൻ താമസക്കാരോട് ആവശ്യപ്പെട്ടിട്ടുണ്ട്. വരും മണിക്കൂറുകളിൽ സ്ഥിതിഗതികളിൽ എന്ത് മാറ്റമാണ് ഉണ്ടാവുക എന്നത് കാത്തിരുന്നു കാണേണ്ടതുണ്ട്.

Highway closed, masks distributed; Labrador region ravaged by wildfires, more than 100 people evacuated

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt