ഹാലിഫാക്സ് : ഹാലിഫാക്സിൽ ഹലാൽ ഭക്ഷണങ്ങൾക്ക് ജനപ്രീതി ഏറുന്നു. കൂടുതൽ റെസ്റ്റോറന്റുകൾ തങ്ങളുടെ മെനുവിലേക്ക് ഹലാൽ ഭക്ഷണങ്ങൾ ഉൾപ്പെടുത്തുന്നത് കൂടുതൽ പേരിലേക്ക് എത്തിച്ചേരാൻ സഹായിക്കുന്നുണ്ട്. മുസ്ലീങ്ങൾക്ക് കഴിക്കാൻ അനുമതിയുള്ള ഭക്ഷണവിഭവങ്ങളാണ് ഹലാൽ എന്ന് അറിയപ്പെടുന്നത്. അറവ് രീതികളിലാണ് ഇതിന്റെ പ്രധാന വ്യത്യാസം വരുന്നത്. ദൈവനാമം ഉച്ചരിച്ചുകൊണ്ട് മൃഗങ്ങളെ അറുക്കുകയും, പന്നിക്കൊഴുപ്പ് പോലുള്ള മറ്റ് വസ്തുക്കൾ ഉപയോഗിക്കാതെ പാകം ചെയ്യുകയും ചെയ്യുമ്പോഴാണ് അത് ഹലാലായി മാറുന്നത്. ഷെഫ് അബോദ് കഫേ ആന്റ് കേറ്ററിംഗിന്റെ ഓപ്പറേഷൻസ് മാനേജറായ മൊഹമ്മദ് സദീയയാണ് ഇക്കാര്യങ്ങൾ വ്യക്തമാക്കിയത്. കേറ്ററിംഗ് രംഗത്ത് ഹലാൽ ഭക്ഷണങ്ങളെക്കുറിച്ച് അന്വേഷിക്കുന്നവരുടെ എണ്ണത്തിൽ വൻ വർദ്ധനവാണ് ഉണ്ടായിരിക്കുന്നതെന്നും അദ്ദേഹം പറഞ്ഞു.
കാനഡയിലെ ഈ മേഖലയിൽ ഹലാൽ ഉൽപ്പന്നങ്ങളുടെ ലഭ്യത വർദ്ധിച്ചുവരുന്നതിന്റെ ഭാഗമായി നവംബറിൽ അറ്റ്ലാന്റിക് ഹലാൽ എക്സ്പോയും അരങ്ങേറുന്നുണ്ട്. കഴിഞ്ഞ പത്ത് വർഷത്തിനിടയിൽ ഹലാൽ ഭക്ഷണങ്ങളുടെ ലഭ്യതയിൽ വലിയ വളർച്ചയുണ്ടായതായി എക്സ്പോയുടെ സഹസ്ഥാപകനായ ഒമർ ഖാർതാബിൽ വ്യക്തമാക്കി. മുൻകാലങ്ങളിൽ ഹലാൽ ഇറച്ചിക്കായി വിൻഡ്സർ വരെ ദീർഘദൂരം യാത്ര ചെയ്യേണ്ടി വന്നിരുന്നുവെന്നും എന്നാൽ ഇപ്പോൾ സ്ഥിതി മാറിയിട്ടുണ്ടെന്നും അദ്ദേഹം പറഞ്ഞു. ഹലാൽ ഉൾപ്പെടെയുള്ള ഡയറ്റ് ആവശ്യങ്ങൾ നിറവേറ്റുന്നത് വലിയൊരു വിപണി സാധ്യതയാണ് തുറന്നുനൽകുന്നതെന്നും ഇത് റെസ്റ്റോറന്റുകളെ കൂടുതൽ ഉൾക്കൊള്ളൽ ഉള്ളവയാക്കി മാറ്റുമെന്നും അദ്ദേഹം കൂട്ടിച്ചേർത്തു.
ഈ ലക്ഷ്യത്തോടെയാണ് ബെഡ്ഫോർഡിൽ ആർസു ഇന്ത്യൻ ക്യുസിൻ പോലുള്ള പുതിയ റെസ്റ്റോറന്റുകൾ രംഗത്തിറങ്ങിയിരിക്കുന്നത്. കഴിഞ്ഞ ആഗസ്റ്റ് തുടക്കത്തിൽ പ്രവർത്തനമാരംഭിച്ച ഈ റെസ്റ്റോറന്റ് ഹലാൽ മെനു ഉറപ്പുനൽകുന്നുണ്ട്. ഹാലിഫാക്സ് ഡൗൺടൗണിൽ 2023-ൽ ആരംഭിച്ച യിലാൻ ചൈനീസ് ഹലാൽ റെസ്റ്റോറന്റിൽ ഭക്ഷണത്തോടൊപ്പം പ്രാർത്ഥനയ്ക്കായി പ്രത്യേക മുറിയും ഒരുക്കിയിട്ടുണ്ട്.
ജനങ്ങളുടെ ആവശ്യപ്രകാരം 2025-ൽ വീണ്ടും തുറന്ന എഫെസ് ടർക്കിഷ് ക്യുസിൻ പോലുള്ള സ്ഥാപനങ്ങൾ തങ്ങളുടെ പരമ്പരാഗത ഭക്ഷണങ്ങൾ എല്ലാവരിലേക്കും എത്തിക്കുകയെന്ന ലക്ഷ്യത്തോടെയാണ് പ്രവർത്തിക്കുന്നത്. അതേസമയം, ഹലാൽ ഉൽപ്പന്നങ്ങൾ ലഭ്യമാക്കുന്നതിൽ ചില വെല്ലുവിളികളും നിലനിൽക്കുന്നുണ്ട്. പ്രവിശ്യയ്ക്ക് പുറത്തുനിന്ന് ഇറക്കുമതി ചെയ്യേണ്ടി വരുന്നത് കാരണം ചിലപ്പോഴൊക്കെ ചെലവ് വർദ്ധിക്കാറുണ്ട്. ഹലാൽ ഉൽപ്പന്നങ്ങൾ കൂടുതൽ സുലഭവും താങ്ങാനാവുന്നതുമാക്കുകയാണ് അറ്റ്ലാന്റിക് ഹലാൽ എക്സ്പോയുടെ ലക്ഷ്യമെന്ന് സംഘാത്തകർ വ്യക്തമാക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
