ടൊറന്റോ: കാനഡയിലെ അതിസമ്പന്ന കുടുംബങ്ങളിൽ പകുതിയോളവും താമസിക്കുന്നത് ഒരൊറ്റ പ്രവിശ്യയിലെന്ന് പുതിയ പഠന റിപ്പോർട്ട്. രാജ്യത്തെ ഏറ്റവും വലിയ പ്രവിശ്യകളിലൊന്നായ ഒന്റാറിയോയിലാണ് കാനഡയിലെ ഏറ്റവും വലിയ പണക്കാർ കേന്ദ്രീകരിച്ചിരിക്കുന്നത്. കാനഡയിലാകെ 86 ശതകോടീശ്വര കുടുംബങ്ങളുള്ളതിൽ 38 ഉം (ഏകദേശം 44 ശതമാനം) ഒന്റാറിയോയിലാണെന്ന് ലാഭേച്ഛയില്ലാതെ പ്രവർത്തിക്കുന്ന ‘കാനേഡിയൻസ് ഫോർ ടാക്സ് ഫെയർനസ്’ എന്ന സംഘടന പുറത്തുവിട്ട റിപ്പോർട്ടിൽ വ്യക്തമാക്കുന്നു. ഇവിടെയുള്ള അതിസമ്പന്നരായ 0.01 ശതമാനം കുടുംബങ്ങളുടെ ശരാശരി ആസ്തി 54.6 കോടി ഡോളറാണെന്നും (ഏകദേശം 546 മില്യൺ ഡോളർ) റിപ്പോർട്ട് ചൂണ്ടിക്കാണിക്കുന്നു.
കാനഡയിലെ പ്രധാന പ്രവിശ്യകളായ ഒന്റാറിയോ, ക്യൂബെക്ക്, ആൽബർട്ട, ബ്രിട്ടീഷ് കൊളംബിയ എന്നിവടങ്ങളിലെയും മറ്റ് മേഖലകളിലെയും അതിസമ്പന്ന കുടുംബങ്ങളുടെ ആസ്തി വിവരങ്ങൾ വിശകലനം ചെയ്താണ് സംഘടന ഈ റിപ്പോർട്ട് തയ്യാറാക്കിയത്. കാനഡയിലാകെ 10 കോടി ഡോളറിലധികം ആസ്തിയുള്ള 3,380 കുടുംബങ്ങളുണ്ട്. ഇതിൽ 1,600 കുടുംബങ്ങളും ഒന്റാറിയോയിലാണ് താമസം.
ആസ്തിയുടെ കാര്യത്തിൽ ബ്രിട്ടീഷ് കൊളംബിയയിലെ അതിസമ്പന്നർ (50.1 കോടി ഡോളർ) രണ്ടാം സ്ഥാനത്തും, ക്യൂബെക്ക് (40.8 കോടി ഡോളർ), ആൽബർട്ട (39.3 കോടി ഡോളർ) എന്നിവർ അടുത്ത സ്ഥാനങ്ങളിലുമുണ്ട്. ഭൂമി, പാർപ്പിട സമുച്ചയങ്ങൾ, ഓഹരി നിക്ഷേപങ്ങൾ, ഇൻഷുറൻസ്, പെൻഷൻ എന്നിവയെല്ലാം കണക്കാക്കിയാണ് കുടുംബങ്ങളുടെ മൊത്തം ആസ്തി നിർണ്ണയിച്ചിരിക്കുന്നത്.
അതിസമ്പന്നരുടെ എണ്ണത്തിൽ ഒന്റാറിയോ മുന്നിലാണെങ്കിലും മറുവശത്ത് കടുത്ത ദാരിദ്ര്യവും ഈ പ്രവിശ്യ നേരിടുന്നുണ്ടെന്ന് റിപ്പോർട്ട് മുന്നറിയിപ്പ് നൽകുന്നു. ഒന്റാറിയോയിൽ മാത്രം പത്തൊൻപത് ലക്ഷത്തിലധികം ആളുകളാണ് ദാരിദ്ര്യരേഖയ്ക്ക് താഴെ ജീവിക്കുന്നത്. കാനഡയിലെ ജനസംഖ്യ കൂടിയ മേഖലയായതിനാലാണ് ഒന്റാറിയോയിൽ ഈ രണ്ട് അവസ്ഥകളും പ്രകടമാകുന്നതെന്ന് ഗവേഷകർ പറയുന്നു. എന്നാൽ, സമ്പത്ത് ചിലരിൽ മാത്രം കേന്ദ്രീകരിക്കുന്നത് അവർക്ക് അമിത അധികാരം ലഭിക്കുന്നതിനും ജനാധിപത്യ പ്രക്രിയ ദുർബലമാകുന്നതിനും കാരണമാകുമെന്ന് റിപ്പോർട്ട് ആശങ്ക പ്രകടിപ്പിക്കുന്നു. കാനഡ ഉൾപ്പെടെയുള്ള ലോകരാജ്യങ്ങൾ ഇപ്പോൾ നേരിടുന്ന ഏറ്റവും വലിയ പ്രതിസന്ധി ഇതാണെന്ന് സംഘടനയുടെ എക്സിക്യൂട്ടീവ് ഡയറക്ടർ ജാരെഡ് വാക്കർ വ്യക്തമാക്കി.
രാജ്യത്തെ സാമ്പത്തിക അസമത്വം ഇല്ലാതാക്കാൻ അതിസമ്പന്നർക്ക് മേൽ ‘വെൽത്ത് ടാക്സ്’ അഥവാ ആസ്തി നികുതി ചുമത്തണമെന്നാണ് റിപ്പോർട്ടിലെ പ്രധാന ശുപാർശ. ഇത് വരുമാന നികുതിക്ക് പുറമെ, വ്യക്തികളുടെ ഭൂമി, ഓഹരി തുടങ്ങിയ സമ്പാദ്യങ്ങൾക്ക് മേൽ ചുമത്തുന്ന നികുതിയാണ്. 1 കോടി ഡോളറിന് മുകളിൽ ആസ്തിയുള്ളവർക്ക് ഒരു ശതമാനവും, 5 കോടിക്ക് മുകളിലുള്ളവർക്ക് രണ്ട് ശതമാനവും നികുതി ഏർപ്പെടുത്താനാണ് നിർദ്ദേശം. ഒന്റാറിയോയിൽ മാത്രം ഇത് നടപ്പിലാക്കിയാൽ പ്രതിവർഷം 1800 കോടി ഡോളർ അധിക വരുമാനം കണ്ടെത്താൻ സർക്കാരിന് സാധിക്കും. അമേരിക്കയിലെ മസാചുസെറ്റ്സ്, കാലിഫോർണിയ തുടങ്ങിയ സംസ്ഥാനങ്ങൾ ഇതിനോടകം തന്നെ ഇത്തരം വലിയ നികുതി പരിഷ്കാരങ്ങൾ നടപ്പിലാക്കാനും ആലോചിക്കാനും തുടങ്ങിയിട്ടുണ്ട്. കാനഡയിലും കേന്ദ്ര-പ്രവിശ്യാ തലങ്ങളിൽ ഈ ചർച്ചകൾ അടിയന്തരമായി ആരംഭിക്കേണ്ടതുണ്ടെന്നും വാക്കർ ഓർമ്മിപ്പിച്ചു.
Half of Canada's millionaires live in one province; Shocking figures revealed
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
