2026 ഫിഫ ലോകകപ്പിൽ നോർവേയുടെ മുന്നേറ്റത്തിനൊപ്പം ഏറ്റവും കൂടുതൽ ചർച്ചയാകുന്ന പേരുകളിലൊന്നാണ് എർലിങ് ഹാളണ്ട്. പ്രീക്വാർട്ടറിൽ ബ്രസീലിയെ 2-1ന് കീഴടക്കി ക്വാർട്ടർ ഫൈനലിലെത്തിയ നോർവേ ഇനി ഇംഗ്ലണ്ടിനെ നേരിടാൻ ഒരുങ്ങുമ്പോൾ, ഹാളണ്ടിന്റെ ഗോൾവേട്ട മാത്രമല്ല ആരാധകരുടെ ശ്രദ്ധ പിടിച്ചുപറ്റുന്നത്. പിന്നിലേക്ക് കെട്ടിയിരിക്കുന്ന സ്വർണനിറമുള്ള പോണിടെയിൽ ഹെയർസ്റ്റൈലും ലോകമെമ്പാടും വലിയ ശ്രദ്ധ നേടുകയാണ്. മൈതാനത്തെ പ്രകടനത്തിനൊപ്പം സ്വന്തം വ്യക്തിത്വത്തെ ശക്തമായ ബ്രാൻഡാക്കി മാറ്റുന്നതിലും ഹാളണ്ട് വേറിട്ട മാതൃക സൃഷ്ടിച്ചിരിക്കുകയാണ്.
ഈ ഹെയർസ്റ്റൈലിന് പിന്നിൽ കൃത്യമായ ബിസിനസ് ചിന്തയുമുണ്ട്. നോർവെയിലെ ഹെയർ ബാൻഡ് നിർമ്മാതാക്കളായ ബോൺ ഡെപ്പിന്റെ ‘ക്നെക്കി’ ബ്രാൻഡിൽ ഹാളണ്ട് 2024ൽ ഓഹരി സ്വന്തമാക്കിയിരുന്നു. മത്സരങ്ങളിൽ സ്ഥിരമായി ഉപയോഗിച്ചിരുന്ന അതേ ഹെയർ ബാൻഡുകളെയാണ് പിന്നീട് ‘ഹാളണ്ട് എഡിഷൻ’ എന്ന പേരിൽ പ്രത്യേക പതിപ്പായി കമ്പനി വിപണിയിലെത്തിച്ചത്. ഹാളണ്ടിന്റെ ജേഴ്സിയുടെ നിറങ്ങളിൽ രൂപകൽപ്പന ചെയ്ത ലിമിറ്റഡ് എഡിഷൻ ബാൻഡുകൾ പുറത്തിറങ്ങിയ ഉടൻ വിറ്റുതീർന്നതായി റിപ്പോർട്ടുകളുണ്ട്. ഇതോടെ കമ്പനിയുടെ വെബ്സൈറ്റ് സന്ദർശകരുടെ എണ്ണം ഗണ്യമായി ഉയരുകയും സോഷ്യൽ മീഡിയയിൽ പതിനായിരത്തിലധികം പുതിയ ഫോളോവേഴ്സിനെ നേടുകയും ചെയ്തു. ഇതിനൊപ്പം ഈ വർഷം ‘ക്ലിയർ മെൻ’ ഷാംപൂവിന്റെ ആഗോള ബ്രാൻഡ് അംബാസഡറായും ഹാളണ്ട് തിരഞ്ഞെടുക്കപ്പെട്ടു.
സാധാരണ പരസ്യങ്ങളിൽ മാത്രം ഒതുങ്ങാതെ, താൻ യഥാർത്ഥത്തിൽ ഉപയോഗിക്കുന്ന ഉൽപ്പന്നങ്ങളെ സ്വന്തം വ്യക്തിത്വവുമായി ബന്ധിപ്പിച്ചാണ് ഹാളണ്ടിന്റെ മാർക്കറ്റിങ് സമീപനം. മൈതാനത്തെ പ്രകടനം, വ്യത്യസ്തമായ രൂപം, സോഷ്യൽ മീഡിയയിലെ ജനപ്രീതി, ലോകകപ്പ് പോലുള്ള ആഗോള വേദി എന്നിവയെ ഒരുമിച്ച് പ്രയോജനപ്പെടുത്തി അദ്ദേഹം വ്യക്തിഗത ബ്രാൻഡിന്റെ മൂല്യം ഉയർത്തുകയാണ്. ആരാധകർക്ക് തിരിച്ചറിയാൻ എളുപ്പമുള്ള തന്റെ പോണിടെയിൽ ഇന്ന് ഒരു ഫാഷൻ സിഗ്നേച്ചർ മാത്രമല്ല, കോടികളുടെ വാണിജ്യസാധ്യത സൃഷ്ടിക്കുന്ന ശക്തമായ ബ്രാൻഡ് ഇമേജായി മാറിയെന്നാണ് മാർക്കറ്റിങ് രംഗത്തെ വിലയിരുത്തൽ.
Haaland's ponytail is no longer just a style statement; his golden locks have become a multi-million-dollar brand.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
