ഗ്രോസ് മോർൺ: ഗ്രോസ് മോർൺ നാഷണൽ പാർക്ക് മേഖലയിലെ വിനോദസഞ്ചാര വികസനത്തിനും പ്രാദേശിക വ്യവസായങ്ങൾക്കുമായി ഫെഡറൽ സർക്കാർ 3.7 മില്യൺ ഡോളറിന്റെ സാമ്പത്തിക സഹായം പ്രഖ്യാപിച്ചു. കനേഡിയൻ പാർലമെന്ററി സെക്രട്ടറി കോഡി ബ്ലോയിസാണ് വ്യാഴാഴ്ച പദ്ധതി സംബന്ധിച്ച വിവരങ്ങൾ ഔദ്യോഗികമായി അറിയിച്ചത്. മേഖലയിലെ ടൂറിസം സാധ്യതകൾ വർദ്ധിപ്പിക്കുന്നതിനൊപ്പം പ്രാദേശികമായി ഉൽപ്പാദിപ്പിക്കുന്ന ഭക്ഷണസാധനങ്ങൾ വിനോദസഞ്ചാരികളിലേക്ക് എത്തിക്കാനും സാമ്പത്തിക വളർച്ച ഉറപ്പാക്കാനുമാണ് ഈ പദ്ധതിയിലൂടെ സർക്കാർ ലക്ഷ്യമിടുന്നത്.
അനുവദിച്ച തുകയിൽ 2 മില്യൺ ഡോളറിലധികം തുക നോറിസ് പോയിന്റിൽ ഒരു പ്രകൃതിദത്ത ഭക്ഷണ-സാംസ്കാരിക കേന്ദ്രം (Culinary and Cultural Hub) നിർമ്മിക്കുന്നതിനായി ഗ്രോസ് മോർൺ കോഓപ്പറേറ്റീവ് അസോസിയേഷന് നൽകും. നിലവിലുള്ള ഫാർമേഴ്സ് മാർക്കറ്റ് വികസിപ്പിക്കാനും പുതിയ വാണിജ്യ അടുക്കള നിർമ്മിക്കാനും പ്രാദേശിക കർഷകരെ പ്രോത്സാഹിപ്പിക്കാനും ഇത് ഉപയോഗിക്കും. വരും ശരത്കാലത്തോടെ നിർമ്മാണം ആരംഭിച്ച് അടുത്ത സീസണിന് മുന്നോടിയായി പ്രവർത്തനം ആരംഭിക്കാനാണ് ഉദ്ദേശിക്കുന്നത്. കൂടാതെ, ടൂറിസം മാർക്കറ്റിംഗിനായി 715,000 ഡോളറും ജീവനക്കാരുടെ പരിശീലനങ്ങൾക്കായി ഗ്രോസ് മോർൺ ഇൻസ്റ്റിറ്റ്യൂട്ടിന് 1 മില്യൺ ഡോളറും കൈമാറും.
വാർത്താ പ്രഖ്യാപനത്തിന് പിന്നാലെ പ്രധാനമന്ത്രി മാർക്ക് കാർണി വെള്ളി, ശനി ദിവസങ്ങളിൽ ഗ്രോസ് മോർൺ നാഷണൽ പാർക്ക് സന്ദർശിച്ചു. പ്രദേശത്തിന്റെ സ്വാഭാവിക ഭംഗിയെ പ്രശംസിച്ച അദ്ദേഹം, വിനോദസഞ്ചാരികളെ ആകർഷിക്കുന്നതിനായി ‘കാനഡ സ്ട്രോംഗ് പാസ്’ പദ്ധതി പ്രചരിപ്പിക്കുകയും ചെയ്തു. സെപ്റ്റംബർ 7 വരെ പാർക്സ് കാനഡ കേന്ദ്രങ്ങളിൽ രാജ്യത്തെ പൗരന്മാർക്കും വിനോദസഞ്ചാരികൾക്കും പ്രവേശന ഇളവുകളും ആനുകൂല്യങ്ങളും ലഭ്യമാകുന്ന പദ്ധതിയാണിത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Gros Morne National Park Development: Federal Government Approves $3.7 Million
