സാസ്കറ്റൂൺ: ഒട്ടും പ്രതീക്ഷിക്കാത്ത നിമിഷങ്ങളിലൂടെയാണ് ചില യാത്രാനുഭവങ്ങൾ കടന്നുപോകുന്നത്. അത്തരത്തിൽ കാനഡയിലെ സാസ്കറ്റൂണിൽ നാല് പെൺകുട്ടികൾ നടത്തിയ ഒരർദ്ധരാത്രി യാത്ര ഇപ്പോൾ ഒരു നാടിന്റെയാകെ പ്രശംസ ഏറ്റുവാങ്ങുകയാണ്. കൺമുന്നിൽ ആളിപ്പടർന്ന തീയിലേക്ക് ഒട്ടും ഭയമില്ലാതെ ഓടിക്കയറി 89 വയസ്സുകാരനായ വയോധികന്റെ ജീവൻ രക്ഷിച്ച ഈ 19-കാരികളാണ് ഇപ്പോൾ വാർത്തകളിലെ താരങ്ങൾ. എല്ല ലൂക്കാസ്, ആംബർ ഹാർപ്പർ, കെയ്സി പെൻറോഡ്, കെയ്ലി ഫോക്ക് എന്നിവരുടെ സമയോചിതമായ ഇടപെടലാണ് ഒരു വലിയ ദുരന്തം ഒഴിവാക്കിയത്.
കഴിഞ്ഞ ബുധനാഴ്ച രാത്രി 12.45-ഓടെയാണ് സംഭവം. സുഹൃത്തുക്കളായ നാല് പെൺകുട്ടികളും കാറിൽ ഒന്നിച്ച് വീട്ടിലേക്ക് മടങ്ങുകയായിരുന്നു. സ്മിത്ത് ക്രസന്റിലെ ഒരു വീടിന്റെ മുകൾനിലയിൽ നിന്നും ശക്തമായ തീയും പുകയും ഉയരുന്നത് കാറിലുണ്ടായിരുന്ന കെയ്സി പെൻറോഡിന്റെ ശ്രദ്ധയിൽപ്പെടുന്നത് അപ്പോഴാണ്. സമയം ഒട്ടും കളയാതെ ഇവർ വണ്ടി ആ തെരുവിലേക്ക് തിരിച്ചുവിട്ടു. തുടർന്ന് ഒരേസമയം കൃത്യമായ ആസൂത്രണത്തോടെ നാലുപേരും നാല് വഴിക്കായി തിരിഞ്ഞു. ഒരാൾ ഉടൻ തന്നെ അടിയന്തര സഹായത്തിനായി 911 എന്ന നമ്പറിലേക്ക് വിളിച്ച് വിവരമറിയിച്ചു. മറ്റൊരാൾ ഫസ്റ്റ് റെസ്പോണ്ടർമാരെ കാത്തുനിൽക്കാനായി റോഡിൽ നിന്നു. ഈ സമയം എല്ലയും ആംബറും നേരെ വീടിന് നേരെ ഓടുകയായിരുന്നു.
“ഞങ്ങൾ കാറിൽ നിന്നും ഇറങ്ങി നേരെ ആ വീട്ടിലേക്കും അയൽപക്കങ്ങളിലേക്കും ഓടി ചെന്ന് വാതിലുകളിൽ ശക്തമായി മുട്ടുകയായിരുന്നു. ഉള്ളിലുള്ളവരെ എങ്ങനെയെങ്കിലും പുറത്തെത്തിക്കുക മാത്രമായിരുന്നു ലക്ഷ്യം,” എല്ല ലൂക്കാസ് ആ നിമിഷങ്ങൾ ഓർത്തെടുത്തു. പെൺകുട്ടികൾ നിരന്തരം ഡോർബെല്ലടിക്കുകയും വാതിലിൽ മുട്ടുകയും ചെയ്തതോടെയാണ് വീട്ടുടമസ്ഥനായ 89-കാരൻ താഴേക്ക് വന്നത്. ഈ സമയം മുകൾനില പൂർണ്ണമായും കത്തിയമരുന്ന വിവരം അദ്ദേഹം അറിഞ്ഞിരുന്നില്ല. മരുന്ന് കഴിക്കാനായി എഴുന്നേറ്റതുകൊണ്ട് മാത്രമാണ് അദ്ദേഹം ശബ്ദം കേട്ട് വാതിൽ തുറന്നത്. അദ്ദേഹം ഉറക്കത്തിലായിരുന്നെങ്കിൽ സംഭവിക്കുമായിരുന്ന ദുരന്തം ചിന്തിക്കാൻ പോലുമാകില്ലെന്ന് പെൺകുട്ടികൾ പറയുന്നു.
വയോധികനെ സുരക്ഷിതമായി പുറത്തെത്തിച്ചെങ്കിലും, തന്റെ കുടുംബാംഗങ്ങളുടെ ഓർമ്മകളും വിലപ്പെട്ട രേഖകളും സൂക്ഷിച്ചിരുന്ന അലമാര കത്തിയമരുന്നത് അദ്ദേഹത്തിന് താങ്ങാനായില്ല. ആ വയോധികന്റെ കണ്ണീര് കണ്ട എല്ല ലൂക്കാസ് വീണ്ടും ആളിപ്പടരുന്ന തീക്കുള്ളിലേക്ക് ഓടിക്കയറി. ഉള്ളിൽ നിന്നും കുടുംബചിത്രങ്ങളും വസ്ത്രങ്ങളും മരുന്നുകളും വാരിയെടുത്ത് അവൾ പുറത്തേക്ക് ഓടിവന്നു. രണ്ടു മിനിറ്റിനുശേഷം വീടിന്റെ മുൻപിലിരുന്ന കാറിലേക്ക് തീ പടരാൻ സാധ്യതയുണ്ടെന്ന് മനസ്സിലാക്കിയ എല്ല, വീണ്ടും അകത്തു കയറി കാറിന്റെ താക്കോലെടുത്ത് വണ്ടി സുരക്ഷിത സ്ഥാനത്തേക്ക് മാറ്റിയിടുകയും ചെയ്തു.
പെൺകുട്ടികളുടെ ഈ ധീരതയെ മാതാപിതാക്കളും നാട്ടുകാരും ഹീറോകളെന്ന് വിളിച്ച് അഭിനന്ദിക്കുകയാണ്. എന്നാൽ തങ്ങൾ ഒരു അടിയന്തര ഘട്ടത്തിൽ ചെയ്യേണ്ട ചുമതല മാത്രമാണ് ചെയ്തതെന്നാണ് ഈ സുഹൃത്തുക്കളുടെ നിലപാട്. വെള്ളിയാഴ്ച ഇവർ വീണ്ടും ആ വയോധികനെ സന്ദർശിക്കുകയും അദ്ദേഹത്തിന് ആവശ്യമായ എല്ലാ പിന്തുണയും ഉറപ്പുനൽകുകയും ചെയ്തു. സംഭവത്തിൽ സാസ്കറ്റൂൺ ഫയർ ഡിപ്പാർട്ട്മെന്റ് അന്വേഷണം ആരംഭിച്ചിട്ടുണ്ട്. അല്പം വൈകിയിരുന്നെങ്കിൽ വലിയൊരു ജീവഹാനി സംഭവിക്കുമായിരുന്ന ദുരന്തത്തെയാണ് ഈ നാല് പെൺകുട്ടികൾ തങ്ങളുടെ ധീരതകൊണ്ട് തോൽപ്പിച്ചത്.
Girls risked their lives to run into a burning house twice; 19-year-old's timely intervention saved the elderly man
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
