ബർലിൻ: മെച്ചപ്പെട്ട വിദ്യാഭ്യാസ സൗകര്യങ്ങളും ജീവനക്കാരുടെ വർധിച്ചുവരുന്ന ജീവിതച്ചെലവുകൾക്ക് പരിഹാരവും ആവശ്യപ്പെട്ട് ജർമ്മനിയിൽ വൻ യുവജന പ്രക്ഷോഭം. ശനിയാഴ്ച നടക്കാനിരിക്കുന്ന പ്രതിഷേധ പ്രകടനങ്ങളിൽ രാജ്യത്തുടനീളമുള്ള മുപ്പതിലധികം നഗരങ്ങളിലായി 1,60,000-ത്തിലധികം ആളുകൾ അണിനിരക്കുമെന്ന് സംഘാടകർ അറിയിച്ചു. യൂറോപ്പിലെ മറ്റ് രാജ്യങ്ങളിൽ പടർന്നുപിടിച്ച Gen Z പ്രക്ഷോഭങ്ങളുടെ തുടർച്ചയായാണ് ജർമ്മനിയെയും ഇളക്കിമറിച്ച് യുവജനങ്ങൾ തെരുവിലിറങ്ങുന്നത്.
‘Gen Z regelt’ എന്ന പ്രചാരണ കൂട്ടായ്മയുടെ നേതൃത്വത്തിലാണ് ബർലിൻ, ഫ്രാങ്ക്ഫർട്ട്, മ്യൂണിക് തുടങ്ങിയ 34 പ്രമുഖ നഗരങ്ങളിൽ റാലികൾ സംഘടിപ്പിച്ചിരിക്കുന്നത്. നിർബന്ധിത സൈനിക സേവനത്തിനെതിരെ രംഗത്തുവന്ന പ്രസ്ഥാനം, ജീവിതച്ചെലവ് വർധിക്കുന്ന പശ്ചാത്തലത്തിൽ വിദ്യാഭ്യാസ മേഖലയിൽ കൂടുതൽ നിക്ഷേപം നടത്തണമെന്നും ആവശ്യപ്പെടുന്നുണ്ട്. എന്നാൽ ഈ പ്രക്ഷോഭത്തിന് പിന്നിൽ മറ്റ് രാഷ്ട്രീയ ലക്ഷ്യങ്ങളുണ്ടോയെന്ന സംശയങ്ങളും ഉയർന്നിട്ടുണ്ട്. വിദ്യാർത്ഥികളുടെ ആവശ്യങ്ങളോട് യോജിക്കുമ്പോഴും നവംബർ 20-ന് പ്രത്യേക പ്രതിഷേധം നടത്തുമെന്നും ‘ജെൻ സി റഗൽറ്റി’ൽ നിന്ന് അകലം പാലിക്കുമെന്നും ജർമ്മൻ സ്കൂൾ വിദ്യാർത്ഥികളുടെ കേന്ദ്ര സംഘടനയായ ബി.എസ്.കെ വ്യക്തമാക്കി.
ഹാലോവൻ ആഘോഷങ്ങൾക്കിടെ നടക്കുന്ന പ്രകടനങ്ങൾ പൊതുവേ സമാധാനപരമായിരിക്കുമെന്നാണ് കരുതുന്നതെങ്കിലും, തീവ്രവാദ ഗ്രൂപ്പുകൾ ഈ സാഹചര്യം മുതലെടുക്കാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകിയിട്ടുണ്ട്. ഇടത് സംഘടനകളും വിദേശ രാജ്യങ്ങളുമായി ബന്ധമുള്ള ചില തീവ്രവാദ ഗ്രൂപ്പുകളും പ്രക്ഷോഭകരെ സംഘടിപ്പിക്കാൻ ശ്രമിക്കുന്നുണ്ടെന്ന് ഫെഡറൽ ആഭ്യന്തര മന്ത്രാലയം വെളിപ്പെടുത്തി. ഫ്രാൻസിൽ അടുത്തിടെയുണ്ടായ പ്രക്ഷോഭങ്ങൾക്ക് സമാനമായി കൊള്ളയടിക്കലും ആക്രമണങ്ങളും നടക്കാൻ സാധ്യതയുണ്ടെന്ന ആശങ്കയെത്തുടർന്ന് ബർലിനിലെ പ്രശസ്തമായ കുർഫർസ്റ്റെൻഡാം ഷോപ്പിംഗ് മേഖലയിലെ പ്രമുഖ ലക്ഷ്വറി ഷോപ്പുകൾ പലതും മുൻകരുതലായി ജനലുകളും വാതിലുകളും മരപ്പലകകൾ കൊണ്ട് അടച്ചുപൂട്ടിയിരിക്കുകയാണ്.
യൂറോപ്പിലെ ഏറ്റവും വലിയ സാമ്പത്തിക ശക്തിയായ ജർമ്മനി, സാമ്പത്തിക മാന്ദ്യവും പെൻഷൻ വെട്ടിക്കുറയ്ക്കലും പൊതുസേവന പ്രതിസന്ധിയും നേരിടുന്ന സാഹചര്യത്തിലാണ് യുവാക്കൾ തെരുവിലിറങ്ങുന്നത്. “ഞങ്ങളുടെ ആശങ്കകൾ പരിഗണിക്കുന്നതിന് പകരം സാമ്പത്തികമായി വെട്ടിക്കുറക്കലുകൾ നടത്തി കൂടുതൽ ഭാരം ഞങ്ങളുടെ തലയിൽ അടിച്ചേൽപ്പിക്കുകയാണ് സർക്കാർ ചെയ്യുന്നത്,” എന്ന് ചാൻസലർ ഫ്രീഡ്രിഷ് മെർസിനെ ലക്ഷ്യമിട്ട് മ്യൂണിക്കിലെ റാലിയിൽ വച്ച് 18-കാരനായ സ്റ്റീവ് ആരോപിച്ചു. തങ്ങളുടെ ആവശ്യങ്ങൾ അംഗീകരിക്കുന്നത് വരെ ജനാധിപത്യപരമായ പ്രതിഷേധങ്ങളിൽ നിന്ന് പിന്നോട്ടില്ലെന്നും യുവനേതാക്കൾ വ്യക്തമാക്കി.
ബർലിൻ സാങ്കേതിക സർവകലാശാലയിലെ കെട്ടിടങ്ങളുടെ ജീർണാവസ്ഥയും മോശം പഠനാന്തരീക്ഷവും ചൂണ്ടിക്കാട്ടിയാണ് താൻ പ്രക്ഷോഭത്തിൽ പങ്കാളിയാകുന്നതെന്ന് ടെക്നിക്കൽ യൂണിവേഴ്സിറ്റി വിദ്യാർത്ഥിയായ ഷോൺ ബേക്കർ പറഞ്ഞു. യൂറോപ്പിലുടനീളം വ്യാപിക്കുന്ന യുവജന പ്രക്ഷോഭങ്ങളുടെ പ്രതിഫലനമാണ് ഇപ്പോൾ ജർമ്മനിയിലും ദൃശ്യമാകുന്നത്. നേരത്തെ സെർബിയയിൽ വിദ്യാർത്ഥി പ്രക്ഷോഭത്തെത്തുടർന്ന് ഭരണം മാറ്റപ്പെടുകയും ഫ്രാൻസിൽ വൻതോതിലുള്ള അക്രമസംഭവങ്ങൾ അരങ്ങേറുകയും ചെയ്തിരുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
