ഒട്ടാവ : എൻജിൻ കമ്പാർട്ട്മെന്റിലെ വയറിംഗ് ഹാർനസിൽ ഷോർട്ട് സർക്യൂട്ട് ഉണ്ടാകാനും തീപിടിത്തത്തിന് കാരണമാകാനും സാധ്യതയുള്ളതിനാൽ 36,000 ത്തിലധികം ബ്രോങ്കോ വാഹനങ്ങൾ ഫോർഡ് മോട്ടോർ കമ്പനി തിരിച്ചുവിളിക്കുന്നു. യു.എസിലും കാനഡയിലുമായി 2021 മുതൽ 2026 വരെയുള്ള മോഡൽ വർഷങ്ങളിലെ 5,65,691 ഫോർഡ് ബ്രോങ്കോ, ബ്രോങ്കോ റാപ്റ്റർ വാഹനങ്ങളെയാണ് ഈ നടപടി ബാധിക്കുന്നത്. ഇതിൽ 36,061 വാഹനങ്ങൾ കാനഡയിലുള്ളവയാണ്.
വയറിംഗ് ഹാർനസിന് ആവശ്യമായ സുരക്ഷാ കവറിംഗ് ഇല്ലാത്തതാണ് തകരാറിന് കാരണമെന്ന് ഫോർഡ് അറിയിച്ചു. ഇതുമൂലം വയറുകൾ തുറന്നുവരാനും ഷോർട്ട് സർക്യൂട്ടിനും ഇടയാക്കും. ഷോർട്ട് സർക്യൂട്ട് ഉണ്ടായാൽ എയർ വെന്റുകളിൽ പുക ഉയരുകയോ ഡാഷ്ബോർഡിൽ മുന്നറിയിപ്പ് സന്ദേശം തെളിയുകയോ ചെയ്യാം. തുടർന്ന് എൻജിൻ കമ്പാർട്ട്മെന്റിന്റെ പാസഞ്ചർ വശത്തുനിന്ന് തീ ഉയരാൻ സാധ്യതയുണ്ട്.
ബാധിക്കപ്പെട്ട വാഹനങ്ങളിൽ ഏകദേശം ഒരു ശതമാനത്തിന് മാത്രമേ ഈ തകരാറുള്ളൂവെന്നാണ് ഫോർഡിന്റെ വിലയിരുത്തൽ. സംഭവവുമായി ബന്ധപ്പെട്ട് അപകടങ്ങളോ പരിക്കുകളോ ഇതുവരെ റിപ്പോർട്ട് ചെയ്തിട്ടില്ലെന്ന് കമ്പനി വ്യക്തമാക്കി. ഓഗസ്റ്റ് മാസത്തോടെ തകരാറിനുള്ള ശാശ്വത പരിഹാരം ലഭ്യമാക്കും. ഡീലർഷിപ്പുകൾ വഴി സൌജന്യമായി പുതിയ കവറുകൾ പിടിപ്പിച്ചു നൽകാനാണ് തീരുമാനം.
ഉപഭോക്താക്കൾക്ക് ഫോർഡിന്റെ വെബ്സൈറ്റ് വഴിയോ NHTSA.gov വഴിയോ തങ്ങളുടെ വാഹനം ഈ തിരിച്ചുവിളിയിൽ ഉൾപ്പെട്ടിട്ടുണ്ടോ എന്ന് പരിശോധിക്കാവുന്നതാണ്. ഫോർഡിന്റെ തിരിച്ചുവിളി നമ്പർ 26S55 ഉം NHTSA നമ്പർ 26V468 ഉം ആണ്. സഹായത്തിനായി ഫോർഡ് കസ്റ്റമർ സർവീസുമായോ (1-866-436-7332) എൻ.എച്ച്.ടി.എസ്.എ വെഹിക്കിൾ സേഫ്റ്റി ഹോട്ട്ലൈനുമായോ (1-888-327-4236) ബന്ധപ്പെടാവുന്നതാണ്.
Ford recalls over 36,000 Bronco vehicles over engine fire risk
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
