ഒട്ടാവ: മിഡിൽ ഈസ്റ്റിലെ സംഘർഷങ്ങളെത്തുടർന്ന് ആഗോളതലത്തിൽ വ്യോമയാന ഇന്ധനത്തിന് (Jet Fuel) കടുത്ത ക്ഷാമം അനുഭവപ്പെടുന്ന പശ്ചാത്തലത്തിൽ കാനഡയിൽ വിമാന സർവീസുകൾ റദ്ദാക്കിത്തുടങ്ങി. നിലവിൽ ഒരു ശതമാനത്തിൽ താഴെ സർവീസുകളെയാണ് ബാധിച്ചിട്ടുള്ളതെങ്കിലും വരും മാസങ്ങളിൽ കൂടുതൽ വിമാനങ്ങൾ റദ്ദാക്കിയേക്കുമെന്നാണ് റിപ്പോർട്ട്. ഹോർമുസ് കടലിടുക്ക് അടച്ചതോടെ ഇന്ധനവില ഇരട്ടിയായി വർധിച്ചതാണ് പ്രതിസന്ധിക്ക് കാരണമായത്.
കാനഡയിലെ പ്രമുഖ വിമാനക്കമ്പനികളായ എയർ കാനഡ, വെസ്റ്റ് ജെറ്റ്, എയർ ട്രാൻസാറ്റ് എന്നിവ ഇതിനോടകം തന്നെ ചില സർവീസുകൾ റദ്ദാക്കുകയോ പുനഃക്രമീകരിക്കുകയോ ചെയ്തിട്ടുണ്ട്. എയർ ട്രാൻസാറ്റ് മാത്രം മെയ് മുതൽ ഒക്ടോബർ വരെയുള്ള കാലയളവിൽ ആയിരത്തോളം സർവീസുകളാണ് വെട്ടിക്കുറച്ചത്. ആറ് റൂട്ടുകൾ എയർ കാനഡയും താൽക്കാലികമായി നിർത്തിവെച്ചു. ഇതിനുപുറമെ, ലുഫ്താൻസ ഉൾപ്പെടെയുള്ള ആഗോള കമ്പനികളും പതിനായിരക്കണക്കിന് സർവീസുകൾ റദ്ദാക്കി വരികയാണ്.
ഫെബ്രുവരി അവസാനം ഇറാനെതിരെ യുഎസും ഇസ്രായേലും നടത്തിയ ആക്രമണങ്ങളെത്തുടർന്നാണ് നിർണ്ണായകമായ ഹോർമുസ് കടലിടുക്ക് വഴിയുള്ള എണ്ണനീക്കം തടസ്സപ്പെട്ടത്. ഇതോടെ വിമാന ഇന്ധനത്തിന്റെ വില കഴിഞ്ഞ വർഷത്തെ അപേക്ഷിച്ച് ഇരട്ടിയിലധികമായി വർധിച്ചു. യൂറോപ്പിൽ ആറ് ആഴ്ചത്തേക്കുള്ള ഇന്ധനം മാത്രമേ അവശേഷിക്കുന്നുള്ളൂ എന്ന് ഇന്റർനാഷണൽ എനർജി ഏജൻസി മുന്നറിയിപ്പ് നൽകിയിട്ടുണ്ട്. കാനഡയ്ക്ക് സ്വന്തമായി റിഫൈനറികൾ ഉള്ളതിനാൽ ഇന്ധന ലഭ്യതയിൽ നിലവിൽ വലിയ ഭീഷണിയില്ലെങ്കിലും ആഗോള വിപണിയിലെ വിലക്കയറ്റം കമ്പനികളെ പ്രതികൂലമായി ബാധിക്കുകയാണ്.
എയർ കാനഡ ലഗേജ് നിരക്കുകൾ വർധിപ്പിച്ചപ്പോൾ, വെസ്റ്റ് ജെറ്റ് ടിക്കറ്റുകൾക്ക് അധിക ഫ്യുവൽ സർചാർജ് ഏർപ്പെടുത്തിക്കഴിഞ്ഞു. വേനൽക്കാല അവധിക്കാലം അടുത്തിരിക്കെ, വിമാന നിരക്കുകൾ ഇനിയും കുത്തനെ ഉയരാനാണ് സാധ്യതയെന്ന് വിപണി വിദഗ്ധർ വിലയിരുത്തുന്നു. വരും ദിവസങ്ങളിൽ മിഡിൽ ഈസ്റ്റിലെ രാഷ്ട്രീയ സാഹചര്യങ്ങൾക്കനുസരിച്ചായിരിക്കും വ്യോമയാന മേഖലയുടെ ഭാവി തീരുമാനിക്കപ്പെടുക.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Fuel shortage: Flights canceled in Canada; Ticket prices hiked
