ജനീവ: ലോകകപ്പിന്റെ വാണിജ്യ-പ്രവർത്തന അവകാശങ്ങളിൽ സ്വകാര്യ നിക്ഷേപ സ്ഥാപനങ്ങൾക്ക് ഓഹരി നൽകാനുള്ള വിവാദ പദ്ധതിയിൽ നിന്ന് ഫിഫ പിന്മാറി. ലോകമെമ്പാടുമുള്ള ആരാധകരുടെയും ദേശീയ ഫുട്ബോൾ അസോസിയേഷനുകളുടെയും കടുത്ത എതിർപ്പിനെ തുടർന്നാണ് തീരുമാനം. ഫിഫ പ്രസിഡന്റ് Gianni Infantino വെള്ളിയാഴ്ച പുറത്തിറക്കിയ പ്രസ്താവനയിലാണ് പദ്ധതി മുന്നോട്ടുകൊണ്ടുപോകില്ലെന്ന് അറിയിച്ചത്.
“എല്ലാ അഭിപ്രായങ്ങളും ശ്രദ്ധാപൂർവം കേട്ടു. പദ്ധതിക്ക് പിന്തുണ ലഭിച്ചിരുന്നെങ്കിലും അത് ഫുട്ബോൾ ലോകത്ത് വലിയ ഭിന്നത സൃഷ്ടിക്കുന്ന സാഹചര്യമുണ്ടാക്കി. ഫുട്ബോളിനെ ഒരുമിപ്പിക്കുകയെന്നതാണ് ഞങ്ങളുടെ ലക്ഷ്യം. അതിനാൽ ഈ നിർദേശം ഇനി മുന്നോട്ട് പോകില്ല,” എന്നാണ് ഇൻഫന്റീനോയുടെ വിശദീകരണം. ഇനി ഫുട്ബോൾ കുടുംബത്തിലെ എല്ലാ വിഭാഗങ്ങളെയും വീണ്ടും ഒരുമിച്ച് കൊണ്ടുവന്ന്, പ്രത്യേകിച്ച് കൂടുതൽ പിന്തുണ ആവശ്യമായ രാജ്യങ്ങളിൽ ഫുട്ബോളിന്റെ വളർച്ചയ്ക്ക് മുൻഗണന നൽകുമെന്നും അദ്ദേഹം വ്യക്തമാക്കി.
ചൊവ്വാഴ്ചയാണ് ലോകകപ്പിന്റെ വാണിജ്യ-പ്രവർത്തന അവകാശങ്ങൾ നിയന്ത്രിക്കാൻ സ്വകാര്യ നിക്ഷേപ പങ്കാളിത്തത്തോടെയുള്ള പ്രത്യേക അനുബന്ധ സ്ഥാപനം രൂപീകരിക്കാനുള്ള പദ്ധതി ഫിഫ പ്രഖ്യാപിച്ചത്. ഇതിലൂടെ ലഭിക്കുന്ന വരുമാനം വീണ്ടും ഫുട്ബോൾ വികസനത്തിനായി വിനിയോഗിക്കുമെന്ന് ഫിഫ അവകാശപ്പെട്ടിരുന്നെങ്കിലും, പദ്ധതിക്കെതിരെ ശക്തമായ പ്രതിഷേധമാണ് ഉയർന്നത്.
യൂറോപ്യൻ ഫുട്ബോളിന്റെ ഭരണസംഘടനയായ UEFA, ഫുട്ബോളിന്റെ “ആത്മാവിനും ഭരണസംവിധാനത്തിനും” തന്നെ ഇത് ഭീഷണിയാണെന്ന് വിമർശിച്ചിരുന്നു. പദ്ധതിക്കെതിരായ പ്രതിഷേധം ദിവസങ്ങൾക്കകം കൂടുതൽ ശക്തമായി. ഭാവിയിലെ പുരുഷ-വനിതാ ലോകകപ്പുകൾ ബഹിഷ്കരിക്കുമെന്ന മുന്നറിയിപ്പ് യൂഫ നൽകിയപ്പോൾ, CONCACAF, Asian Football Confederation എന്നിവയും പദ്ധതിയെ തള്ളിക്കളഞ്ഞു.
ഫിഫ പ്രസിഡന്റിന്റെ മുതിർന്ന ഉപദേഷ്ടാവായ Carlos Cordeiro പ്രതിഷേധസൂചകമായി രാജിവെച്ചതും വിവാദത്തിന് ആക്കം കൂട്ടി. ഫിഫയുടെ ചീഫ് ഓപ്പറേറ്റിംഗ് ഓഫീസർ Kevin Lamour പോലും പദ്ധതിയെ തുറന്നടിച്ച് രംഗത്തെത്തി. ഇതോടെ കടുത്ത സമ്മർദത്തിലായ ഫിഫ ഒടുവിൽ സ്വകാര്യ നിക്ഷേപ പദ്ധതി പൂർണമായും ഉപേക്ഷിക്കുകയായിരുന്നു.
fifa-has-scrapped-us20-billion-world-cup-sell-off-plan-new-york-post-reports
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
