ഒട്ടാവ: കനേഡിയൻ മാധ്യമരംഗത്തെ പ്രമുഖ വ്യക്തിത്വവും, പ്രശസ്ത ടിവി അവതാരകയും പത്രപ്രവർത്തകയുമായ ബെവർലി തോംസൺ (61) അന്തരിച്ചു. ഏറെക്കാലമായി അർബുദ രോഗത്തിന് ചികിത്സയിലായിരുന്ന അവർ ഞായറാഴ്ച രാവിലെ കുടുംബാംഗങ്ങളുടെ സാന്നിധ്യത്തിലാണ് വിടവാങ്ങിയത്. മൂന്ന് പതിറ്റാണ്ടിലേറെ നീണ്ട മാധ്യമ ജീവിതത്തിൽ കാനഡയിലും ലോകമെമ്പാടുമുള്ള ചരിത്രപരമായ സംഭവങ്ങൾക്ക് ബെവർലി സാക്ഷിയായി. 2016-ലെ യു.എസ്. തിരഞ്ഞെടുപ്പിലെ സംഭവബഹുലമായ റിപ്പോർട്ടുകൾ മുതൽ സെലിൻ ഡയോൺ, ഷാനിയ ട്വയ്ൻ തുടങ്ങിയ പ്രമുഖരുമായുള്ള അഭിമുഖങ്ങൾ വരെ അവർ നടത്തി.
അന്താരാഷ്ട്ര ബഹിരാകാശ നിലയത്തിൽ വെച്ച് ക്രിസ് ഹാഡ്ഫീൽഡുമായി സംസാരിക്കാനും അവർക്ക് അവസരം ലഭിച്ചു. മാധ്യമപ്രവർത്തനത്തോടൊപ്പം സാമൂഹ്യപ്രവർത്തനങ്ങളിലും സജീവമായിരുന്ന ബെവർലി, 2002-ൽ തനിക്ക് സ്തനാർബുദം സ്ഥിരീകരിച്ച ശേഷം രോഗം ബാധിച്ചവർക്കായി ധനസമാഹരണത്തിനും ബോധവൽക്കരണത്തിനും മുൻനിരയിൽ പ്രവർത്തിച്ചു. ഈ സേവനങ്ങളെ മാനിച്ച്, നിരവധി സ്തനാർബുദ സംഘടനകൾക്ക് ധനസമാഹരണം നടത്തിയതിനും കനേഡിയൻ മാധ്യമരംഗത്തിന് നൽകിയ സംഭാവനകൾക്കും 2019-ൽ അവർക്ക് ഓർഡർ ഓഫ് കാനഡ ബഹുമതി ലഭിച്ചു.
മാധ്യമരംഗത്ത് ബെവർലി നൽകിയ സംഭാവനകളെ മാനിച്ച് 2024 ഒക്ടോബറിൽ റേഡിയോ ടെലിവിഷൻ ഡിജിറ്റൽ ന്യൂസ് അസോസിയേഷൻ ഓഫ് കാനഡ (RTDNA കാനഡ) ലൈഫ് ടൈം അച്ചീവ്മെൻ്റ് അവാർഡ് നൽകി അവരെ ആദരിച്ചിരുന്നു. “കാനഡയിലെ ഏറ്റവും ആദരണീയരായ വാർത്താ അവതാരകരിൽ ഒരാളാണ് ബെവർലി തോംസൺ,” അന്ന് RTDNA കാനഡ പ്രസിഡന്റ് ലിസ് ട്രാവേഴ്സ് പറഞ്ഞിരുന്നു.
ടൊറന്റോയിൽ ജനിച്ചു വളർന്ന ബെവർലി, ന്യൂമാർക്കറ്റിലെ ഒരു ചെറിയ റേഡിയോ സ്റ്റേഷനിൽ നിന്നാണ് തന്റെ മാധ്യമ ജീവിതം ആരംഭിച്ചത്. പിന്നീട് സിറ്റി ന്യൂസ് 680-ൽ ജോലി ചെയ്യുന്ന സമയത്താണ് സിടിവിയിൽ നിന്ന് ഒരു റിപ്പോർട്ടർ സ്ഥാനത്തേക്ക് ക്ഷണം ലഭിച്ചത്. ആദ്യം ഇതൊരു തമാശയാണെന്ന് കരുതി അവർ പോയില്ല. പിന്നീട് നിരവധി തവണ വിളിച്ചതിന് ശേഷമാണ് അവർ അഭിമുഖത്തിൽ പങ്കെടുത്തത്. അങ്ങനെയാണ് അവർക്ക് ആദ്യ ടിവി ജോലി ലഭിച്ചത്.
തുടർന്ന് സിടിവി ന്യൂസ് ടൊറന്റോയിൽ വാരാന്ത്യ വാർത്താ അവതാരകയായി. 1997-ൽ അവർ ഗ്ലോബൽ ന്യൂസിലേക്ക് മാറുകയും ഏഴുവർഷം അവിടുത്തെ പ്രധാന വാർത്തകൾ അവതരിപ്പിക്കുകയും ചെയ്തു. 2003-ൽ സിടിവിയിലേക്ക് മടങ്ങിയെത്തിയ ബെവർലി 2016-ൽ അവസാനിച്ച കാനഡ എ.എം എന്ന പരിപാടിയുടെ അവതാരകയായിരുന്നു.
ഹോളിവുഡ് താരങ്ങൾ മുതൽ രാഷ്ട്രത്തലവന്മാർ വരെ ബെവർലി തോംസൺ അഭിമുഖം ചെയ്തവരുടെ പട്ടികയിൽ ഉൾപ്പെടുന്നു. 2014-ൽ ഹിലാരി ക്ലിന്റനുമായി നടത്തിയ അഭിമുഖത്തിൽ, വരാനിരിക്കുന്ന തിരഞ്ഞെടുപ്പിൽ അമേരിക്കൻ പ്രസിഡന്റാകാനുള്ള ആഗ്രഹം അവർ തുറന്നുപറഞ്ഞിരുന്നു. ഒരു മാധ്യമപ്രവർത്തകക്കും അതിനുമുമ്പ് ആ നേട്ടം കൈവരിക്കാൻ സാധിച്ചിരുന്നില്ല. തന്റെ ജീവിതത്തിൽ പ്രതിസന്ധികൾ വന്നപ്പോൾ സ്ഥിരോത്സാഹം, അഭിനിവേശം, ക്ഷമ എന്നീ മൂന്ന് കാര്യങ്ങളിലാണ് താൻ ശ്രദ്ധ കേന്ദ്രീകരിച്ചതെന്ന് ബെവർലി തോംസൺ പറഞ്ഞിട്ടുണ്ട്.
ഏഴാമത്തെ യു.എൻ സെക്രട്ടറി ജനറലായിരുന്ന കോഫി അന്നനുമായി നടത്തിയ ഒരു അഭിമുഖത്തെക്കുറിച്ച് സൂചിപ്പിച്ച് അവർ പറഞ്ഞു, “ജീവിതം എന്നാൽ തിരഞ്ഞെടുപ്പുകളാണ്. നന്നായി തിരഞ്ഞെടുക്കാൻ, നിങ്ങൾ ആരാണെന്നും എന്തിനുവേണ്ടി നിലകൊള്ളുന്നുവെന്നും എവിടെയെത്താൻ ആഗ്രഹിക്കുന്നുവെന്നും എന്തിനാണ് അവിടേക്ക് പോകാൻ ആഗ്രഹിക്കുന്നതെന്നും നിങ്ങൾ അറിഞ്ഞിരിക്കണം.” ഭർത്താവ് റോബും മക്കളായ ടെയ്ലറും റോബിയും ഉൾപ്പെടുന്നതാണ് അവരുടെ കുടുംബം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
