ഫേസ്ബുക്കും ഇൻസ്റ്റാഗ്രാമും പണിമുടക്കി: ആഗോളതലത്തിൽ ലക്ഷക്കണക്കിന് ഉപയോക്താക്കൾ പ്രതിസന്ധിയിൽ; മെസഞ്ചറും നിശ്ചലം, തകരാർ കാരണം വ്യക്തമാക്കാതെ മെറ്റ

ന്യൂഡൽഹി: പ്രമുഖ സോഷ്യൽ മീഡിയ പ്ലാറ്റ്‌ഫോമുകളായ ഫേസ്ബുക്കും ഇൻസ്റ്റാഗ്രാമും ആഗോളതലത്തിൽ കൂട്ടത്തോടെ പണിമുടക്കി. വെള്ളിയാഴ്ച രാത്രിയോടെയാണ് ഇരു പ്ലാറ്റ്‌ഫോമുകളുടെയും സേവനങ്ങൾ പെട്ടെന്ന് തടസ്സപ്പെട്ടത്. ആപ്പുകൾ കൃത്യമായി പ്രവർത്തിക്കുന്നില്ലെന്നും ഫീഡുകൾ പുതുക്കാൻ സാധിക്കുന്നില്ലെന്നും കാണിച്ച് ഇന്ത്യ ഉൾപ്പെടെയുള്ള വിവിധ രാജ്യങ്ങളിൽ നിന്നുള്ള ലക്ഷക്കണക്കിന് ഉപയോക്താക്കൾ രംഗത്തെത്തിയിട്ടുണ്ട്. ഫേസ്ബുക്കിൻ്റെ സന്ദേശമയയ്ക്കൽ സംവിധാനമായ മെസഞ്ചറിനെയും ഈ തകരാർ ബാധിച്ചതായാണ് വിവരം.

വെള്ളിയാഴ്ച ഇന്ത്യൻ സമയം വൈകിട്ട് ഏഴ് മണിയോടെയാണ് പ്ലാറ്റ്‌ഫോമുകളിൽ പ്രശ്നങ്ങൾ കണ്ടുതുടങ്ങിയത്. സാങ്കേതിക തടസ്സങ്ങൾ നിരീക്ഷിക്കുന്ന പ്രമുഖ വെബ്‌സൈറ്റായ ‘ഡൗൺ ഡിറ്റെക്ടറിൽ’ (Downdetector) ചുരുങ്ങിയ സമയത്തിനുള്ളിൽ ലക്ഷത്തിലധികം പരാതികളാണ് റിപ്പോർട്ട് ചെയ്യപ്പെട്ടത്. ഇന്ത്യയിലെ പ്രധാന നഗരങ്ങളിലെ ഉപയോക്താക്കളും സമാനമായ രീതിയിൽ ഫേസ്ബുക്കും ഇൻസ്റ്റാഗ്രാമും ഉപയോഗിക്കാൻ കഴിയുന്നില്ലെന്ന് സ്ഥിരീകരിച്ചിട്ടുണ്ട്. സേവനങ്ങൾ പെട്ടെന്ന് നിലച്ചതോടെ അക്കൗണ്ടുകൾ ഹാക്ക് ചെയ്യപ്പെട്ടതാണോ എന്ന ആശങ്കയിലാണ് പലരും.

ഒരു വലിയ വിഭാഗം ഉപയോക്താക്കൾക്ക് ഇൻസ്റ്റാഗ്രാമിലും ഫേസ്ബുക്കിലും പുതിയ പോസ്റ്റുകൾ കാണാൻ സാധിക്കുന്നില്ല. നിലവിലുള്ള അക്കൗണ്ടുകളിൽ നിന്ന് ആളുകൾ തനിയെ ലോഗ് ഔട്ടായി പോകുന്നതായും ചിലർ പരാതിപ്പെടുന്നുണ്ട്. എന്നാൽ, മൊബൈൽ ആപ്ലിക്കേഷനുകൾ പൂർണ്ണമായി നിശ്ചലമായപ്പോഴും കമ്പ്യൂട്ടറുകൾ വഴിയുള്ള വെബ് പതിപ്പുകൾ ചിലയിടങ്ങളിൽ ഭാഗികമായി പ്രവർത്തിക്കുന്നുണ്ടെന്നതും ശ്രദ്ധേയമാണ്. വ്യക്തിഗത ഇൻ്റർനെറ്റ് കണക്ഷനുകളുടെ തകരാറല്ല, മറിച്ച് മെറ്റയുടെ സെർവറുകളിലെ ആന്തരിക സാങ്കേതിക പ്രശ്നങ്ങളാണ് (Backend Issue) ഈ പ്രതിസന്ധിക്ക് പിന്നിലെന്നാണ് പ്രാഥമിക വിലയിരുത്തൽ.

സോഷ്യൽ മീഡിയകൾ നിശ്ചലമായതോടെ പ്രതികരണങ്ങളുമായി ഉപയോക്താക്കൾ കൂട്ടത്തോടെ മറ്റൊരു പ്രമുഖ പ്ലാറ്റ്‌ഫോമായ എക്സിലേക്ക് (ട്വിറ്റർ) എത്തിക്കൊണ്ടിരിക്കുകയാണ്. അതേസമയം, ഈ സാങ്കേതിക തടസ്സത്തെക്കുറിച്ച് ഔദ്യോഗിക പ്രതികരണം നടത്താൻ മെറ്റ ഇതുവരെ തയ്യാറായിട്ടില്ല. പ്രശ്നം എപ്പോൾ പരിഹരിക്കപ്പെടുമെന്നതിനെക്കുറിച്ചും കമ്പനി വ്യക്തത വരുത്തിയിട്ടില്ല. നിലവിലെ സാഹചര്യത്തിൽ ഫോൺ റീസ്റ്റാർട്ട് ചെയ്യുകയോ ഇൻ്റർനെറ്റ് മാറ്റുകയോ ചെയ്തതുകൊണ്ട് ഈ പ്രശ്നം പരിഹരിക്കപ്പെടില്ലെന്നും സെർവർ തകരാർ മെറ്റ നേരിട്ട് പരിഹരിക്കുന്നത് വരെ കാത്തിരിക്കേണ്ടി വരുമെന്നുമാണ് സാങ്കേതിക വിദഗ്ധർ വ്യക്തമാക്കുന്നത്.

Facebook and Instagram go on strike: Millions of users globally in crisis

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt