മോങ്ക്ടൺ : ഡിജിറ്റൽ ലോകത്ത് സ്വന്തം സംസ്കാരവും ഐഡന്റിറ്റിയും അടയാളപ്പെടുത്താൻ അക്കാഡിയൻ പതാകയുടെ ഇമോജി വേണമെന്ന ആവശ്യവുമായി മോങ്ക്ടനിൽ നിന്നുള്ള യുവാക്കൾ രംഗത്ത്. കഴിഞ്ഞവർഷം നാഷണൽ അക്കാഡിയൻ ദിനത്തിൽ ബാൻഡിന്റെ പ്രചാരണത്തിനായി സോഷ്യൽ മീഡിയയിൽ പോസ്റ്റിടാൻ ശ്രമിച്ചപ്പോഴാണ് അക്കാഡിയൻ പതാകയുടെ ഇമോജി ലഭ്യമല്ലെന്ന് അലക്സിസ് ബെല്ലിവോ എന്ന യുവാവ് തിരിച്ചറിയുന്നത്. തുടർന്ന് സുഹൃത്തായ ഷൂലിയൻ റോബിഷോഡുമായി ചേർന്ന് പുതിയ ഇമോജിക്കായി ഡിജിറ്റൽ ലോകത്തെ ഇമോജികൾ അംഗീകരിക്കുന്ന സാങ്കേതിക കൂട്ടായ്മയായ യൂണികോഡിന് സമർപ്പിക്കാൻ ഔദ്യോഗിക അപേക്ഷ തയ്യാറാക്കുകയായിരുന്നു.
അക്കാഡിയൻ പതാകയോടുള്ള ജനങ്ങളുടെ വികാരം ഡിജിറ്റൽ ലോകത്തും പ്രകടിപ്പിക്കാൻ ഈ ഇമോജി സഹായിക്കുമെന്നും, പുതിയ തലമുറയ്ക്ക് സംസ്കാരത്തോടുള്ള താല്പര്യം കൂട്ടാൻ ഇത് ഉപകരിക്കുമെന്നും ബെല്ലിവോ പറയുന്നു. അപേക്ഷയ്ക്ക് കൂടുതൽ പിന്തുണ ഉറപ്പാക്കാൻ യുവാക്കൾ ആരംഭിച്ച ഓൺലൈൻ ക്യാമ്പെയ്നിലെ നിവേദനത്തിൽ ഇതിനകം പതിനായിരത്തിലധികം ആളുകൾ ഒപ്പുവെച്ചു കഴിഞ്ഞു. പതാകകൾക്ക് മാത്രമായി പുതിയ ഇമോജികൾ അനുവദിക്കുന്നത് 2022-ൽ യൂണികോഡ് നിരുത്സാഹപ്പെടുത്തിയിരുന്നെങ്കിലും, നിലവിലുള്ള നക്ഷത്രത്തിന്റെയും ഫ്രഞ്ച് പതാകയുടെയും ഇമോജികൾ സംയോജിപ്പിച്ചുള്ള സാങ്കേതിക മാർഗ്ഗത്തിലൂടെ അനുമതി നേടിയെടുക്കാൻ കഴിയുമെന്നാണ് ഇവരുടെ പ്രതീക്ഷ.
ഫ്രാൻസ്, ക്യുബെക്, ലൂസിയാന തുടങ്ങി ലോകത്തിന്റെ വിവിധ ഭാഗങ്ങളിലുള്ള അക്കാഡിയൻ വംശജരിലേക്ക് പ്രചാരണം വ്യാപിപ്പിക്കാനും ഈ ശൈത്യകാലത്ത് അപേക്ഷ ഔദ്യോഗികമായി യൂണികോഡിന് സമർപ്പിക്കാനുമാണ് ഇവരുടെ പദ്ധതി. നിലവിൽ ഫ്രഞ്ച് പതാകയും നീലയും ചുവപ്പും നിറങ്ങളിലുള്ള ചതുരങ്ങളും നക്ഷത്രങ്ങളും ചേർത്തുള്ള വെവ്വേറെ ഇമോജി കോമ്പിനേഷനുകളാണ് ആളുകൾ ഇതിനായി ഉപയോഗിക്കുന്നത്. എന്നാൽ അക്കാഡിയൻ പതാകയ്ക്ക് മാത്രമായി വേറിട്ടൊരു ഇമോജി വേണമെന്നാണ് ഇവരുടെ ശക്തമായ ആവശ്യം.
Canadian youth campaign for an emoji for the Acadian flag, garnering over 10,000 signatures
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
