ദാഹം മാറ്റാൻ ഇലക്ട്രോലൈറ്റോ? അമിതമായാൽ ജീവൻ അപകടത്തിലെന്ന് മുന്നറിയിപ്പ്!

ചൂടുള്ള സമയത്തും വ്യായാമത്തിന് ശേഷവും പലരും ഇലക്ട്രോലൈറ്റ് പാനീയങ്ങൾ കുടിക്കാറുണ്ട്. എന്നാൽ ഇവയ്ക്ക് അപകട സാധ്യതകളുണ്ടെന്ന് Quebec poison control centre മുന്നറിയിപ്പ് നൽകുന്നു. കഴിഞ്ഞ നാല് വർഷത്തിനിടെ ഇലക്ട്രോലൈറ്റ് സപ്ലിമെൻ്റുകൾ കാരണം ആരോഗ്യപ്രശ്നങ്ങളുണ്ടായെന്ന് പറഞ്ഞ് വരുന്ന കോളുകൾ വല്ലാതെ വർധിച്ചിട്ടുണ്ട്. കേന്ദ്രത്തിൻ്റെ കണക്കനുസരിച്ച്, ഇലക്ട്രോലൈറ്റ്, മിനറൽ സപ്ലിമെൻ്റുകൾ കാരണം ബുദ്ധിമുട്ടിലായവരുടെ കേസുകൾ 2020-ൽ 584 ആയിരുന്നത് 2024-ൽ 763 ആയി കൂടി. ഈ കോളുകളിൽ കൂടുതൽ വിളിക്കുന്നത് അഞ്ച് വയസ്സിൽ താഴെയുള്ള കുട്ടികളുടെ കാര്യത്തിലാണ്. 2020-ൽ ഇത് 89 കേസുകളായിരുന്നെങ്കിൽ കഴിഞ്ഞ വർഷം 121 ആയി ഉയർന്നു. ഈ വർധനവിന് കാരണം എന്താണെന്ന് ഇപ്പോഴും വ്യക്തമല്ലെന്ന് വിഷബാധ നിയന്ത്രണ കേന്ദ്രത്തിലെ ഡോ. ജോഷ് വാങ് പറഞ്ഞു.

ഗേറ്റോറേഡ്, പെഡിയലൈറ്റ് പോലുള്ള പല ഉൽപ്പന്നങ്ങളും സാധാരണയായി സുരക്ഷിതമാണ്. എന്നാൽ, അമിതമായി ഉപയോഗിക്കുകയോ ശരിയായ മാർഗ്ഗനിർദ്ദേശമില്ലാതെ കഴിക്കുകയോ ചെയ്താൽ പ്രശ്നങ്ങളുണ്ടാകാം എന്ന് ഡോ. വാങ് മുന്നറിയിപ്പ് നൽകുന്നു. നിർജ്ജലീകരണം സംഭവിച്ച രോഗികൾക്ക് ഇവ നൽകാൻ ഞാൻ പലപ്പോഴും നിർദ്ദേശിക്കാറുണ്ടെന്ന് അദ്ദേഹം പറഞ്ഞു. എന്നാൽ സ്വന്തമായി സപ്ലിമെൻ്റുകൾ കഴിക്കുമ്പോൾ ആരോഗ്യ പ്രശ്നങ്ങളെക്കുറിച്ച് അറിഞ്ഞിരിക്കേണ്ടത് പ്രധാനമാണ്. അമിത ഡോസിനെക്കുറിച്ചോ, മറ്റ് മരുന്നുകളുമായുള്ള പ്രശ്നങ്ങളെക്കുറിച്ചോ സംശയമുണ്ടെങ്കിൽ ഒരു ഫാർമസിസ്റ്റിൻ്റെയോ ഡോക്ടറുടെയോ ഉപദേശം തേടുന്നത് നല്ലതാണ്.

‘പ്രൈം’ എന്ന ഹൈഡ്രേഷൻ ഡ്രിങ്കിൽ 700 മില്ലിഗ്രാം പൊട്ടാസ്യം ഉണ്ടെന്നും, ഇത് ഏകദേശം രണ്ട് വാഴപ്പഴത്തിന് തുല്യമാണെന്നും അദ്ദേഹം ചൂണ്ടിക്കാട്ടി. വൃക്കരോഗങ്ങളുള്ളവർക്ക് ഇത് അപകടകരമാകാം. കാരണം, ശരീരത്തിൽ നിന്ന് അധിക പൊട്ടാസ്യം നീക്കം ചെയ്യാൻ അവർക്ക് പ്രയാസമുണ്ടാകും. ദാഹം തോന്നുമ്പോൾ ഇലക്ട്രോലൈറ്റ് പാനീയങ്ങളെക്കാൾ വെള്ളം കുടിക്കുന്നതാണ് നല്ലത് എന്ന് അദ്ദേഹം ഓർമ്മിപ്പിച്ചു. മിക്ക ഇലക്ട്രോലൈറ്റ് ഉൽപ്പന്നങ്ങളും നിർദ്ദേശിച്ച അളവിൽ ഉപയോഗിക്കുമ്പോൾ സുരക്ഷിതമാണ്. എന്നാൽ, അമിതമായി ഉപയോഗിക്കുന്നത് ദോഷകരമാണെന്നും അദ്ദേഹം കൂട്ടിച്ചേർത്തു.

അമിത ഉപയോഗത്തിന്റെ ലക്ഷണങ്ങൾ ഓരോ ധാതുവിനെയും ആശ്രയിച്ചിരിക്കും. ചിലത് വയറിളക്കം, ഓക്കാനം, ഛർദ്ദി എന്നിവയ്ക്ക് കാരണമാകുമ്പോൾ, മഗ്നീഷ്യം പോലെ ചിലത് മാനസിക നിലയെ ബാധിച്ചേക്കാം. കാൽസ്യം മലബന്ധവുമായി ബന്ധപ്പെട്ടിരിക്കുന്നു. പൊട്ടാസ്യം അമിതമായാൽ ഹൃദയസംബന്ധമായ പ്രശ്നങ്ങളും അപകടകരമായ ഹൃദയമിടിപ്പും ഉണ്ടാകാമെന്ന് അദ്ദേഹം പ്രത്യേകം ഓർമ്മിപ്പിച്ചു, ഇത് രോഗികളെ എമർജൻസി ഡിപ്പാർട്ട്‌മെൻ്റിൽ എത്തിക്കാൻ സാധ്യതയുണ്ടെന്നും അദ്ദേഹം പറഞ്ഞു. മാതാപിതാക്കളോട് എല്ലാ സപ്ലിമെൻ്റുകളും സുരക്ഷിതമായി സൂക്ഷിക്കാനും അദ്ദേഹം അഭ്യർത്ഥിച്ചു. സംശയമുണ്ടെങ്കിൽ 1-800-463-5060 എന്ന നമ്പറിൽ ക്യുബെക്ക് പോയ്സൺ സെൻ്ററുമായി ബന്ധപ്പെടാമെന്നും അദ്ദേഹം അറിയിച്ചു.