എഡ്മന്റൺ: നഗരസഭയുടെ 2026-ലെ നികുതി ബൈലോ എഡ്മണ്ടൺ സിറ്റി കൗൺസിൽ പാസാക്കി. ചൊവ്വാഴ്ച സിറ്റി ഹാളിൽ ചേർന്ന യോഗത്തിലാണ് ഈ മാസമാദ്യം തീരുമാനിച്ച 6.9 ശതമാനം നികുതി വർധന സ്ഥിരീകരിച്ചത്. നഗരത്തിലെ അടിസ്ഥാന സൗകര്യ വികസനത്തിനും സേവനങ്ങൾക്കുമായി 2.5 ബില്യൺ ഡോളറിലധികം വരുമാനം ലക്ഷ്യമിട്ടാണ് പുതിയ നികുതി നിരക്കുകൾ നടപ്പിലാക്കുന്നത്.
സ്വത്തിന്റെ മൂല്യനിർണ്ണയത്തിന് (Assessment) അനുസരിച്ചായിരിക്കും ഓരോ ഉടമയും അധികമായി നൽകേണ്ടി വരുന്ന തുക നിശ്ചയിക്കുക. നഗരസഭയുടെ കണക്കനുസരിച്ച്, ഓരോ ഒരു ലക്ഷം ഡോളർ മൂല്യമുള്ള സ്വത്തിനും ഈ വർഷം ഏകദേശം 774 ഡോളർ നികുതി ഇനത്തിൽ നൽകണം. ഇത് കഴിഞ്ഞ വർഷത്തെ അപേക്ഷിച്ച് 53 ഡോളറിന്റെ വർധനവാണ് കാണിക്കുന്നത്. ശരാശരി 4,92,500 ഡോളർ വിലമതിക്കുന്ന ഒരു വീടിന് പ്രതിമാസം ഏകദേശം 318 ഡോളർ പ്രോപ്പർട്ടി ടാക്സ് നൽകേണ്ടി വരും.
നഗരസഭാ നികുതിക്ക് പുറമെ, പ്രവിശ്യാ സർക്കാരിന് വേണ്ടിയുള്ള വിദ്യാഭ്യാസ നികുതിയും ഇതിനോടൊപ്പം ശേഖരിക്കും. ഇത്തവണ വിദ്യാഭ്യാസ നികുതിയിൽ താമസസ്ഥലങ്ങൾക്ക് 10.2 ശതമാനവും ഇതര ആവശ്യങ്ങൾക്കുള്ള സ്വത്തുകൾക്ക് 2.6 ശതമാനവും വർധനവുണ്ട്. പുതുക്കിയ നികുതി ബില്ലുകൾ മെയ് 25-ഓടെ ഉടമകൾക്ക് അയച്ചുതുടങ്ങും. ജൂൺ 30-നകം നികുതി അടച്ചു തീർക്കണമെന്ന് അധികൃതർ അറിയിച്ചു. റോഡുകൾ, പാലങ്ങൾ, അടിയന്തര സേവനങ്ങൾ, വിനോദ കേന്ദ്രങ്ങൾ എന്നിവയുടെ പരിപാലനത്തിനായി ഈ തുക വിനിയോഗിക്കും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Edmonton City Council passes 2026 tax bylaw; education tax increase also included
