ഒട്ടാവ: കാനഡയിൽ ഇ-സ്കൂട്ടറുകൾ കുട്ടികൾക്ക് കളിക്കാനുള്ള സാധനങ്ങളല്ലെന്നും അവയുടെ ഉപയോഗം മൂലം കുട്ടികളിൽ ഗുരുതരമായ അപകടങ്ങൾ വർധിച്ചുവരികയാണെന്നും മുന്നറിയിപ്പുമായി ആരോഗ്യ വിദഗ്ധർ. വേനൽക്കാല അവധിക്കാലത്ത് ഇ-സ്കൂട്ടറുകൾ ഓടിച്ച് പരിക്കേറ്റ് ആശുപത്രിയിൽ പ്രവേശിക്കപ്പെടുന്ന കുട്ടികളുടെ എണ്ണത്തിൽ വൻ വർധനവാണ് രേഖപ്പെടുത്തിയിരിക്കുന്നത്. കഴിഞ്ഞ ഒരു വർഷത്തിനിടെ കാനഡയിൽ ഇ-സ്കൂട്ടർ അപകടങ്ങൾ കാരണം ആശുപത്രിയിൽ ചികിത്സ തേടിയവരുടെ എണ്ണത്തിൽ 22 ശതമാനത്തിന്റെ വർധനവുണ്ടായതായി കാനഡ ഇൻസ്റ്റിറ്റ്യൂട്ട് ഫോർ ഹെൽത്ത് ഇൻഫർമേഷൻ (CIHI) പുറത്തുവിട്ട പുതിയ റിപ്പോർട്ടിൽ വ്യക്തമാക്കുന്നു.
4 വയസ്സിന് താഴെയുള്ള 18 കുട്ടികൾക്കും 5 മുതൽ 17 വയസ്സ് വരെയുള്ള 241 കുട്ടികൾക്കുമാണ് കഴിഞ്ഞ വർഷം ഇ-സ്കൂട്ടർ അപകടങ്ങളിൽ പരിക്കേറ്റത്. ഇതിൽ ഭൂരിഭാഗം കുട്ടികളും ഹെൽമറ്റ് ധരിക്കാതെയാണ് വാഹനം ഓടിച്ചിരുന്നതെന്ന് മക്മാസ്റ്റർ ചിൽഡ്രൻസ് ഹോസ്പിറ്റലിലെ പീഡിയാട്രിക് എമർജൻസി വിഭാഗം മേധാവി ഡോ. ഏപ്രിൽ കാം ചൂണ്ടിക്കാണിക്കുന്നു. ചെറിയ മുറിവുകൾക്ക് പുറമെ എല്ലുകൾ പൊട്ടൽ, തലക്കേറ്റ പരിക്കുകൾ, ആന്തരിക മുറിവുകൾ തുടങ്ങിയ ഗുരുതരമായ പ്രശ്നങ്ങളാണ് കുട്ടികളിൽ ഉണ്ടാകുന്നത്. മണിക്കൂറിൽ 20 മുതൽ 30 കിലോമീറ്റർ വരെ വേഗത കൈവരിക്കുന്ന ഇവ കൃത്യമായി നിയന്ത്രിക്കാനുള്ള കായികശേഷിയോ ഉയരമോ പല കുട്ടികൾക്കും ഉണ്ടാകാറില്ലെന്നും വെസ്റ്റേൺ യൂണിവേഴ്സിറ്റിയിലെ ഡോ. ഷീന ബെലിസ്ലെ വ്യക്തമാക്കുന്നു.
കുട്ടികളിലെ ശാരീരിക അധ്വാനം കുറയ്ക്കുന്ന ഇ-സ്കൂട്ടറുകളുടെ ഉപയോഗത്തിന് രാജ്യത്ത് കൂടുതൽ കർശനമായ നിയമങ്ങളും ബോധവത്കരണവും വേണമെന്നാണ് ഡോക്ടർമാരുടെ ആവശ്യം. നിലവിൽ ഒന്റാറിയോ, ബ്രിട്ടീഷ് കൊളംബിയ തുടങ്ങിയ സ്ഥലങ്ങളിൽ 16 വയസ്സിന് മുകളിലുള്ളവർക്ക് മാത്രമാണ് ഇ-സ്കൂട്ടറുകൾ ഓടിക്കാൻ അനുമതിയുള്ളത്. കുഞ്ഞുങ്ങളുടെ സുരക്ഷ മുൻനിർത്തി ഇ-സ്കൂട്ടറുകൾ കളിപ്പാട്ടങ്ങളല്ലെന്ന് മാതാപിതാക്കൾ തിരിച്ചറിയണമെന്നും, കുട്ടികൾക്ക് ഇവ നൽകുന്നത് ഒഴിവാക്കണമെന്നും ഡോക്ടർമാർ നിർദേശിക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
E-scooter accidents on the rise in Canada: Doctors express concern over children's safety.
