ആൻ്റണി വർഗീസ് പെപ്പെ നായകനായി എത്തുന്ന പുതിയ ചിത്രം ‘കാട്ടാളൻ’ കാണാൻ തിയേറ്ററുകളിൽ എത്തുന്ന പ്രേക്ഷകർക്കായി നിർണായക മുന്നറിയിപ്പ് പുറപ്പെടുവിച്ച് അണിയറപ്രവർത്തകർ. സിനിമ അവസാനിച്ചയുടൻ പ്രേക്ഷകർ തിയേറ്ററുകളിൽ നിന്ന് ഇറങ്ങിപ്പോകരുത് എന്ന് ഇൻസ്റ്റാഗ്രാം ഉൾപ്പെടെയുള്ള സോഷ്യൽ മീഡിയ പ്ലാറ്റ്ഫോമുകളിലൂടെയാണ് ക്യൂബ്സ് എൻ്റർടെയ്ൻമെൻ്റ്സ് ഔദ്യോഗികമായി അറിയിച്ചത്. ചിത്രത്തിന് ശേഷം ഒളിഞ്ഞിരിക്കുന്ന സർപ്രൈസുകൾ പൂർണ്ണമായി ആസ്വദിക്കാൻ പ്രേക്ഷകർ അവസാന നിമിഷം വരെ കാത്തിരിക്കണമെന്നാണ് നിർദേശം.
പുതുക്കിയ റിലീസ് കലണ്ടർ പ്രകാരം മെയ് 28-ന് വലിയ പെരുന്നാൾ റിലീസായി ചിത്രം തിയേറ്ററുകളിൽ എത്തും. ചിത്രത്തിൽ ആകെ മൂന്ന് പോസ്റ്റ് ക്രെഡിറ്റ് സീനുകൾ ഉൾപ്പെടുത്തിയിട്ടുണ്ടെന്ന് സംവിധായകൻ പോൾ ജോർജ് വ്യക്തമാക്കി. ഇതിൽ രണ്ട് സീനുകൾ ടൈറ്റിൽ കാർഡിന്റെ സമയത്തും, അവസാനത്തെ പ്രധാന സീൻ എൻഡ് ക്രെഡിറ്റ്സ് പൂർണ്ണമായി കഴിഞ്ഞതിനു ശേഷവുമാണ് പ്രദർശിപ്പിക്കുന്നത്. പ്രശസ്ത സംഗീത സംവിധായകൻ രവി ബസ്രൂർ ഈണമിട്ട ചിത്രത്തിലെ ഗാനങ്ങൾ ഇതിനകം തന്നെ ഐഎംഡിബി പട്ടികയിൽ ട്രെൻഡിംഗിൽ ഒന്നാമതാണ്.
ആനവേട്ടയുടെയും പകയുടെയും കഥ പറയുന്ന ഈ ഹൈ-വോൾട്ടേജ് ആക്ഷൻ ത്രില്ലറിന്റെ അഡ്വാൻസ് ബുക്കിംഗ് ഇപ്പോൾ പുരോഗമിക്കുകയാണെന്ന് വിതരണക്കാർ അറിയിച്ചു. തിയേറ്ററുകളിൽ എത്തുന്ന പ്രേക്ഷകർക്ക് മികച്ച ദൃശ്യവിരുന്ന് സമ്മാനിക്കുന്നതിനായി യഥാർത്ഥ ആനകളെ ഉപയോഗിച്ചാണ് സംഘട്ടന രംഗങ്ങൾ ചിത്രീകരിച്ചിരിക്കുന്നത്. അതിനാൽ സിനിമയുടെ ക്രെഡിറ്റ്സ് പൂർണ്ണമായി തീരുന്നതുവരെ ആരും സീറ്റുകളിൽ നിന്നും എഴുന്നേൽക്കരുതെന്നും, വേട്ട അവസാന നിമിഷം വരെ തുടരുമെന്നും അണിയറപ്രവർത്തകർ പ്രേക്ഷകരെ ഓർമ്മിപ്പിക്കുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
'Don't get up from your seat as soon as the movie ends'; 'Kaattalan' team warns audience
