കാനഡയിലെ മക്ഗിൽ സർവകലാശാലയിലെ ഗവേഷകർ കൗമാരക്കാരിലെ വിഷാദരോഗം നേരത്തെ കണ്ടെത്താനുള്ള ഒരു പുതിയ മാർഗം കണ്ടുപിടിച്ചിരിക്കുന്നു. അവർ നടത്തിയ പഠനത്തിൽ വിഷാദരോഗവുമായി ബന്ധപ്പെട്ട ഒമ്പത് പ്രത്യേക ബ്ലഡ് മോളിക്യൂൾസ് കണ്ടെത്തിയിട്ടുണ്ട്.സ്റ്റാൻഫോർഡ്, UCLA സർവകലാശാലകളുമായി സഹകരിച്ച് വികസിപ്പിച്ച പുതിയ ലബോറട്ടറി രീതി ഉപയോഗിച്ചാണ് ഈ കണ്ടെത്തൽ സാധ്യമായത്. 62 കൗമാരക്കാരിൽ നിന്ന് ശേഖരിച്ച ഉണങ്ങിയ രക്തസാമ്പിളുകൾ പരിശോധിച്ചപ്പോഴാണ് വിഷാദരോഗം ബാധിച്ചവരിൽ ഈ പ്രത്യേക മോളിക്യൂൾസിന്റെ അളവ് കൂടുതലാണെന്ന് കണ്ടെത്തിയത്.
ഏറ്റവും രസകരമായ കാര്യം ഈ ബ്ലഡ് മോളിക്യൂൾസ് വിഷാദരോഗത്തിന്റെ ലക്ഷണങ്ങളുമായി മാത്രമേ ബന്ധപ്പെട്ടിട്ടുള്ളൂ എന്നതാണ്. മനോവൈകല്യവുമായി ഇവയ്ക്ക് യാതൊരു ബന്ധവുമില്ല. കൂടാതെ ഒമ്പത് മാസത്തിനുശേഷവും ഈ മോളിക്യൂൾസിന് രോഗത്തിന്റെ തീവ്രത പ്രവചിക്കാൻ കഴിയുന്നുണ്ട്. ഗവേഷണത്തിന്റെ മറ്റൊരു പ്രധാന കണ്ടെത്തൽ ഈ ബ്ലഡ് മോളിക്യൂൾസ് അളവിലുള്ള മാറ്റം തലച്ചോറിലെ ഹിപ്പോകാമ്പസ് എന്ന ഭാഗത്തെ ഘടനാപരമായ മാറ്റങ്ങളുമായി ബന്ധപ്പെട്ടിരിക്കുന്നു എന്നതാണ്. വികാരനിയന്ത്രണത്തിൽ പ്രധാന പങ്കുവഹിക്കുന്ന തലച്ചോറിന്റെ ഭാഗമാണ് ഹിപ്പോകാമ്പസ്.
മാനസികരോഗങ്ങൾ ഗുരുതരമാകുന്നതിനും ചികിത്സയോട് പ്രതിരോധം കാണിക്കുന്നതിനും മുമ്പ് തന്നെ അവ കണ്ടെത്താൻ ഈ കണ്ടെത്തൽ സഹായിക്കും. ഇത് വിഷാദരോഗത്തിനുള്ള നേരത്തെയുള്ള ഇടപെടലിനും ചികിത്സയ്ക്കും വഴിയൊരുക്കും.
നിലവിൽ മക്ഗിൽ ഗവേഷകർ വിവിധ ജനവിഭാഗങ്ങളിൽ ഈ പഠനം വിപുലീകരിച്ചുകൊണ്ടിരിക്കുകയാണ്. ഇത് കണ്ടെത്തലുകൾ സ്ഥിരീകരിക്കാനും ഈ മോളിക്യൂൾസ് തലച്ചോറിന്റെ വികാസത്തെയും മാനസികാരോഗ്യത്തെയും എങ്ങനെ സ്വാധീനിക്കുന്നു എന്ന് മനസ്സിലാക്കാനും സഹായിക്കും. ഭാവിയിൽ ഈ രക്തപരിശോധന കൗമാരക്കാരിലെ മാനസികാരോഗ്യ പ്രശ്നങ്ങൾ നേരത്തെ കണ്ടെത്തുന്നതിനുള്ള ഒരു ലളിതവും ഫലപ്രദവുമായ മാർഗമായി മാറിയേക്കാം.
