ഡൽഹിയിൽ നടക്കുന്ന പ്രക്ഷോഭത്തിന് പിന്തുണ പ്രഖ്യാപിച്ചുകൊണ്ട് മകൾ വിസ്മയ മോഹൻലാൽ പങ്കുവെച്ച സോഷ്യൽ മീഡിയ പോസ്റ്റിന്റെ പേരിൽ നടൻ മോഹൻലാലിനെതിരെ കടുത്ത സൈബർ ആക്രമണം. വിസ്മയയുടെ ഇൻസ്റ്റഗ്രാം സ്റ്റോറി പ്രത്യക്ഷപ്പെട്ടതിന് തൊട്ടുപിന്നാലെയാണ് നടന്റെ സോഷ്യൽ മീഡിയ പ്രൊഫൈലുകളിൽ അധിക്ഷേപകരമായ കമന്റുകൾ നിറയാൻ തുടങ്ങിയത്. മകൾക്ക് രാജ്യസ്നേഹവും വകതിരിവും പഠിപ്പിച്ചു നൽകണമെന്ന ഉപദേശങ്ങളോടെയാണ് ഒരു വിഭാഗം ആളുകൾ രംഗത്തെത്തിയിരിക്കുന്നത്. ലോകകപ്പിൽ സ്പെയിനിന്റെ വിജയം ആഘോഷിച്ചുകൊണ്ട് മോഹൻലാൽ പങ്കുവെച്ച ചിത്രങ്ങൾ ഉൾപ്പെടെയുള്ള പോസ്റ്റുകൾക്ക് താഴെയാണ് ഇപ്പോൾ വലിയ രീതിയിൽ പ്രതിഷേധ സന്ദേശങ്ങൾ ഉയരുന്നത്.
വിസ്മയയുടെ അരങ്ങേറ്റ ചിത്രം റിലീസിന് ഒരുങ്ങുന്ന പശ്ചാത്തലത്തിൽ സിനിമ ബഹിഷ്കരിക്കുമെന്ന മുന്നറിയിപ്പുകളും ഭീഷണികളും സൈബർ ഇടങ്ങളിൽ ശക്തമാണ്. “പിതാവിന്റെ ചെലവിൽ വിദേശത്തിരുന്നുകൊണ്ട് ഭാരത സർക്കാരിനെ വിമർശിക്കേണ്ടതില്ല” എന്നും, “സിനിമ എത്ര മികച്ചതായാലും കാണില്ല” എന്നും തുടങ്ങിയ കമന്റുകളാണ് നടനെ ലക്ഷ്യമിട്ട് പ്രചരിക്കുന്നത്. മുൻപ് ചില സിനിമാ വിഷയങ്ങളുമായി ബന്ധപ്പെട്ടുണ്ടായ വിവാദങ്ങളെ ഓർമ്മിപ്പിച്ചുകൊണ്ട് ‘എമ്പുരാൻ’ പോലെയുള്ള ഷോക്കുകൾക്ക് ശേഷം കുടുംബത്തിൽ നിന്നുള്ള അടുത്ത തിരിച്ചടിയാണിതെന്ന രീതിയിലുള്ള വിമർശനങ്ങളും വിസ്മയയുടെ സ്ഥാനം കുപ്പത്തൊട്ടിയിലാണെന്ന തരത്തിലുള്ള കടുത്ത ആക്രോശങ്ങളും ഉന്നയിക്കപ്പെടുന്നുണ്ട്.
നേരത്തെ വിസ്മയയുടെ സ്വന്തം ഇൻസ്റ്റഗ്രാം അക്കൗണ്ടിലും സമാനമായ രീതിയിൽ അധിക്ഷേപ കമന്റുകൾ പ്രവഹിച്ചിരുന്നു. പ്രക്ഷോഭത്തെ പിന്തുണച്ച് രംഗത്തെത്തിയതോടെയാണ് മോഹൻലാലിന്റെ കുടുംബത്തിലേക്ക് സൈബർ വിചാരണ നീണ്ടത്. എന്നാൽ സമാനമായ രീതിയിൽ പ്രക്ഷോഭത്തിന് പിന്തുണ പ്രഖ്യാപിച്ച മറ്റു മുൻനിര സിനിമാ താരങ്ങൾക്കും നേരെയും മുൻപ് സൈബർ ആക്രമണങ്ങൾ നടന്നിരുന്നു. നടന്മാരായ കുഞ്ചാക്കോ ബോബൻ, ടൊവിനോ തോമസ് തുടങ്ങിയവരുടെ സോഷ്യൽ മീഡിയ പോസ്റ്റുകൾക്ക് താഴെയും സമാനമായ രീതിയിൽ അധിക്ഷേപങ്ങൾ ഉയർന്നുവന്നിരുന്ന പശ്ചാത്തലത്തിലാണ് ഇപ്പോൾ മോഹൻലാലിനും മകൾക്കുമെതിരെയും പ്രതിഷേധം കനക്കുന്നത്.
Cyber Attack on Mohanlal After Vismaya’s Delhi Protest Post
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
