കാനഡയിലെ ഒട്ടാവ നദിയിൽ മൃതദേഹം, ആളെ തിരിച്ചറിഞ്ഞിട്ടില്ല; അന്വേഷണം തുടങ്ങി

കാനഡയിൽ ക്ലാരൻസ്-റോക്ക്‌ലാൻഡ് പ്രദേശത്തെ ഒട്ടാവ നദിയിൽ മൃതദേഹം കണ്ടെത്തി. സംഭവത്തിൽ റസ്സൽ ഒപിപി അന്വേഷണം ആരംഭിച്ചു. ശനിയാഴ്ച വൈകുന്നേരം 5:30 ഓടെയാണ് നദിയിൽ മൃതദേഹം കണ്ടെത്തിയെന്ന റിപ്പോർട്ടുകൾ ലഭിച്ചതിനെ തുടർന്ന് ഉദ്യോഗസ്ഥർ സ്ഥലത്തെത്തിയത്. ആരുടേതാണ് മ‍ൃതദേഹമെന്ന് ഇതുവരെ തിരിച്ചറിഞ്ഞിട്ടില്ല. ഇതിനായി അന്വേഷണം നടക്കുകയാണ്. ഒപിപി ക്രിമിനൽ ഇൻവെസ്റ്റിഗേഷൻ ബ്രാഞ്ചിന്റെ നിർദ്ദേശപ്രകാരം റസ്സൽ കൗണ്ടി ക്രൈം യൂണിറ്റാണ് അന്വേഷണം നയിക്കുന്നത്, ചീഫ് കൊറോണറുടെ ഓഫീസുമായും ഒന്റാറിയോ ഫോറൻസിക് പാത്തോളജി സർവീസുമായും സഹകരിച്ചാണ് അന്വേഷണം പുരോ​ഗമിക്കുന്നത്. അന്വേഷണത്തിൽ സഹായകരമായേക്കാവുന്ന എന്തെങ്കിലും വിവരങ്ങൾ ഉള്ളവർ റസ്സൽ കൗണ്ടി ഒപിപിയെ 1-888-310-1122 എന്ന നമ്പറിൽ ബന്ധപ്പെടുകയോ ക്രൈം സ്റ്റോപ്പേഴ്‌സിന് സൂചന നൽകുകയോ ചെയ്യണമെന്ന് അധികൃതർ അഭ്യർത്ഥിക്കുന്നു.