കൃഷിമേഖലയിൽ പ്രതിസന്ധി: വളത്തിനും ഇന്ധനത്തിനും വില വർധിക്കുന്നത് കർഷകർക്ക് തിരിച്ചടിയാകുന്നു

ഒട്ടാവ : വസന്തകാല വിതയ്ക്കൽ നടപടികൾ പുരോഗമിക്കെ, ഡീസലിനും വളത്തിനും ഉണ്ടായ അമിതവിലക്കയറ്റം കർഷകരെ കടുത്ത പ്രതിസന്ധിയിലാക്കുന്നു. മിഡിൽ ഈസ്റ്റിൽ തുടരുന്ന സംഘർഷം ഉല്പന്നങ്ങളുടെ വില കുതിച്ചുയരാൻ കാരണമായതോടെ നൈട്രജൻ വളങ്ങളുടെയും ഇന്ധനത്തിന്റെയും ചെലവ് ഗണ്യമായി വർധിച്ചു. നിലവിലെ സീസണിലെ ലാഭവിഹിതത്തെ ഇത് ബാധിക്കുമെന്നതിനൊപ്പം, വരാനിരിക്കുന്ന 2027-ലെ വിളവർഷത്തെക്കുറിച്ചും കർഷകർ ആശങ്ക പ്രകടിപ്പിക്കുന്നതായി റിപ്പോർട്ടുകൾ വ്യക്തമാക്കുന്നു.

നൈട്രജൻ വളങ്ങൾക്ക് കഴിഞ്ഞ വർഷത്തെ അപേക്ഷിച്ച് 40 ശതമാനം വരെ വില വർധിച്ചതായി കർഷകർ ചൂണ്ടിക്കാട്ടുന്നു. ഈ സാഹചര്യം കാനോള, ചോളം തുടങ്ങിയ കൂടുതൽ വളം ആവശ്യമുള്ള വിളകളുടെ കൃഷി കുറയ്ക്കാൻ കർഷകരെ നിർബന്ധിതരാക്കും. ഇതിന് പകരമായി വളം കുറഞ്ഞ അളവിൽ മതിയെന്നതിനാൽ പയർവർഗ്ഗങ്ങളുടെ കൃഷിയിലേക്ക് പലരും മാറിയേക്കാം. രാജ്യത്ത് ഡീസൽ വിലയിൽ കഴിഞ്ഞ 12 മാസത്തിനിടെ 50 ശതമാനത്തിലധികം വർധനവാണ് രേഖപ്പെടുത്തിയിരിക്കുന്നത്. നിലവിൽ ലിറ്ററിന് ശരാശരി 2.18 ഡോളറാണ് ചില്ലറ വില.

ഹോർമുസ് കടലിടുക്ക് വഴിയുള്ള നീക്കങ്ങളിൽ മിഡിൽ ഈസ്റ്റ് സംഘർഷം സൃഷ്ടിക്കുന്ന തടസ്സങ്ങൾ ആഗോള വളം വിപണിയെ സ്വാധീനിക്കുന്നതായി ഫാം ക്രെഡിറ്റ് കാനഡയിലെ (FCC) ചീഫ് ഇക്കണോമിസ്റ്റ് ക്രെയ്ഗ് ജോൺസ്റ്റൺ അറിയിച്ചു. ആഗോളതലത്തിൽ ഉല്പാദിപ്പിക്കപ്പെടുന്ന നൈട്രജൻ വളത്തിന്റെ 30 ശതമാനവും ഈ മേഖലയിലൂടെയാണ് കടന്നുപോകുന്നത്. ഉയർന്ന വിതരണച്ചെലവ് കാരണം കാനഡയിലെ 55 ലക്ഷം ഏക്കറോളം കൃഷിഭൂമിയിൽ ഇത്തവണ വിളമാറ്റം ഉണ്ടായേക്കാമെന്നും കൃഷി ചെയ്യാത്ത ഭൂമിയുടെ അളവ് 14 ലക്ഷം ഏക്കറായി വർധിച്ചേക്കാമെന്നും എഫ്.സി.സി വിലയിരുത്തുന്നു.

കർഷകർക്ക് തങ്ങളുടെ ഉല്പന്നങ്ങൾക്ക് വിപണിയിൽ സ്വയം വില നിശ്ചയിക്കാൻ സാധിക്കാത്തത് പ്രതിസന്ധിയുടെ ആഘാതം വർധിപ്പിക്കുന്നു. ആഗോള വിപണിയിലെ വില നിലവാരത്തിനനുസരിച്ച് വിളകൾ വിൽക്കാൻ നിർബന്ധിതരാകുന്ന കർഷകർക്ക് ഉയർന്ന ഉല്പാദനച്ചെലവ് സ്വന്തം നിലയിൽ സഹിക്കേണ്ടി വരുന്നു. കൃഷിഭൂമിയിലെ ഈ ചെലവ് വർധനവ് നേരിട്ട് ഭക്ഷണസാധനങ്ങളുടെ വിലയെ ബാധിക്കില്ലെങ്കിലും, ചരക്കുനീക്കത്തിനുള്ള ഇന്ധനച്ചെലവ് വർധിക്കുന്നത് വരും മാസങ്ങളിൽ പലചരക്ക് സാധനങ്ങളുടെ വിലക്കയറ്റത്തിന് കാരണമാകുമെന്ന് സാമ്പത്തിക വിദഗ്ധർ വിലയിരുത്തുന്നു.

Crisis in the agricultural sector: Rising prices of fertilizer and fuel are a setback for farmers

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt