കാലിഫോർണിയ: സ്വന്തമായി പുതിയ എഐ ഹാർഡ്വെയർ ഉപകരണങ്ങൾ വികസിപ്പിക്കുന്നതിനിടെ ആപ്പിളിന്റെ വ്യാപാര രഹസ്യങ്ങൾ (Trade Secrets) നിയമവിരുദ്ധമായി ചോർത്തിയെന്ന് ആരോപിച്ച് പ്രമുഖ ആർട്ടിഫിഷ്യൽ ഇന്റലിജൻസ് കമ്പനിയായ ഓപ്പൺഎഐക്കെതിരെ ആപ്പിൾ കോടതിയെ സമീപിച്ചു. കാലിഫോർണിയ ഫെഡറൽ കോടതിയിലാണ് ആപ്പിൾ കേസ് ഫയൽ ചെയ്തത്. മുൻപ് ഐഫോൺ, ആപ്പിൾ വാച്ച് എന്നിവയുടെ രൂപകൽപ്പനയിൽ പ്രധാന പങ്കുവഹിച്ച ടാങ് ടാൻ, മുൻ ഇലക്ട്രിക്കൽ എൻജിനീയറായ ചാങ് ലിയു എന്നീ മുൻ ആപ്പിൾ ജീവനക്കാരെയും കേസിൽ പ്രതികളാക്കിയിട്ടുണ്ട്. നിലവിൽ ഇരുവരും ഓപ്പൺഎഐയിലാണ് ജോലി ചെയ്യുന്നത്.
മുൻ ജീവനക്കാർ ആപ്പിളിന്റെ രഹസ്യ വിവരങ്ങൾ അനധികൃതമായി ഓപ്പൺഎഐക്ക് വേണ്ടി ഉപയോഗിച്ചെന്നാണ് കമ്പനിയുടെ പ്രധാന വാദം. ചാങ് ലിയു കമ്പനി വിട്ടതിന് ശേഷവും ആപ്പിളിന്റെ ഉപകരണങ്ങൾ വഴി രഹസ്യ ഹാർഡ്വെയർ ഫയലുകൾ ഡൗൺലോഡ് ചെയ്തതായും, ടാങ് ടാൻ ആപ്പിളിലെ ഉദ്യോഗാർഥികളോട് അഭിമുഖത്തിനായി യഥാർത്ഥ ആപ്പിൾ ഭാഗങ്ങൾ കൊണ്ടുവരാൻ ആവശ്യപ്പെട്ടതായും കേസിൽ ആരോപിക്കുന്നു. കൂടാതെ, പുതിയ എഐ ഉപകരണ നിർമ്മാണത്തിനായി ഓപ്പൺഎഐ ഏറ്റെടുത്ത ‘io Products’ എന്ന കമ്പനിയെയും കേസിൽ പ്രതി ചേർത്തിട്ടുണ്ട്. എന്നാൽ തങ്ങൾക്ക് മറ്റ് കമ്പനികളുടെ വ്യാപാര രഹസ്യങ്ങളിൽ താല്പര്യമില്ലെന്നും നവീന സാങ്കേതികവിദ്യകൾ വികസിപ്പിക്കുന്നതിലാണ് ശ്രദ്ധയെന്നും വ്യക്തമാക്കിയ ഓപ്പൺഎഐ വക്താവ് ഡ്രൂ പുസതേരി ആരോപണങ്ങൾ നിഷേധിച്ചു.
2024-ൽ ഐഫോണിൽ ചാറ്റ്ജിപിടി സാങ്കേതികവിദ്യ ലഭ്യമാക്കാൻ ഇരു കമ്പനികളും തമ്മിൽ പങ്കാളിത്തം ആരംഭിച്ചിരുന്നു. എന്നാൽ എഐ ഹാർഡ്വെയർ രംഗത്തേക്ക് ഓപ്പൺഎഐ കൂടി കടന്നുവരുന്നതോടെ ഈ ബന്ധം വലിയ മത്സരത്തിലേക്ക് മാറുകയാണ്. ഈ വർഷാവസാനത്തോടെ പുതിയ ഹാർഡ്വെയർ ഉൽപ്പന്നം വിപണിയിലെത്തിക്കുമെന്ന് ഓപ്പൺഎഐയുടെ ചീഫ് ഫിനാൻഷ്യൽ ഓഫീസർ സാറ ഫ്രയർ നേരത്തെ അറിയിച്ചിരുന്നു. ഗൂഗിൾ, ആൻത്രോപിക് തുടങ്ങിയ വൻകിട കമ്പനികളിൽ നിന്നുള്ള കടുത്ത മത്സരവും ഓഹരി വിപണി പ്രവേശനത്തിനുള്ള ഒരുക്കങ്ങളും നടത്തുന്നതിനിടയിലാണ് ഓപ്പൺഎഐ ഇപ്പോൾ പുതിയ നിയമക്കുരുക്കിൽ അകപ്പെട്ടിരിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Complaint of trade secret theft: Apple initiates legal action against OpenAI.
