യാത്രക്കാർ ശ്രദ്ധിക്കുക! ആംഗസ് എൽ മക്ഡൊണാൾഡ് പാലത്തിൽ ഓഗസ്റ്റിൽ ഗതാഗത നിയന്ത്രണം

ഹാലിഫാക്സ്: പ്രാദേശിക കമ്മ്യൂണിറ്റി പരിപാടികൾക്കും അത്യാവശ്യ അറ്റകുറ്റപ്പണികൾക്കുമായി ആഗസ്റ്റ് മാസത്തിൽ ആംഗസ് എൽ മക്ഡൊണാൾഡ് പാലത്തിൽ (Angus L. Macdonald Bridge) പല ഘട്ടങ്ങളിലായി ഗതാഗത നിയന്ത്രണം ഏർപ്പെടുത്തുന്നു. ഓഗസ്റ്റ് രണ്ട് ഞായറാഴ്ച സംഘടിപ്പിക്കുന്ന ‘ഹാർബർ ഹസ്റ്റിൽ’, ‘ബ്രിഡ്ജ് വാക്ക്’ എന്നീ ജനകീയ പരിപാടികൾക്കായാണ് പാലം ആദ്യമായി അടച്ചിടുന്നത്. രാവിലെ എട്ട് മണി മുതൽ വൈകുന്നേരം 5:30 വരെയായിരിക്കും ഈ നിയന്ത്രണം. അതേസമയം, കാൽനടയാത്രക്കാർക്കും സൈക്കിൾ യാത്രക്കാർക്കും പ്രത്യേക ബൈക്ക് ലൈൻ വഴി സഞ്ചരിക്കാൻ തടസ്സമുണ്ടാകില്ല.

ഓഗസ്റ്റ് രണ്ടിന് രാവിലെ 10 മണിക്ക് ആരംഭിക്കുന്ന ‘ഹാർബർ ഹസ്റ്റിൽ’ മത്സരത്തിൽ എല്ലാ പ്രായക്കാർക്കുമുള്ള ഓട്ടമത്സരങ്ങളാണ് ഉൾപ്പെടുത്തിയിരിക്കുന്നത്. എല്ലാ ടിക്കറ്റുകളും ഇതിനോടകം വിറ്റുതീർന്ന ഈ പരിപാടിയിലൂടെ ഡാർട്ട്മൗത്തിലെ ‘ദി നോർത്ത് ഗ്രോവ്’ ഫാമിലി സർവീസസ് സെന്ററിനായി 2,500 ഡോളറിലധികം സമാഹരിക്കാൻ സാധിച്ചതായി ഹാലിഫാക്സ് ഹാർബർ ബ്രിഡ്ജസ് അറിയിച്ചു. തുടർന്ന് ഉച്ചയ്ക്ക് രണ്ട് മണി മുതൽ നാല് മണി വരെയാണ് ‘ബ്രിഡ്ജ് വാക്ക്’ പരിപാടി നടക്കുക.

കുടുംബങ്ങൾക്കായി ഒരുക്കുന്ന ഈ സൗജന്യ വിനോദ പരിപാടിയിൽ തത്സമയ സംഗീതപരിപാടികൾ, വിവിധ വിനോദങ്ങൾ എന്നിവയുണ്ടാകും. ജോൺ അൽഫോൺസ് ബാൻഡ്, യൂഫോണിക് ബ്ലെൻഡ്, കൈസൻ പ്രോ റെസ്ലിംഗ് എന്നിവരുടെ പ്രകടനങ്ങളും ഇതിൽ ഉൾപ്പെടുന്നു. കൂടാതെ 35-ലധികം കമ്മ്യൂണിറ്റി സംഘടനകളുടെ സ്റ്റാളുകൾ, ആധുനികവും പഴയതുമായ ഫയർ ട്രക്കുകൾ, ഭാരമേറിയ പാലം പരിപാലന ഉപകരണങ്ങൾ എന്നിവയും ഇവിടെ പ്രദർശിപ്പിക്കും. സന്ദർശകർക്ക് എഞ്ചിനീയർമാരെ നേരിട്ട് കാണാനും ചീഫ് ആർട്ടിസ്റ്റ് ജെയ്സൺ സ്കിന്നർക്കൊപ്പം ചോക്ക് ആർട്ട് പരിശീലിക്കാനും സൗജന്യ പലഹാരങ്ങൾ ആസ്വദിക്കാനും അവസരമുണ്ടാകും.

ജനകീയ കൂട്ടായ്മകൾക്ക് പുറമെ, പാലത്തിലെ ലൈൻ കൺട്രോൾ ബോർഡുകൾ മാറ്റിവെക്കുന്നതിനായി ആഗസ്റ്റ് മാസത്തിൽ 12 രാത്രികളിൽ പാലം പൂർണ്ണമായും അടച്ചിട്ട് അറ്റകുറ്റപ്പണികൾ നടത്തും. രാത്രി ഒൻപത് മണി മുതൽ രാവിലെ അഞ്ച് മണി വരെയായിരിക്കും ഈ നിയന്ത്രണം. അറ്റകുറ്റപ്പണി നടക്കുന്ന രാത്രികളിലും കാൽനടയാത്രക്കാർക്കും സൈക്കിൾ യാത്രക്കാർക്കും പാലം ഉപയോഗിക്കാനുള്ള സൗകര്യം ലഭ്യമായിരിക്കും.

ഓഗസ്റ്റ് 10 മുതൽ 12 വരെ, ഓഗസ്റ്റ് 17 മുതൽ 19 വരെ, ഓഗസ്റ്റ് 24 മുതൽ 26 വരെ, ഓഗസ്റ്റ് 31 മുതൽ സെപ്റ്റംബർ രണ്ട് വരെയുള്ള തീയതികളിലാണ് രാത്രികാല അറ്റകുറ്റപ്പണികൾ ക്രമീകരിച്ചിരിക്കുന്നത്. പാലം അടച്ചിടുന്ന സമയങ്ങളിൽ വാഹനമോടിക്കുന്നവർ എ. മുറെ മക്കേ പാലമോ (A. Murray MacKay Bridge) മറ്റ് ബദൽ മാർഗ്ഗങ്ങളോ ഉപയോഗിക്കണമെന്ന് ഹാലിഫാക്സ് ഹാർബർ ബ്രിഡ്ജസ് അധികൃതർ അഭ്യർത്ഥിച്ചു.

Commuters beware! Traffic restrictions on Angus L. McDonald Bridge in August

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt