ഷാർലറ്റ്ടൗൺ: ഷാർലറ്റ്ടൗണിൽ വാഹന പാർക്കിംഗ് സൗകര്യമില്ലാതെ ജനങ്ങളും വ്യാപാരികളും കടുത്ത ബുദ്ധിമുട്ടിൽ. നിലവിലെ ജനസംഖ്യാ വർധനവിന് പുറമേ, നവീകരണ പ്രവർത്തനങ്ങൾക്കായി പ്രധാന പാർക്കിംഗ് ഗാരേജ് അടച്ചതോടെ 230 പാർക്കിംഗ് ഇടങ്ങൾ താൽക്കാലികമായി നഷ്ടമായതാണ് ഇപ്പോഴത്തെ കടുത്ത പ്രതിസന്ധിക്ക് കാരണമായിരിക്കുന്നത്. വരാനിരിക്കുന്ന വേനൽക്കാലത്ത് വിനോദസഞ്ചാരികളുടെ ഒഴുക്ക് വർധിക്കുന്നതോടെ നഗരത്തിലെ സ്ഥിതി കൂടുതൽ മോശമാകുമെന്നാണ് പ്രാദേശിക വ്യവസായികളും താമസക്കാരും ആശങ്കപ്പെടുന്നത്.
പാർക്കിംഗ് ഇടം കണ്ടെത്താൻ ജീവനക്കാർക്കും ഉപഭോക്താക്കൾക്കും 20 മിനിറ്റിലധികം സമയം നഷ്ടപ്പെടുന്നതായി നഗരത്തിലെ വ്യാപാരികൾ വ്യക്തമാക്കുന്നു. ശാരീരിക വെല്ലുവിളികൾ നേരിടുന്നവർക്കുള്ള പ്രത്യേക ആക്സസിബിൾ പാർക്കിംഗ് സൗകര്യങ്ങൾ നഗരത്തിൽ വളരെ കുറവാണെന്നും പരാതിയുണ്ട്. നിലവിൽ മൂന്ന് പ്രധാന പാർക്കിംഗ് ഗാരേജുകളിൽ ഒന്നായ പൗണൽ (Pownal) ഗാരേജ് പൂർണ്ണമായും അടച്ചിട്ടിരിക്കുകയാണ്. ബാക്കി രണ്ട് ഗാരേജുകളിലായി നിലവിൽ 380 പാർക്കിംഗ് ഇടങ്ങൾ മാത്രമാണ് ലഭ്യമായിട്ടുള്ളത്. പ്രധാന റോഡുകളിൽ നിന്ന് മാറി ഒന്നോ രണ്ടോ ബ്ലോക്കുകൾ നടക്കാൻ തയ്യാറുള്ളവർക്ക് ചില സമയങ്ങളിൽ പാർക്കിംഗ് ലഭിക്കുന്നുണ്ടെങ്കിലും ഇത് എല്ലാവർക്കും പ്രായോഗികമല്ലെന്നാണ് ജനങ്ങളുടെ പക്ഷം.
പ്രതിസന്ധിക്ക് ശാശ്വത പരിഹാരം കാണുന്നതിനായി ഷാർലറ്റ്ടൗൺ നഗരസഭ ഒരു കൺസൾട്ടിങ് ഏജൻസിയുമായി ചേർന്ന് പുതിയ പാർക്കിംഗ് തന്ത്രം രൂപീകരിച്ചു വരികയാണ്. പൊതുജനങ്ങളിൽ നിന്ന് ശേഖരിച്ച സർവേ വിവരങ്ങളുടെ അടിസ്ഥാനത്തിൽ തയ്യാറാക്കുന്ന ഈ പുതിയ പദ്ധതി അടുത്ത ഏതാനും ആഴ്ചകൾക്കുള്ളിൽ നഗരസഭാ കൗൺസിലിന് മുന്നിൽ സമർപ്പിക്കും. കൂടാതെ, ഗ്രേറ്റ് ജോർജ്ജ്, സിഡ്നി തെരുവുകൾ ചേരുന്ന ജംഗ്ഷനിൽ പുതിയ രണ്ട് നില പാർക്കിംഗ് സമുച്ചയം നിർമിക്കാനുള്ള നിർദേശവും നഗരസഭയുടെ പരിഗണനയിലുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Charlottetown city without parking spaces; residents and businesses in distress
