ഒന്റാരിയോ; ടൊറന്റോയിലെ പ്രമുഖ ഹോസ്പിറ്റലിൽ ജോലി ചെയ്യുന്ന 44-കാരനായ ഡോക്ടർക്കെതിരെ കുട്ടികളുടെ ലൈംഗിക ചൂഷണവുമായി ബന്ധപ്പെട്ട ദൃശ്യങ്ങൾ കൈവശംവെച്ചതും അവ ആക്സസ് ചെയ്തതുമായി ബന്ധപ്പെട്ട കുറ്റങ്ങൾ ചുമത്തി ടൊറന്റോ പൊലീസ് അറസ്റ്റ് ചെയ്തു.
ഇലക്ട്രോണിക് ഉപകരണം ഉപയോഗിച്ച് ഇത്തരം ഉള്ളടക്കങ്ങൾ ഡൗൺലോഡ് ചെയ്ത് സൂക്ഷിച്ചെന്ന വിവരത്തെ തുടർന്നാണ് ഇന്റർനെറ്റ് ചൈൽഡ് എക്സ്പ്ലോയിറ്റേഷൻ യൂണിറ്റ് അന്വേഷണം ആരംഭിച്ചത്. ഈ വർഷം ഫെബ്രുവരിയിൽ ആശുപത്രിയിലും പ്രതിയുടെ വസതിയിലും നടത്തിയ പരിശോധനയിൽ ജോലിസ്ഥലത്തെ കമ്പ്യൂട്ടർ ഉൾപ്പെടെ നിരവധി ഇലക്ട്രോണിക് ഉപകരണങ്ങൾ പൊലീസ് പിടിച്ചെടുത്തു.
അന്വേഷണത്തിന്റെ നിലവിലെ ഘട്ടത്തിൽ, പിടിച്ചെടുത്ത ദൃശ്യങ്ങൾ ഡോക്ടറുടെ ചികിത്സാ പ്രവർത്തനങ്ങളുമായോ രോഗികളുമായോ ബന്ധപ്പെട്ടതാണെന്നതിന് തെളിവുകളൊന്നും ലഭിച്ചിട്ടില്ലെന്ന് പൊലീസ് അറിയിച്ചു. പ്രതിക്കെതിരായ കുറ്റങ്ങൾ ഇതുവരെ കോടതിയിൽ തെളിയിക്കപ്പെട്ടിട്ടില്ലെന്നും കേസ് ടൊറന്റോ കോടതിയുടെ പരിഗണനയിലാണെന്നും അധികൃതർ വ്യക്തമാക്കി.
സംഭവത്തിൽ കടുത്ത ആശങ്കയും നിരാശയും രേഖപ്പെടുത്തിയ ആശുപത്രി അധികൃതർ, രോഗികളുടെയും കുടുംബങ്ങളുടെയും ജീവനക്കാരുടെയും സുരക്ഷയ്ക്കാണ് പരമപ്രാധാന്യമെന്ന് അറിയിച്ചു. അന്വേഷണം സംബന്ധിച്ച വിവരം ലഭിച്ച ഉടൻ തന്നെ ഡോക്ടറെ ജോലിയിൽ നിന്ന് അവധിയിൽ പ്രവേശിപ്പിച്ചെന്നും, രോഗികൾക്കും കുടുംബങ്ങൾക്കും നിലവിൽ യാതൊരു സുരക്ഷാഭീഷണിയും കണ്ടെത്തിയിട്ടില്ലെന്ന് പൊലീസിന്റെ അറിയിപ്പിൽ വ്യക്തമാക്കിയിട്ടുണ്ടെന്നും ആശുപത്രി അറിയിച്ചു.
ബന്ധപ്പെട്ട രോഗികളുടെ കുടുംബങ്ങൾക്ക് ആശങ്കകളുണ്ടെങ്കിൽ ആശുപത്രിയുടെ പേഷ്യന്റ് റിലേഷൻസ് വിഭാഗവുമായി ബന്ധപ്പെടാമെന്നും, കേസുമായി ബന്ധപ്പെട്ട കൂടുതൽ വിവരങ്ങൾ അറിയാവുന്നവർ പൊലീസിനെ അറിയിക്കണമെന്നും അധികൃതർ അഭ്യർഥിച്ചു.
Case involving visuals of child sexual exploitation: Action taken against prominent Toronto hospital doctor.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
