റെജൈന: തിരഞ്ഞെടുക്കപ്പെട്ടാല്‍ ആദ്യ 100 ദിവസത്തിനകം ആരോഗ്യരംഗത്ത് പ്രാദേശിക ഉപദേശക സമിതികള്‍ രൂപീകരിക്കുമെന്ന് സസ്‌കാച്വാന്‍ എന്‍ഡിപി നേതാവ് കാര്‍ല ബെക്ക്. പ്രവിശ്യയിലെ ആരോഗ്യപരിചരണവുമായി ബന്ധപ്പെട്ട പ്രധാന തീരുമാനങ്ങളില്‍ പ്രാദേശിക ജനങ്ങളുടെ അഭിപ്രായം കൂടി പരിഗണിക്കുകയാണ് ലക്ഷ്യം.
തിങ്കളാഴ്ച റെജൈനയില്‍ നടന്ന എന്‍ഡിപി നേതാക്കളുടെ അത്താഴവിരുന്നിലാണ് ബെക്ക് പ്രഖ്യാപനം നടത്തിയത്. 2011-നുശേഷം ആദ്യമായാണ് പാര്‍ട്ടി ഇത്തരമൊരു നേതൃവിരുന്ന് സംഘടിപ്പിച്ചത്. 2028-ലെ പ്രവിശ്യാ തിരഞ്ഞെടുപ്പില്‍ അധികാരം പിടിക്കാനാണ് പാര്‍ട്ടി ലക്ഷ്യമിടുന്നതെന്നും ബെക്ക് വ്യക്തമാക്കി.
സസ്‌കാച്വാന്‍ ഹെല്‍ത്ത് അതോറിറ്റി (SHA) രൂപീകരിച്ചതോടെ ആരോഗ്യരംഗത്തെ തീരുമാനങ്ങളില്‍ പ്രാദേശിക ജനങ്ങളുടെ ശബ്ദം കുറഞ്ഞെന്നാണ് ബെക്കിന്റെ വിമര്‍ശനം. പ്രാദേശിക അഭിപ്രായങ്ങള്‍ ഉള്‍പ്പെടുത്തുന്നതിനായി കമ്മ്യൂണിറ്റി അഡൈ്വസറി നെറ്റ്വര്‍ക്കുകള്‍ രൂപീകരിക്കുമെന്ന് നേരത്തേ വാഗ്ദാനം ചെയ്തിരുന്നെങ്കിലും പത്ത് വര്‍ഷമായിട്ടും നടപ്പാക്കിയിട്ടില്ലെന്നും അവര്‍ പറഞ്ഞു.
അധികാരത്തിലെത്തിയാല്‍ ആദ്യ 100 ദിവസത്തിനകം ഈ സമിതികള്‍ നിലവില്‍ വരുത്തുമെന്നാണ് ബെക്കിന്റെ ഉറപ്പ്. ആരോഗ്യപരിചരണവുമായി ബന്ധപ്പെട്ട വലിയ തീരുമാനങ്ങളില്‍ പ്രാദേശിക ആവശ്യങ്ങളും കാഴ്ചപ്പാടുകളും ഉള്‍പ്പെടുത്താന്‍ ഇതിലൂടെ കഴിയുമെന്നാണ് എന്‍ഡിപി പ്രതീക്ഷിക്കുന്നത്.
2017 ഡിസംബറിലാണ് സസ്‌കാച്ചെവന്‍ ഹെല്‍ത്ത് അതോറിറ്റി രൂപീകരിച്ചത്. പ്രവിശ്യയിലെ 12 പ്രാദേശിക ആരോഗ്യ അതോറിറ്റികളെ സംയോജിപ്പിച്ചായിരുന്നു നടപടി. നിലവില്‍ വിവിധ പ്രദേശങ്ങളിലെ ജനങ്ങളുടെ ആവശ്യങ്ങള്‍ക്കനുസരിച്ച് ആരോഗ്യസേവനങ്ങളും പദ്ധതികളും ക്രമീകരിക്കുന്നതിനായി ഹെല്‍ത്ത് നെറ്റ്വര്‍ക്കുകള്‍ ഉപയോഗിക്കുന്നുണ്ടെന്ന് അതോറിറ്റിയുടെ വെബ്സൈറ്റ് വ്യക്തമാക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Carla Beck Promises Local Health Advisory Committees’
