ടൊറന്റോ: ലോകമെമ്പാടുമുള്ള പ്രമുഖ വിനോദസഞ്ചാര കേന്ദ്രങ്ങളിലെ അമിത തിരക്ക് (ഓവർ ടൂറിസം) കാനഡക്കാരുടെ യാത്രാ ശീലങ്ങളിൽ വലിയ മാറ്റങ്ങൾ വരുത്തുന്നതായി പുതിയ സർവേ റിപ്പോർട്ട്. ജനപ്രിയ കേന്ദ്രങ്ങളിലേക്കുള്ള സ്വപ്നയാത്രകൾ പൂർണ്ണമായി ഉപേക്ഷിക്കുന്നതിന് പകരം, തിരക്ക് കുറഞ്ഞ സമയങ്ങളിൽ യാത്ര ചെയ്യാനും പ്രാദേശിക സംസ്കാരങ്ങളെ ബഹുമാനിക്കാനും കാനഡക്കാർ തയ്യാറെടുക്കുന്നതായാണ് വ്യക്തമാകുന്നത്. ഫ്ലൈറ്റ് സെന്റർ കാനഡയ്ക്കായി പ്രശസ്ത ഗവേഷണ ഏജൻസിയായ യുഗവ് (YouGov) നടത്തിയ പുതിയ സർവേയിലാണ്, 2026-ലെ തങ്ങളുടെ യാത്രാ പദ്ധതികൾ പുതുക്കാൻ 93 ശതമാനം സഞ്ചാരികളും തീരുമാനിച്ചതായി വെളിപ്പെടുത്തിയത്.
ടൂറിസം കേന്ദ്രങ്ങളിലെ അമിത തിരക്കും യാത്രാ സുഖം കുറയുന്നതുമാണ് സഞ്ചാരികളെ പ്രധാനമായും ആശങ്കപ്പെടുത്തുന്നത്. എങ്കിലും ജപ്പാൻ, ഇറ്റലി തുടങ്ങിയ രാജ്യങ്ങളിലേക്ക് കാനഡയിൽ നിന്നുള്ള ബുക്കിംഗുകളിൽ വലിയ വർധനവാണ് ഈ വർഷം രേഖപ്പെടുത്തിയിരിക്കുന്നത്. കഴിഞ്ഞ വർഷത്തെ അപേക്ഷിച്ച് ജപ്പാനിലേക്കുള്ള ബുക്കിംഗ് 52 ശതമാനവും ഇറ്റലി, അയർലൻഡ് എന്നിവിടങ്ങളിലേക്ക് 15 ശതമാനവും വർധിച്ചു. യാത്ര ചെയ്യുന്ന സ്ഥലങ്ങളോട് ഉത്തരവാദിത്തം കാണിക്കണമെന്ന് സർവേയിൽ പങ്കെടുത്ത 94 ശതമാനം പേരും അഭിപ്രായപ്പെട്ടു. അമിത തിരക്ക് നിയന്ത്രിക്കുന്നതിനായി വിനോദസഞ്ചാര ടൂറിസ്റ്റ് ഫീസ് ഏർപ്പെടുത്തുന്നതിനെ അനുകൂലിക്കുന്നവരുടെ എണ്ണം കഴിഞ്ഞ വർഷത്തെ 57 ശതമാനത്തിൽ നിന്നും 71 ശതമാനമായി ഉയരുകയും ചെയ്തിട്ടുണ്ട്.
പ്രശ്നങ്ങൾ ഒഴിവാക്കാൻ തന്ത്രപരമായ മറ്റ് മാർഗ്ഗങ്ങളാണ് കാനഡക്കാർ ഇപ്പോൾ സ്വീകരിക്കുന്നത്. സർവേ പ്രകാരം 47% പേർ തിരക്ക് കുറഞ്ഞ ‘ഓഫ്-സീസൺ’ സമയങ്ങളിൽ യാത്ര ചെയ്യാൻ താല്പര്യപ്പെടുമ്പോൾ, 41% പേർ അധികമാരും സന്ദർശിക്കാത്ത പുതിയ സ്ഥലങ്ങളാണ് തിരഞ്ഞെടുക്കുന്നത്. കൂടാതെ, യാത്ര ചെയ്യുന്ന സ്ഥലങ്ങളിലെ വലിയ കമ്പനികൾക്ക് പകരം അവിടുത്തെ പ്രാദേശിക കടകളെയും ഹോട്ടലുകളെയും പിന്തുണയ്ക്കുമെന്ന് 49 ശതമാനം പേർ വ്യക്തമാക്കി. കാനഡക്കാർ തങ്ങളുടെ സ്വപ്നയാത്രകൾ മാറ്റിവെക്കുന്നില്ലെന്നും, എന്നാൽ പ്രദേശവാസികൾക്ക് ബുദ്ധിമുട്ടുണ്ടാക്കാത്ത രീതിയിൽ കൂടുതൽ ഉത്തരവാദിത്തത്തോടെ യാത്ര ചെയ്യാൻ അവർ ശീലിക്കുകയാണെന്നും ഫ്ലൈറ്റ് സെന്റർ കാനഡയിലെ യാത്രാ വിദഗ്ധ ആഷ്ലി ഹരോൾഡ് വ്യക്തമാക്കി.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canadians change travel plans; 93% turn to new strategies to avoid overcrowding
