ടൊറന്റോ: അമേരിക്ക കനേഡിയൻ ഉൽപ്പന്നങ്ങൾക്ക് മേൽ ഏർപ്പെടുത്തിയ പുതിയ വാണിജ്യ താരിഫുകൾ കാനഡയിലെ വിവിധ നഗരങ്ങളിലെ ബിസിനസുകളെയും വ്യവസായങ്ങളെയും വൻ സാമ്പത്തിക പ്രതിസന്ധിയിലേക്ക് തള്ളിവിട്ടതായി ടൊറന്റോ സർവകലാശാലയിലെ ഗവേഷകരുടെ പുതിയ പഠനം വ്യക്തമാക്കുന്നു. യൂണിവേഴ്സിറ്റി ഓഫ് ടൊറന്റോയിലെ ‘സ്കൂൾ ഓഫ് സിറ്റീസ്’ തയ്യാറാക്കിയ ‘മാപ്പിംഗ് താരിഫ്സ്’ (Mapping Tariffs) എന്ന പഠനറിപ്പോർട്ടിലാണ് വിവിധ നഗരങ്ങളിലെ തൊഴിലാളികളും വ്യാപാരികളും നേരിടുന്ന ഭീഷണിയെക്കുറിച്ചുള്ള വിവരങ്ങൾ അടങ്ങിയിരിക്കുന്നത്.
ഈ വാണിജ്യ തർക്കത്തിന്റെ ആഘാതം ഏറ്റവും കൂടുതൽ അനുഭവപ്പെടുന്നത് കാനഡയിലെ പ്രധാന സാമ്പത്തിക കേന്ദ്രങ്ങളിലൊന്നായ ടൊറന്റോയിലാണ്. പ്രദേശത്തെ ഏകദേശം 66,000 തൊഴിലാളികളെയും 3,000-ത്തിലധികം ബിസിനസ് സ്ഥാപനങ്ങളെയും താരിഫ് നയങ്ങൾ നേരിട്ട് ബാധിച്ചിട്ടുണ്ട്. എന്നാൽ ടൊറന്റോയുടെ സാമ്പത്തിക അടിത്തറ വ്യവസായ വൈവിധ്യത്താൽ സമ്പന്നമായതിനാൽ ചില ചെറിയ നഗരങ്ങളെ അപേക്ഷിച്ച് ഉടനടിയുള്ള പ്രഹരം ഒരു പരിധി വരെ പ്രതിരോധിക്കാൻ സാധിക്കുന്നുണ്ടെന്ന് ഗവേഷണത്തിന് നേതൃത്വം നൽകിയ പ്രൊഫസർ താരാ വിനോദ്രായ് ചൂണ്ടിക്കാണിക്കുന്നു.
വലിയ നഗരപ്രദേശങ്ങൾക്ക് പുറമേ സമീപ മേഖലകളിലും ഇതിന്റെ പ്രതിഫലനം ശക്തമാണ്. ഗ്രേറ്റർ ടൊറന്റോ മേഖലയിലാകെ 13.5 ശതമാനത്തോളം തൊഴിലാളികൾ അതായത് രണ്ടു ലക്ഷത്തിലധികം ആളുകൾ ഇതിന്റെ പ്രത്യാഘാതങ്ങൾ അനുഭവിക്കുന്നുണ്ട്. അതിനോടൊപ്പം വോൺ നഗരത്തിൽ 32,000-ത്തിൽ അധികം ജീവനക്കാരെയും വിൻഡ്സറിലെ പ്രമുഖ വാഹന നിർമ്മാണ മേഖലയിലെ പതിനായിരക്കണക്കിന് തൊഴിലാളികളെയും ഈ പുതിയ ലെവികൾ വൻതോതിൽ ബാധിച്ചിട്ടുണ്ട്.
Also Read : യുഎസ്-കാനഡ വ്യാപാര യുദ്ധം: കായിക മേഖലയിലും വൻ തിരിച്ചടി
ഓഗസ്റ്റ് അവസാനത്തോടെ നടപ്പിലാക്കിയ പുതിയ നിയമങ്ങളും ക്ഷീര ഉൽപ്പന്നങ്ങൾ ഉൾപ്പെടെയുള്ള മേഖലകളിലെ നിയന്ത്രണങ്ങളും പ്രതിസന്ധിയുടെ വ്യാപ്തി കൂട്ടിയതായി പഠനം വ്യക്തമാക്കുന്നു. ആഗോള വിപണിയിൽ അമേരിക്കൻ നയങ്ങൾ സൃഷ്ടിക്കുന്ന അനിശ്ചിതത്വം നേരിടാൻ തദ്ദേശീയ വ്യവസായങ്ങളെ സഹായിക്കുകയും മറ്റ് അന്താരാഷ്ട്ര വിപണികളിലേക്ക് കയറ്റുമതി വ്യാപിപ്പിക്കുകയും ചെയ്യേണ്ടതിന്റെ ആവശ്യകതയിലേക്കാണ് ഈ വിവരങ്ങൾ വിരൽ ചൂണ്ടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
