കാഠ്മണ്ഡു: ടിബറ്റിലെ കൈലാസ തീർഥാടനത്തിനിടെയുണ്ടായ പ്രകൃതിദുരന്തത്തിൽ കാണാതായ കനേഡിയൻ ദമ്പതികളായ ശുഭാക്ഷി റാവ്ല, സുമിത് റാവ്ല എന്നിവരെ കണ്ടെത്താനുള്ള ശ്രമങ്ങൾ തുടരുന്നു. നേപ്പാൾ-ടിബറ്റ് അതിർത്തി പ്രദേശത്തുണ്ടായ കനത്ത ഫ്ലാഷ് പ്രളയത്തിനും മണ്ണിടിച്ചിലിനും തൊട്ടുമുമ്പാണ് ഇവർ അവസാനമായി മക്കളുമായി ബന്ധപ്പെട്ടത്. നിലവിൽ ബ്രിട്ടീഷ് കൊളംബിയയിൽ കഴിയുന്ന മക്കളായ പാർണികയും കെനിഷയും മാതാപിതാക്കളെക്കുറിച്ചുള്ള വിവരങ്ങൾക്കായി അധികൃതരുമായി നിരന്തരം ബന്ധപ്പെട്ടു വരികയാണ്.
വിദേശ പൗരന്മാരും അപകടത്തിൽ
ദുരന്തത്തിൽ കാണാതായവരിൽ 32 കനേഡിയൻ പൗരന്മാരും ഉൾപ്പെട്ടിട്ടുണ്ടെന്ന് കാനഡ സർക്കാർ ഔദ്യോഗികമായി സ്ഥിരീകരിച്ചു. പ്രദേശത്തെ ആശുപത്രികളും പ്രാദേശിക ഭരണകൂടങ്ങളുമായി ബന്ധപ്പെട്ട് ഇവർക്കായി തെരച്ചിൽ ഊർജിതമാക്കിയിട്ടുണ്ട്. ഇതുവരെ 579 മൃതദേഹങ്ങൾ കണ്ടെടുത്തപ്പോൾ 527 വിദേശികളടക്കം 1,924 പേരെ ഇനിയും കണ്ടെത്താനുണ്ടെന്നാണ് ലഭ്യമായ വിവരം. ദുരന്തബാധിത മേഖലകളിൽ ആശയവിനിമയ സംവിധാനങ്ങൾ തകരാറിലായത് തെരച്ചിൽ നടപടികളെ ബാധിക്കുന്നുണ്ട്.
Also Read: റഫറണ്ടം അടുക്കവെ ആൽബർട്ടയിൽ വംശീയ അധിക്രമങ്ങൾ ശക്തമാകുന്നു; സിഖ്, മുസ്ലിം സമൂഹങ്ങൾ ഭീതിയിൽ
അധികൃതരുടെ സഹായം തേടി കുടുംബം
കാനഡ സർക്കാരും വിദേശകാര്യ വകുപ്പും വിഷയത്തിൽ അടിയന്തരമായി ഇടപെട്ട് കൃത്യമായ വിവരങ്ങൾ ലഭ്യമാക്കണമെന്ന് കാണാതായവരുടെ കുടുംബങ്ങൾ ആവശ്യപ്പെട്ടു. രക്ഷാപ്രവർത്തനം കൂടുതൽ മേഖലകളിലേക്ക് വ്യാപിപ്പിക്കുന്നതോടെ കാണാതായവരെക്കുറിച്ച് വ്യക്തമായ വിവരം ലഭിക്കുമെന്ന പ്രതീക്ഷയിലാണ് റാവ്ല കുടുംബവും ബന്ധുക്കളും. ദുരന്തമേഖലയിലെ നിലവിലെ സാഹചര്യങ്ങൾ കാനഡ വിദേശകാര്യ മന്ത്രാലയം സൂക്ഷ്മമായി നിരീക്ഷിച്ചു വരികയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
Nepal Floods: Search continues for Canadian couple missing in Tibet.
