ഓസ്കാർ നാമനിർദ്ദേശം നേടിയ കനേഡിയൻ നടൻ ഗ്രഹാം ഗ്രീൻ (73) അന്തരിച്ചു. ഏറെ നാളത്തെ അസുഖത്തെ തുടർന്ന് തിങ്കളാഴ്ച ഒന്റാറിയോയിലെ സ്ട്രാറ്റ്ഫോർഡിൽ വെച്ചായിരുന്നു അന്ത്യം. ഈ വർഷം ജൂണിൽ ഗവർണർ ജനറൽ പുരസ്കാരം ഏറ്റുവാങ്ങിയതിന് ശേഷമാണ് അദ്ദേഹത്തിൻ്റെ മരണം. ഗ്രഹാം ഗ്രീനിൻ്റെ മാനേജ്മെന്റ് ടീമാണ് മരണവാർത്ത പുറത്തുവിട്ടത്.
1990-ൽ പുറത്തിറങ്ങിയ ‘ഡാൻസസ് വിത്ത് വോൾവ്സ്’ (Dances With Wolves) എന്ന ചിത്രത്തിലെ ‘കിക്കിംഗ് ബേർഡ്’ എന്ന കഥാപാത്രത്തിലൂടെയാണ് ഗ്രഹാം ഗ്രീൻ പ്രശസ്തനായത്. കെവിൻ കോസ്റ്റ്നർ സംവിധാനം ചെയ്ത്, അദ്ദേഹത്തോടൊപ്പം തന്നെ പ്രധാന കഥാപാത്രത്തെ അവതരിപ്പിച്ച ഈ ചിത്രം മികച്ച ചിത്രത്തിനുള്ള ഓസ്കാർ അവാർഡ് നേടിയിരുന്നു. ഈ സിനിമയിലെ പ്രകടനത്തിന് ഗ്രഹാം ഗ്രീനിനും ഓസ്കാർ നോമിനേഷൻ ലഭിച്ചു.
ഒന്റാറിയോയിലെ ഒഹ്സ്വെക്കൻ എന്ന സ്ഥലത്ത് ജനിച്ച ഗ്രീൻ, സിക്സ് നേഷൻസ് റിസർവിൽ നിന്നുള്ളയാളാണ്. 1970-കളുടെ അവസാനം മുതൽ അദ്ദേഹം സിനിമ, ടെലിവിഷൻ, നാടക രംഗങ്ങളിൽ സജീവമായിരുന്നു. 2015-ൽ ഓർഡർ ഓഫ് കാനഡ ബഹുമതിയും അദ്ദേഹത്തിന് ലഭിച്ചിരുന്നു. കൂടാതെ ഈ വർഷം ജൂൺ 13-ന് ഒട്ടാവയിലെ റൈഡോ ഹാളിൽ നടന്ന ചടങ്ങിൽ ഗവർണർ ജനറൽ മേരി സൈമൺ അദ്ദേഹത്തിന് ആജീവനാന്ത കലാപരമായ നേട്ടത്തിനുള്ള പുരസ്കാരം സമ്മാനിച്ചു.
‘ഡൈ ഹാർഡ്: വിത്ത് എ വെൻജൻസ്’ (Die Hard: With a Vengeance), ടോം ഹാങ്ക്സ് നായകനായ ‘ദി ഗ്രീൻ മൈൽ’ (The Green Mile), ‘മാവെറിക്ക്’ (Maverick) തുടങ്ങിയവയാണ് അദ്ദേഹത്തിൻ്റെ ശ്രദ്ധേയമായ മറ്റ് ചിത്രങ്ങൾ. 2024-ൽ പുറത്തിറങ്ങിയ കോമഡി ത്രില്ലറായ ‘സീഡ്സ്’ (Seeds) എന്ന സിനിമയിലെ അഭിനയത്തിന് കനേഡിയൻ സ്ക്രീൻ അവാർഡും ലഭിച്ചു.
ഇതിന് പുറമെ ‘റിസർവേഷൻ ഡോഗ്സ്’ (Reservation Dogs) എന്ന എഫ്.എക്സ്. പരമ്പരയിലും അദ്ദേഹം അഭിനയിച്ചിട്ടുണ്ട്. “അദ്ദേഹം ധാർമിക മൂല്യങ്ങളുള്ള ഒരു മഹാപുരുഷനായിരുന്നു, എന്നും ഓർമ്മിക്കപ്പെടും” എന്ന് ഗ്രീനിൻ്റെ ഏജന്റായ മൈക്കിൾ ഗ്രീൻ ഒരു പ്രസ്താവനയിൽ അറിയിച്ചു.
