ഒട്ടാവ: സിഖ് പാരമ്പര്യ മാസത്തോടനുബന്ധിച്ച് കാനഡയിലെ സിഖ് സമൂഹത്തിന് ഐക്യദാർഢ്യം പ്രഖ്യാപിച്ച് പ്രധാനമന്ത്രി മാർക്ക് കാർണി ഒട്ടാവയിലെ ഗുരുദ്വാര സന്ദർശിച്ചു. ശനിയാഴ്ച ഗുരുദ്വാരയിലെത്തിയ അദ്ദേഹം കമ്മ്യൂണിറ്റി സർവീസിന്റെ ഭാഗമാവുകയും സിഖ് മതവിശ്വാസികൾക്കൊപ്പം സേവനപ്രവർത്തനങ്ങളിൽ ഏർപ്പെടുകയും ചെയ്തു. ഇതിന്റെ ദൃശ്യങ്ങൾ അദ്ദേഹം തന്നെ സോഷ്യൽ മീഡിയയിലൂടെ പങ്കുവെച്ചിട്ടുണ്ട്. ലോകത്തിൽ സിഖ് ജനസംഖ്യയിൽ രണ്ടാം സ്ഥാനത്തുള്ള രാജ്യമാണ് കാനഡയെന്നും, രാജ്യത്തിന്റെ പുരോഗതിക്കായി സിഖ് സമൂഹം നൽകിവരുന്ന സംഭാവനകൾ ഏറെ വലുതാണെന്നും അദ്ദേഹം കുറിച്ചു.
സിഖ് പാരമ്പര്യ മാസത്തിന്റെ ഭാഗമായി കാനഡയിലുടനീളം വിപുലമായ പരിപാടികളാണ് സംഘടിപ്പിച്ചിരിക്കുന്നത്. സിഖ് ചരിത്രത്തിലെ വിവിധ ഘട്ടങ്ങളെ ആസ്പദമാക്കി ‘ബാഗി ജാ ബാദ്ഷാ’ എന്ന പേരിൽ പ്രത്യേക പ്രദർശനവും ഇതിന്റെ ഭാഗമായി നടക്കുന്നുണ്ട്. ഒപ്പം ടൊറന്റോയിലെ ഇന്ത്യൻ കോൺസുലേറ്റിന്റെ നേതൃത്വത്തിൽ വൈശാഖി ആഘോഷങ്ങളും സംഘടിപ്പിച്ചു. ഭംഗ്ര, ഗിദ്ദ തുടങ്ങിയ പരമ്പരാഗത കലാപരിപാടികളോടെയാണ് സിഖ് പാരമ്പര്യം കാനഡയിൽ ആഘോഷിക്കപ്പെടുന്നത്. ഇന്ത്യയും കാനഡയും തമ്മിലുള്ള സാംസ്കാരിക ബന്ധം ശക്തമാക്കുന്നതിൽ കാനഡയിലെ ഇന്ത്യൻ പ്രവാസികൾ വലിയ പങ്കുവഹിക്കുന്നുണ്ടെന്ന് ഹൈക്കമ്മീഷണർ ദിനേഷ് കെ. പട്നായിക് ഈ അവസരത്തിൽ ഓർമ്മിപ്പിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada PM Mark Carney celebrates Sikh Heritage Month
