ഒട്ടാവ: 2026 ജനുവരി 1-നും ജൂൺ 30-നും ഇടയിൽ പുതിയ കാനഡ പാസ്പോർട്ട് ലഭിച്ചവർക്ക് ഓഗസ്റ്റ് മുതൽ ഒക്ടോബർ വരെയുള്ള മാസങ്ങളിൽ സർക്കാരിൽ നിന്നും ഒരു പ്രത്യേക ഇമെയിലോ കത്തോ ലഭിക്കാൻ സാധ്യതയുണ്ട്. എന്നാൽ ഇതുകണ്ട് ഭയപ്പെടേണ്ടതില്ല. കാനഡ പാസ്പോർട്ട് സേവനങ്ങളുടെ ഗുണനിലവാരം മെച്ചപ്പെടുത്തുന്നതിന്റെ ഭാഗമായി സർവീസ് അനുഭവങ്ങൾ ചോദിച്ചറിയുന്ന ഒരു ഉപഭോക്തൃ സർവേ (voluntary client experience survey) മാത്രമാണിത്.
2026-ന്റെ ആദ്യ പകുതിയിൽ പാസ്പോർട്ട് എടുത്തവരിൽ നിന്നും റാൻഡമായി തിരഞ്ഞെടുക്കപ്പെടുന്ന ആളുകൾക്കാണ് ഈ ഇമെയിലുകൾ ലഭിക്കുക. ഇതിൽ പങ്കെടുക്കണോ വേണ്ടയോ എന്നത് പൂർണ്ണമായും നിങ്ങളുടെ വ്യക്തിപരമായ തീരുമാനമാണ്. സർവേയിൽ പങ്കെടുക്കാതിരുന്നത് കൊണ്ട് നിങ്ങളുടെ നിലവിലുള്ളതോ ഭാവിയിലുള്ളതോ ആയ പാസ്പോർട്ട് അപേക്ഷകളെ അത് യാതൊരുവിധത്തിലും ബാധിക്കില്ല. ‘Advanis’ എന്ന ഗവേഷണ ഏജൻസിയാണ് കാനഡ സർക്കാരിന് വേണ്ടി ഈ 15 മുതൽ 20 മിനിറ്റ് വരെ ദൈർഘ്യമുള്ള സർവേ നടത്തുന്നത്.
ഇത്തരം സന്ദേശങ്ങളുടെ മറവിൽ തട്ടിപ്പുകൾ നടക്കാൻ സാധ്യതയുള്ളതിനാൽ യഥാർത്ഥ ഇമെയിൽ തിരിച്ചറിയേണ്ടത് അത്യാവശ്യമാണ്. യഥാർത്ഥ ഇമെയിൽ canpassport2026@advanis.net എന്ന വിലാസത്തിൽ നിന്നായിരിക്കും വരുന്നത്. ഇതിലെ സർവേ ലിങ്ക് surveys.advanis.ca/passport2026 എന്ന രീതിയിലായിരിക്കും ആരംഭിക്കുക.
ഏറ്റവും പ്രധാനമായി, ഈ സർവേയിൽ ഒരിക്കലും നിങ്ങളുടെ പാസ്പോർട്ട് നമ്പർ, ബാങ്ക് അക്കൗണ്ട് വിവരങ്ങൾ, അല്ലെങ്കിൽ മറ്റ് സാമ്പത്തിക വിവരങ്ങൾ എന്നിവ ചോദിക്കില്ല. അപേക്ഷ പ്രക്രിയ എത്രത്തോളം എളുപ്പമായിരുന്നു, എത്ര സമയമെടുത്തു തുടങ്ങിയ കാര്യങ്ങൾ മാത്രമാണ് ചോദിക്കുക. പണമോ സാമ്പത്തിക വിവരങ്ങളോ പാസ്പോർട്ട് നമ്പറോ ആവശ്യപ്പെടുന്ന ഇമെയിലുകൾ ലഭിച്ചാൽ അവ വ്യാജമാണെന്ന് ഉറപ്പിക്കാമെന്നും ഉടനടി റിപ്പോർട്ട് ചെയ്യണമെന്നും അധികൃതർ മുന്നറിയിപ്പ് നൽകി. നിങ്ങൾ പങ്കുവെക്കുന്ന വിവരങ്ങൾ പൂർണ്ണമായും രഹസ്യമായി സൂക്ഷിക്കുമെന്നും അധികൃതർ വ്യക്തമാക്കി.
Why is the Canadian government sending emails to passport holders? Beware—do not fall for scams disguised as surveys.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
