ഓട്ടവ: ഡൊണാൾഡ് ട്രംപിന്റെ ഇറക്കുമതി തീരുവ മൂലം സാമ്പത്തിക പ്രതിസന്ധി നേരിടുന്ന കാനഡ, അമേരിക്കയോടുള്ള അമിത ആശ്രയം കുറയ്ക്കാൻ ലക്ഷ്യമിട്ട് പുതിയ ബജറ്റ് അവതരിപ്പിച്ചു. കനേഡിയൻ പ്രധാനമന്ത്രി മാർക്ക് കാർണിയുടെ നേതൃത്വത്തിലുള്ള ലിബറൽ സർക്കാരാണ് വ്യാഴാഴ്ച പാർലമെന്റിൽ തങ്ങളുടെ രണ്ടാമത്തെ ബജറ്റ് സമർപ്പിച്ചത്. “നമ്മുടെ വിധിയുടെ നാഥന്മാർ” എന്നാണ് പുതിയ ബജറ്റിന് നൽകിയിരിക്കുന്ന പേര്.
മുൻപത്തെപ്പോലെ തീരുവയില്ലാത്ത വ്യാപാരം യു.എസുമായി ഇനി സാധ്യമല്ലെന്നും, അതിനാൽ മറ്റ് രാജ്യങ്ങളുമായി പുതിയ വ്യാപാരബന്ധങ്ങൾ അടിയന്തരമായി ഉണ്ടാക്കേണ്ടതുണ്ടെന്നും പ്രധാനമന്ത്രി മാർക്ക് കാർണി വ്യക്തമാക്കി. ട്രംപിന്റെ നയങ്ങൾ തിരിച്ചടിയായെങ്കിലും രാജ്യത്തിന്റെ സാമ്പത്തിക സ്വാതന്ത്ര്യത്തിനാണ് മുൻഗണന നൽകുന്നതെന്നും അദ്ദേഹം കൂട്ടിച്ചേർത്തു. ലോകത്ത് എന്തുതന്നെ സംഭവിച്ചാലും കാനഡ സ്വന്തം നിലയിൽ കൂടുതൽ ശക്തമാകുമെന്ന് ബജറ്റ് അവതരിപ്പിച്ച ധനമന്ത്രി ഫ്രാൻസ്വ-ഫിലിപ്പ് ഷാംപെയ്ൻ പറഞ്ഞു.
അമേരിക്കയിൽ നടന്ന ഇടക്കാല തിരഞ്ഞെടുപ്പിൽ ട്രംപിന്റെ റിപ്പബ്ലിക്കൻ പാർട്ടിക്ക് തിരിച്ചടി നേരിടുകയും പ്രതിപക്ഷമായ ഡെമോക്രാറ്റുകൾ മുന്നേറ്റം നടത്തുകയും ചെയ്തിട്ടുണ്ട്. വരുംനാളുകളിൽ കാനഡയ്‌ക്കെതിരായ തീരുവകൾ അവസാനിപ്പിക്കുമെന്ന് ഡെമോക്രാറ്റ് നേതാക്കൾ വ്യക്തമാക്കുന്നുണ്ടെങ്കിലും, ഔദ്യോഗിക ചർച്ചകൾ നടക്കേണ്ടത് വൈറ്റ് ഹൗസുമായാണെന്ന നിലപാടിലാണ് കനേഡിയൻ ഭരണകൂടം.
രാജ്യത്തിന്റെ ഊർജ്ജോൽപ്പാദനം, ഖനനം തുടങ്ങിയ പ്രധാന മേഖലകളെ ശക്തിപ്പെടുത്താനും സാമ്പത്തിക പരമാധികാരം ഉറപ്പാക്കാനും ബജറ്റിൽ പ്രത്യേക തുക വകയിരുത്തിയിട്ടുണ്ട്. കൂടാതെ, അമേരിക്കൻ തീരുവ മൂലം പ്രതിസന്ധിയിലായ കാനഡയിലെ കാർ, സ്റ്റീൽ നിർമ്മാണ മേഖലകളിലെ തൊഴിലാളികൾക്ക് സഹായം നൽകാനും പുതിയ പദ്ധതികളുണ്ട്.
ഇറാൻ യുദ്ധത്തെ തുടർന്നുണ്ടായ ഊർജ്ജവിലക്കയറ്റവും പണപ്പെരുപ്പവും കാനഡയെ വലയ്ക്കുന്നുണ്ട്. എങ്കിലും, പാർലമെന്റിൽ ലിബറൽ പാർട്ടിക്ക് ഭൂരിപക്ഷമുള്ളതിനാൽ സർക്കാരിന് ബജറ്റ് എളുപ്പത്തിൽ പാസാക്കിയെടുക്കാൻ സാധിക്കും. വ്യാപാര മേഖലയിൽ അമേരിക്ക അല്ലാത്ത മറ്റ് രാജ്യങ്ങളെക്കൂടി പങ്കാളികളാക്കി രാജ്യത്തിന്റെ ഭാവി സുരക്ഷിതമാക്കുകയാണ് ഈ ബജറ്റിലൂടെ കാനഡ ലക്ഷ്യമിടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
