ഇറാൻ യുദ്ധത്തിൽ മലക്കംമറിഞ്ഞ് കാനഡ; യുഎസ് ലക്ഷ്യങ്ങളിൽ വ്യക്തതയില്ലെന്ന് പ്രധാനമന്ത്രി മാർക്ക് കാർണി

ഒട്ടാവ: ഇറാൻ വിഷയത്തിൽ അമേരിക്ക സ്വീകരിക്കുന്ന യുദ്ധനിലപാടുകളെ പിന്തുണച്ച ആദ്യഘട്ട തീരുമാനത്തിൽ നിന്ന് കാനഡ പിന്നോട്ട്. യുഎസ് പ്രസിഡന്റ് ഡൊണാൾഡ് ട്രംപിന്റെ സൈനിക നീക്കങ്ങൾക്കു പിന്നിലെ ലക്ഷ്യങ്ങളിൽ വ്യക്തതയില്ലെന്ന് കാനഡ പ്രധാനമന്ത്രി മാർക്ക് കാർണി വ്യക്തമാക്കി. ‘ദി കനേഡിയൻ പ്രസ്സി’ന് നൽകിയ പ്രത്യേക അഭിമുഖത്തിലാണ് കാർണി നയതന്ത്രപരമായ ഈ മാറ്റം വെളിപ്പെടുത്തിയത്.
ഫെബ്രുവരി 28-ന് ഇറാനിൽ അമേരിക്കൻ സൈനിക നടപടി ആരംഭിച്ചപ്പോൾ നിരുപാധിക പിന്തുണ പ്രഖ്യാപിച്ച ഒട്ടാവ, ദിവസങ്ങൾക്കുള്ളിൽ നിലപാട് തിരുത്തുകയായിരുന്നു.

ഐക്യരാഷ്ട്രസഭയുമായി കൂടിയാലോചന നടത്താതെ അമേരിക്ക നടത്തിയ ഈ നീക്കം അന്താരാഷ്ട്ര നിയമങ്ങളുടെ ലംഘനമാകാൻ സാധ്യതയുണ്ടെന്ന് കാർണി ചൂണ്ടിക്കാട്ടി. യുദ്ധം തുടങ്ങിയ ആദ്യ മണിക്കൂറുകളിൽ നൽകിയ പിന്തുണ, യുഎസിന്റെ സൈനിക ലക്ഷ്യങ്ങളെക്കുറിച്ചുള്ള അവ്യക്തത നിമിത്തം പുനഃപരിശോധിക്കേണ്ടി വന്നുവെന്നാണ് ഔദ്യോഗിക വിശദീകരണം.

ഭീകരവാദത്തെ പ്രോത്സാഹിപ്പിക്കുന്ന ഇറാൻ ഭരണകൂടത്തിന്റെ നടപടികളോട് കാനഡയ്ക്ക് ഇപ്പോഴും വിയോജിപ്പാണുള്ളതെന്ന് പ്രധാനമന്ത്രി പറഞ്ഞു. നൂറുകണക്കിന് കാനഡക്കാരുടെ കൊലപാതകത്തിന് ഇറാൻ ഉത്തരവാദികളാണെന്നും അവർ ആണവായുധം കൈക്കലാക്കുന്നത് തടയണമെന്നുമാണ് ഒട്ടാവയുടെ നിലപാട്. എന്നാൽ, ഈ ലക്ഷ്യങ്ങൾ കൈവരിക്കാൻ സ്വീകരിക്കുന്ന മാർഗ്ഗങ്ങൾ അന്താരാഷ്ട്ര ചട്ടങ്ങൾ പാലിച്ചുകൊണ്ടാവണം. യുഎസ് നീക്കം ഇതിൽ നിന്ന് വ്യതിചലിക്കുന്നുണ്ടോ എന്ന ആശങ്ക നിലനിൽക്കുന്നതായി അദ്ദേഹം കൂട്ടിച്ചേർത്തു.

ഇറാൻ വിഷയത്തിലെ ഈ ചുവടുമാറ്റം മാർക്ക് കാർണിക്കെതിരെ കാനഡയ്ക്കകത്തും പുറത്തും കടുത്ത വിമർശനത്തിന് ഇടയാക്കിയിട്ടുണ്ട്. തത്വദീക്ഷയില്ലാത്ത നിലപാടാണ് പ്രധാനമന്ത്രിയുടേതെന്ന് ഇറാൻ വിരുദ്ധ പക്ഷം ആരോപിക്കുമ്പോൾ, ആഗോള ശക്തികളുടെ അധിനിവേശത്തെ എതിർക്കുമെന്ന കാർണിയുടെ മുൻ പ്രസ്താവനകൾക്ക് വിരുദ്ധമാണ് ഇപ്പോഴത്തെ അവ്യക്തതയെന്ന് നിയമവിദഗ്ധരും ചൂണ്ടിക്കാട്ടുന്നു.

നിലവിൽ യുദ്ധത്തിന്റെ ഭാഗമാകില്ലെന്ന് വ്യക്തമാക്കിയ കാനഡ, ഹോർമുസ് കടലിടുക്കിലെ കപ്പൽ ഗതാഗതം പുനഃസ്ഥാപിക്കുന്നതിനായി ഭാവിയിൽ സഹായം നൽകിയേക്കുമെന്ന് സൂചന നൽകിയിട്ടുണ്ട്. ഇതിനായി ഗൾഫ് രാജ്യങ്ങളിൽ നിന്ന് നിക്ഷേപം സമാഹരിക്കാനുള്ള ശ്രമത്തിലാണ് കാർണി സർക്കാർ. അർമേനിയയിൽ നടക്കുന്ന യൂറോപ്യൻ പൊളിറ്റിക്കൽ കമ്മ്യൂണിറ്റി ഉച്ചകോടിയിൽ പങ്കെടുക്കുന്ന പ്രധാനമന്ത്രി, അവിടെയുള്ള ലോകനേതാക്കളുമായി ഇറാൻ വിഷയത്തിലും റഷ്യ-യുക്രെയ്ൻ യുദ്ധത്തിലും സ്വീകരിക്കേണ്ട ഭാവി നിലപാടുകളെക്കുറിച്ച് ചർച്ച നടത്തും. വെടിനിർത്തൽ പ്രഖ്യാപിച്ചതായി വാഷിംഗ്ടൺ അവകാശപ്പെടുന്നുണ്ടെങ്കിലും അത് സുസ്ഥിരമല്ലെന്നാണ് കാനഡയുടെ വിലയിരുത്തൽ.

Canada is caught in the middle of the Iran war; Prime Minister Mark Carney says US goals are unclear

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt