ഓട്ടവ: ജീവിതച്ചെലവ് ക്രമാതീതമായി ഉയർന്ന സാഹചര്യത്തിൽ കുറഞ്ഞ വരുമാനമുള്ള കുടുംബങ്ങൾക്ക് ആശ്വാസമായി കാനഡ ഗ്രോസറീസ് ആന്റ് എസൻഷ്യൽസ് ബെനിഫിറ്റിന്റെ (CGEB) ഈ വർഷത്തെ അവസാന സാമ്പത്തിക സഹായം ഒക്ടോബർ അഞ്ച് തിങ്കളാഴ്ച മുതൽ വിതരണം ചെയ്യും. മുൻപ് നിലവിലുണ്ടായിരുന്ന GST ക്രെഡിറ്റിന് പകരം കൂടുതൽ ആനുകൂല്യം ലഭ്യമാക്കുന്നതിനായി ഫെഡറൽ സർക്കാർ 2026 ജൂലൈയിലാണ് ഈ പുതിയ പദ്ധതി ആരംഭിച്ചത്. രാജ്യത്തെ പൗരന്മാർക്ക് ഭക്ഷണം ഉൾപ്പെടെയുള്ള അടിസ്ഥാന ആവശ്യങ്ങൾക്കായി നൽകുന്ന ഈ നികുതിരഹിത തുക കാനഡ റവന്യൂ ഏജൻസി (CRA) മൂന്ന് മാസത്തിലൊരിക്കൽ നേരിട്ട് ബാങ്ക് അക്കൗണ്ടുകളിലേക്കോ തപാൽ വഴിയോ നൽകിവരികയാണ്.
ഈ ആനുകൂല്യം ലഭിക്കാൻ പ്രധാനമായും രണ്ട് കാര്യങ്ങളാണ് ശ്രദ്ധിക്കേണ്ടത്. പണം നൽകുന്ന മാസത്തിലും അതിന് തൊട്ടുമുമ്പത്തെ മാസത്തിലും അപേക്ഷകർ കാനഡയിൽ ടാക്സ് അടയ്ക്കുന്ന സ്ഥിരതാമസക്കാരായിരിക്കണം എന്നതാണ് ആദ്യത്തെ നിബന്ധന. കൂടാതെ 19 വയസ്സ് തികഞ്ഞവർക്കായിരിക്കും ഈ തുക ലഭിക്കുക. എന്നാൽ പങ്കാളിയുള്ളവർക്കും കുട്ടികളുള്ളവർക്കും ഈ പ്രായപരിധിയിൽ ഇളവുണ്ട്. വ്യക്തികൾ സമർപ്പിച്ച ടാക്സ് റിട്ടേണിലെ വരുമാനം നോക്കിയാണ് അർഹതയും തുകയും കാനഡ റവന്യൂ ഏജൻസി തീരുമാനിക്കുന്നത്.
കുടുംബത്തിലെ അംഗങ്ങളുടെ എണ്ണത്തിനും വരുമാനത്തിനുമനുസരിച്ചാണ് പദ്ധതിയുടെ സാമ്പത്തിക പരിധി നിശ്ചയിച്ചിട്ടുള്ളത്. കുട്ടികളില്ലാത്ത ഒറ്റയ്ക്കുള്ള വ്യക്തികൾക്ക് വാർഷിക വരുമാനം 60,012 ഡോളർ വരെയും, ഒരു കുട്ടിയുള്ളവർക്ക് 68,912 ഡോളർ വരെയും, നാലിൽ കൂടുതൽ കുട്ടികളുള്ള കുടുംബങ്ങൾക്ക് 82,952 ഡോളർ വരെയുമാണ് വരുമാന പരിധി നിശ്ചയിച്ചിരിക്കുന്നത്. വിവാഹിതരായ ദമ്പതികൾക്ക് കുട്ടികളില്ലെങ്കിൽ 64,232 ഡോളറും ഒരു കുട്ടിയുണ്ടെങ്കിൽ 68,912 ഡോളറുമാണ് പരിധി.
കുടുംബത്തിന്റെ വരുമാനവും കുട്ടികളുടെ എണ്ണവും അടിസ്ഥാനമാക്കിയാണ് ഓരോരുത്തർക്കും ലഭിക്കുന്ന തുക കണക്കാക്കുന്നത്. കുട്ടികളില്ലാത്ത വ്യക്തികൾക്ക് വാർഷിക വരുമാനം അനുസരിച്ച് 250 ഡോളർ മുതൽ 445 ഡോളർ വരെ ലഭിക്കുമ്പോൾ, അത് ഓരോ ഗഡുവിലും 62 ഡോളർ മുതൽ 111 ഡോളർ വരെയായി അക്കൗണ്ടിലെത്തും. രണ്ട് കുട്ടികളുള്ളതും 45,000 ഡോളറോ അതിൽ താഴെയോ വരുമാനമുള്ളതുമായ ഒറ്റയ്ക്കുള്ള വ്യക്തിക്ക് ഒരു വർഷത്തിൽ മൊത്തം 1,358 ഡോളർ ലഭിക്കും. ഇതനുസരിച്ച് ഓരോ മൂന്ന് മാസത്തിലും 339.50 ഡോളർ വീതമാണ് വിതരണം ചെയ്യുക.
Also Read: സ്വതന്ത്ര ആൽബർട്ട രൂപീകരിച്ചാൽ എന്തൊക്കെ മാറും? ഫെഡറൽ സർക്കാരിന്റെ രേഖകൾ പറയുന്നത് ഇങ്ങനെ
തങ്ങൾക്ക് ലഭിക്കുന്ന സഹായധനത്തിന്റെ വിവരങ്ങളും അർഹതയും പരിശോധിക്കാൻ കാനഡ റവന്യൂ ഏജൻസിയുടെ ഔദ്യോഗിക വെബ്‌സൈറ്റിൽ പ്രത്യേക കാൽക്കുലേറ്റർ സംവിധാനം ക്രമീകരിച്ചിട്ടുണ്ട്. ഈ പദ്ധതി നടപ്പിലാക്കുന്നതിലൂടെ അടുത്ത ആറ് വർഷത്തിനുള്ളിൽ ഫെഡറൽ സർക്കാരിന് ഏകദേശം 12.4 ബില്യൺ ഡോളറിന്റെ ബാധ്യത ഉണ്ടാകുമെന്നാണ് പാർലമെന്ററി ബജറ്റ് ഓഫീസറുടെ ഔദ്യോഗിക കണക്കുകൂട്ടൽ. സാധാരണക്കാരായ ജനങ്ങൾക്ക് നിത്യജീവിതത്തിലെ ചെലവുകൾ തരണം ചെയ്യാൻ ഈ പേയ്‌മെന്റ് വലിയ ആശ്വാസമാകുമെന്നാണ് വിലയിരുത്തപ്പെടുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
