ഓട്ടവ: ജീവിതച്ചെലവ് ക്രമാതീതമായി ഉയർന്നതോടെ കാനഡയിൽ ഫുഡ് ബാങ്കുകളെ ആശ്രയിക്കുന്നവരുടെ എണ്ണം റെക്കോർഡ് നിലയിലെത്തി. 2026-ൽ പ്രതിമാസ ഫുഡ് ബാങ്ക് സന്ദർശനങ്ങൾ 23.5 ലക്ഷമായി ഉയർന്നതായി ഫുഡ് ബാങ്ക്സ് കാനഡയുടെ വാർഷിക ‘ഹംഗർകൗണ്ട്’ റിപ്പോർട്ട് വ്യക്തമാക്കുന്നു. കഴിഞ്ഞ വർഷത്തെ അപേക്ഷിച്ച് സന്ദർശനങ്ങളിൽ ഒൻപത് ശതമാനത്തോളം വർധനയുണ്ട്. 2019-മായി താരതമ്യം ചെയ്യുമ്പോൾ 117 ശതമാനത്തിന്റെ വർധനവാണിത് രേഖപ്പെടുത്തിയിരിക്കുന്നത്.
പ്രിൻസ് എഡ്വേർഡ് ഐലൻഡ്, ന്യൂഫൗണ്ട്‌ലാൻഡ് ആൻഡ് ലാബ്രഡോർ എന്നിവ ഒഴികെ രാജ്യത്തെ ഒട്ടുമിക്ക പ്രവിശ്യകളിലും പ്രദേശങ്ങളിലും ഫുഡ് ബാങ്ക് സന്ദർശനങ്ങൾ ഗണ്യമായി വർധിച്ചു. ഏറ്റവും കൂടുതൽ സന്ദർശനങ്ങൾ രേഖപ്പെടുത്തിയത് ഒന്റാറിയോയിലാണ്-8,46,724 പേർ. കഴിഞ്ഞ വർഷത്തെ അപേക്ഷിച്ച് 11 ശതമാനത്തോളം വർധനവാണിത്. ക്യുബെക്കിൽ 7,85,889 സന്ദർശനങ്ങളോടെ 5 ശതമാനവും, ബ്രിട്ടീഷ് കൊളംബിയയിൽ 2,50,505 സന്ദർശനങ്ങളോടെ 14 ശതമാനവും വർധന രേഖപ്പെടുത്തി.
ജീവിതച്ചെലവിലെ വർധന ദൈനംദിന ആവശ്യങ്ങൾ നിറവേറ്റാൻ പോലും ആളുകൾക്ക് വലിയ പ്രതിസന്ധിയുണ്ടാക്കുന്നതായി ഫുഡ് ബാങ്ക്സ് കാനഡ സി.ഇ.ഒ കിർസ്റ്റിൻ ബിയേർഡ്‌സ്‌ലി പറഞ്ഞു. ഭക്ഷണത്തിനും വാടകയ്ക്കുമിടയിൽ ഏതെങ്കിലും ഒന്ന് തിരഞ്ഞെടുക്കാൻ നിർബന്ധിതരാകുന്ന അവസ്ഥയിലാണ് പലരെന്നും അവർ ചൂണ്ടിക്കാട്ടി.
ALSO READ: ജീവിതച്ചെലവ് ഉയരുന്നു; ഓട്ടവയിൽ ഫുഡ് ബാങ്കിനെ ആശ്രയിക്കുന്നവരും കൂടി
2021-ന് ശേഷം അടിസ്ഥാന ആവശ്യങ്ങൾക്കുള്ള ചെലവിൽ വലിയ വർധനയുണ്ടായതായി റിപ്പോർട്ട് വ്യക്തമാക്കുന്നു. ഭക്ഷ്യവിലയിൽ ഏകദേശം 30 ശതമാനവും ഭവനച്ചെലവിൽ 28 ശതമാനവും ഗതാഗതച്ചെലവിൽ 24 ശതമാനത്തോളവും വർധനയുണ്ടായി. ഫുഡ് ബാങ്കുകളെ ആശ്രയിക്കുന്നവരിൽ അഞ്ചിലൊരാൾ ജോലിയുള്ളവരാണ് എന്നതും ശ്രദ്ധേയമാണ്; 2019-ൽ ഇത് പത്തിലൊരാൾ മാത്രമായിരുന്നു.
തൊഴിലില്ലായ്മ വേതന ഇൻഷുറൻസ് (EI) പദ്ധതിയിൽ ഗിഗ് ജോലികൾ കൂടി ഉൾപ്പെടുത്തുക, കാനഡ വർക്കേഴ്‌സ് ബെനഫിറ്റ് ഇരട്ടിയാക്കുക, ഭിന്നശേഷിക്കാർക്കുള്ള നികുതി ഇളവുകൾ വർധിപ്പിക്കുക, താങ്ങാനാവുന്ന ചെലവിലുള്ള ഭവനനിർമ്മാണം ഉൾപ്പെടെയുള്ള അടിസ്ഥാന സൗകര്യങ്ങളിൽ നിക്ഷേപം നടത്തുക തുടങ്ങിയ നിർദേശങ്ങളും റിപ്പോർട്ട് മുന്നോട്ടുവെക്കുന്നുണ്ട്. വടക്കൻ പ്രദേശങ്ങളിലും ഫുഡ് ബാങ്ക് സന്ദർശനങ്ങൾ കുത്തനെ വർധിച്ചിട്ടുണ്ട്. യുക്കോണിൽ 24 ശതമാനവും നോർത്ത് വെസ്റ്റ് ടെറിട്ടറീസ്, നുനാവട്ട് എന്നിവിടങ്ങളിൽ 29 ശതമാനവുമാണ് വർധന.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
‘Canada Food Bank Visits Hit Record High’
